ବର୍ଷାରୁ ବର୍ତ୍ତିବା ପାଇଁ ଗୁମ୍ଫାରେ ନେଇଥିଲେ ଆଶ୍ରୟ, ମାଟି ଅତଡା ଖସି ୨ ମୃତ
ଜୟପୁର: ବୈପାରୀଗୁଡ଼ା ଗୁପ୍ତେଶ୍ବର ଅଞ୍ଚଳର ମାଳିପଦର ଜଙ୍ଗଲରେ ଅଘଟଣ। ଜଙ୍ଗଲରେ ମାଟି ଅତଡ଼ା ଧସି ୨ଜଣ ମୃତ୍ୟୁ ହୋଇଥିବାବେଳେ ୩ ଆହତ ହୋଇଥିବା ସୂଚନା ମିଳିଛି। ଜଙ୍ଗଲଜାତ ଦ୍ରବ୍ୟ ସଂଗ୍ରହ ଲାଗି ମଙ୍ଗଳବାରଠାରୁ ୫ଜଣ ଜଙ୍ଗଲକୁ ଯାଇଥିଲେ। ବର୍ଷା ଲାଗି ରହିବାରୁ ଜଙ୍ଗଲର ଏକ ଗୁମ୍ଫାରେ ସେମାନେ ଆଶ୍ରୟ ନେଇଥିଲେ। ତେବେ ଆଶ୍ରୟ ନେଇଥିବାବେଳେ ଗୁମ୍ଫା ଉପରେ ମାଟି ଅତଡ଼ା ଖସି ପଡ଼ିବାରୁ ସେମାନଙ୍କ ମଧ୍ୟରୁ ୨ଜଣଙ୍କ ଘଟଣାସ୍ଥଳରେ ମୃତ୍ୟୁ ହୋଇଯାଇଥିଲା। ଅନ୍ୟ ୩ ଜଣ ଆହତ ହୋଇଥିବା ସୂଚନା ମିଳିଛି।
ବୈପାରୀଗୁଡ଼ା ଥାନା ହଳଦୀଗୁଣ୍ଡା ଗାଁର ଜୟଦେବ ଧାରୁଆ ଓ ସମାରୁ ଧାରୁଆଙ୍କ ପୁଅ ତ୍ରିଲୋଚନ ମାଳିପଦର ଜଙ୍ଗଲରୁ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ବଜାରରେ ସେସବୁ ବିକ୍ରି କରନ୍ତି। ଗତ ମଙ୍ଗଳବାର ଧାରୁଆ ଓ ତ୍ରିଲୋଚନଙ୍କ ସମେତ ୫ ଜଣ ଜଙ୍ଗଲକୁ ଯାଇଥିଲେ। ସେହି ସମୟରେ ଲଘୁଚାପ ଜନିତ ପ୍ରବଳ ବର୍ଷା ହୋଇଥିଲା। ବର୍ଷା ଯୋଗୁ ସେମାନେ ସାବେରୀ ନଦୀ କୂଳରେ ଥିବା ଗୁମ୍ଫା ଭିତରେ ଆଶ୍ରୟ ନେଇଥିଲେ। ଠିକ୍ ସେହି ସମୟରେ ମାଟି ଅତଡ଼ା ଖସିବାରୁ ଜୟଦେବ ଓ ତ୍ରିଲୋଚନ ଚାପି ହୋଇ ସେଠାରେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି। ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର ସହ ବ୍ୟବଚ୍ଛେଦ ପାଇଁ ପଠାଇଛି ଏବଂ ତଦନ୍ତ ଜାରି ରଖିଛି।
