ବିବାହ କରିବେ ପୁରୀ ଜିଲ୍ଲାପାଳ ସମର୍ଥ ବର୍ମା ଏବଂ ରାୟଗଡା ଜିଲ୍ଲାପାଳ ସ୍ୱଧାଦେବ ସିଂହ
ଭୁବନେଶ୍ୱର: ବିବାହ ବନ୍ଧନରେ ବାନ୍ଧି ହେବେ ଓଡ଼ିଶା କ୍ୟାଡରର ଆଉ ଦୁଇ ଆଇଏଏସ ଅଫିସର । ଅନନ୍ୟା ଦାସ ଏବଂ ଚଞ୍ଚଲ ରାଣାଙ୍କ ବିବାହ ପରେ ଏବେ ଏହି ଦୁଇ ଅଫିସରଙ୍କ ବିବାହକୁ ନେଇ ଚର୍ଚ୍ଚା ଜୋର ଧରିଛି । ଖୁବ ଶୀଘ୍ର ବିବାହ କରିବେ ପୁରୀ ଜିଲ୍ଲାପାଳ ସମର୍ଥ ବର୍ମା ଏବଂ ରାୟଗଡା ଜିଲ୍ଲାପାଳ ସ୍ୱଧାଦେବ ସିଂହ ।
ମେ ୨୧ ତାରିଖରେ ହେବ ଉଭୟଙ୍କର ବାହାଘର । ବାରଣସୀଠାରେ ପରସ୍ପରର ହାତ ଧରି ଜୀବନସାଥୀ ହେବେ । ସମର୍ଥ ବର୍ମା ଏବଂ ସ୍ୱଧାଙ୍କର ମଧ୍ୟ ଏହା ୨ୟ ବିବାହ । ସମର୍ଥ ପୂର୍ବରୁ ଭାରତୀୟ ରେଳବାଇ ଅଧିକାରୀ ସୂଚୀ ସିଂହଙ୍କୁ ବିବାହ କରିଥିଲେ । ସେହିପରି ବଲଙ୍ଗିର ଜିଲ୍ଲାପାଳ ଚଞ୍ଚଲ ରାଣାଙ୍କ ବିବାହ କରିଥିଲେ ସ୍ୱଧା । ଉଭୟ ଜିଲ୍ଲାପାଳଙ୍କର ବିବାହ ବିଚ୍ଛେଦ ଘଟିସାରିଛି ।
ଅଳ୍ପଦିନ ତଳେ ଚଞ୍ଚଲ ରାଣା ସମ୍ବଲପୁର ଜିଲ୍ଲାପାଳ ଅନନ୍ୟା ଦାସଙ୍କୁ ବିବାହ କରିଛନ୍ତି । ସେହିପରି ସମର୍ଥ ବର୍ମା ସମ୍ବଲପୁର ଜିଲ୍ଲାପାଳ ଥିବାବେଳେ ସୂଚିଙ୍କ ସହ ସମ୍ପର୍କରେ ଫାଟ ସୃଷ୍ଟି ହୋଇଥିଲା । ପରେ ତାଙ୍କର ବିବାହ ବିଚ୍ଛେଦ ଘଟିଥିଲା । ସୂଚୀ ଏବେ ଝାଡଖଣ୍ଡର ଜଣେ ଆଇଏଏସ ଅଫିସରଙ୍କୁ ବିବାହ କରିଛନ୍ତି ।
ଏଠି କହିରଖିବୁ, ସମର୍ଥ କାନପୁର ଆଇଆଇଟିର ଜଣେ ଇଞ୍ଜିନିୟର । ୨୦୧୦ ବ୍ୟାଚ ଆଇଏଏସ ଅଧିକାରୀ । ଏହା ପୂର୍ବରୁ ସେ କେନ୍ଦ୍ରାପଡା ଜିଲ୍ଲାପାଳ ଥିଲେ । ଏପରିକି ସେ ବିଏମସି କମିଶନର, ସମ୍ବଲପୁର ଜିଲ୍ଲାପାଳ, ରାୟଗଡାର ପିଡି ଡିଆରଡିଏ ଭାବେ ମଧ୍ୟ କାମ କରିଥିଲେ । ସେହିପରି ସ୍ୱଧା ୨୦୧୩ ବ୍ୟାଚର ଆଇଏଏସ ଅଫିସର । ରାୟଗଡା ଜିଲ୍ଲାପାଳ ହେବା ପୂର୍ବରୁ ନୂଆପଡା ଜିଲ୍ଲାପାଳ ଏବଂ ରାଉରକେଲା ଅତିରିକ୍ତ ଜିଲ୍ଲାପାଳ ଦାୟିତ୍ୱ ଦେଇଥିଲେ ।
