ବେଆଇନ ଆର୍ଥିକ କାରବାର ମାମଲାରେ ଇମ୍ରାନଙ୍କ ବିରୋଧରେ ଏତଲା
ଇସଲାମାବାଦ: କ୍ଷମତାଚ୍ୟୁତ ହୋଇଥିବା ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀ ତଥା ପିଟିଆଇ ମୁଖ୍ୟ ଇମ୍ରାନ ଖାନଙ୍କ ଅଡୁଆ କ୍ରମାଗତ ଭାବେ ବଢିବାରେ ଲାଗିଛି । ପାକିସ୍ତାନ ଜାତୀୟ ତଦନ୍ତକାରୀ ସଂସ୍ଥା (FIA) ଏକ ବେଆଇନ ଆର୍ଥିକ କାରବାର ମାମଲାରେ ପିଟିଆଇ ମୁଖ୍ୟ ଇମ୍ରାନ ଖାନଙ୍କ ସମେତ ଅନ୍ୟ କିଛି ଦଳୀୟ କାର୍ଯ୍ୟକର୍ତ୍ତାଙ୍କୁ ମଧ୍ୟ ବୁକ କରିଥିବା ସୂଚନା ମିଳିଛି। ଏନେଇ ପାକିସ୍ତାନୀ ଗଣମାଧ୍ୟମରେ ଖବର ପ୍ରସାରିତ ହୋଇଥିଲେ ସୁଦ୍ଧା ଇମ୍ରାନଙ୍କ ଦଳ ପକ୍ଷରୁ କୌଣସି ସୂଚନା ମିଳି ପାରିନାହିଁ ।
ସ୍ଥାନୀୟ ଗଣମାଧ୍ୟମରେ ପ୍ରସାରିତ ଖବର ଅନୁସାରେ, ଇମ୍ରାନଙ୍କ ବିରୋଧରେ ଏତଲା ମଧ୍ୟ ଦାଖଲ ହୋଇଛି । ଇମ୍ରାନଙ୍କ ବ୍ୟତୀତ ଅନ୍ୟ କିଛି ବରିଷ୍ଠ ନେତା ମଧ୍ୟ ଏହି ଅଭିଯୋଗ ତାଲିକାରେ ଅନ୍ତର୍ଭୁକ୍ତ ରହିଛନ୍ତି । ଏତଲାରେ ଜାତୀୟ ତଦନ୍ତକାରୀ ସଂସ୍ଥା ଦର୍ଶାଇଛି ଯେ, ଅରବାଜ ଗ୍ରୁପ ନାମକ ଏକ କ୍ୟାପିଟାଲ ମାର୍କେଟିଂ କମ୍ପାନୀ ଇମ୍ରାନଙ୍କ ଦଳ ପିଟିଆଇକୁ ବିପୁଳ ପରିମାଣର ଅର୍ଥରାଶି ଏକ ସ୍ଥାନୀୟ ବ୍ୟାଙ୍କ ଦ୍ବାରା ପ୍ରେରଣ କରିଥିଲା । ତେବେ ଉକ୍ତ ମାର୍କେଟିଂ ସଂସ୍ଥା ବର୍ତ୍ତମାନ ଜାଲିଆତି ଅଭିଯୋଗରେ ଛନ୍ଦି ହୋଇଛି। ତେଣୁ ଉକ୍ତ ସଂସ୍ଥା ପୂର୍ବତନ ପ୍ରଧାନମନ୍ତ୍ରୀଙ୍କ ଦଳ ପିଟିଆଇକୁ ଏହି ଟଙ୍କା କେଉଁ ଆକାରରେ ଓ କିପରି ଦେଲା ତାହାର ତଦନ୍ତ ଆରମ୍ଭ କରିଛି ଜାତୀୟ ତଦନ୍ତକାରୀ ସଂସ୍ଥା ।
Federal Investigation Agency (FIA) has booked Pakistan Tehreek-e-Insaf (PTI) leaders including its chairman Imran Khan, the party’s financial team and a manager of a private bank in a prohibited funding case: Pak's The Express Tribune pic.twitter.com/anYuZU8maj
— ANI (@ANI) October 11, 2022
ସେହିପରି ତଦନ୍ତକାରୀ ସଂସ୍ଥାର ଅନ୍ୟ ଏକ ଅଭିଯୋଗ ଅନୁସାରେ, ଓ୍ବତନ କ୍ରିକେଟ କ୍ଲବର ଏକାଧିକ ଆକାଉଣ୍ଟରୁ ମଧ୍ୟ ଟଙ୍କା ସଂଗ୍ରହ କରିଛି ଇମ୍ରାନଙ୍କ ପାର୍ଟି । ଏହି ଘଟଣାରେ ଯେଉଁ ବ୍ୟାଙ୍କ ଦେଇ ଅର୍ଥ କାରବାର ହୋଇଛି ସେହି ବ୍ୟାଙ୍କର ପରିଚାଳକଙ୍କୁ ମଧ୍ୟ ଅଭିଯୋଗରେ ପକ୍ଷଭୂକ୍ତ କରିଛି ତଦନ୍ତକାରୀ ସଂସ୍ଥା । ଏହି ମାମଲାର ତଦନ୍ତ ଆଗେଇଲେ ଇମ୍ରାନ ଖାନ ଗିରଫ ହେବା ଭଳି ସ୍ଥିତି ସୃଷ୍ଟି ହେବାର ଅନୁମାନ କରାଯାଉଛି ।
