ଡେଙ୍ଗୁ, ମ୍ୟାଲେରିଆ ଏବଂ ଚିକେନଗୁନିଆ ସମୟରେ ଡାକ୍ତରଙ୍କ ବିନା ପରାମର୍ଶରେ ଖାଆନ୍ତୁ ନାହିଁ ମେଡିସିନ୍
ନୂଆଦିଲ୍ଲୀ: ସାଧାରଣତଃ ସେପ୍ଟେମ୍ବର, ଅକ୍ଟୋବର, ନଭେମ୍ବର ମାସରେ ଡେଙ୍ଗୁ, ମ୍ୟାଲେରିଆ ଏବଂ ଚିକେନଗୁନିଆ ବୃଦ୍ଧି ପାଇଥାଏ । ଏହି ମାସଗୁଡ଼ିକରେ ଡେଙ୍ଗୁ ମ୍ୟାଲେରିଆର ଅଧିକାଂଶ ଲୋକେ ଆକ୍ରାନ୍ତ ହୋଇଥାନ୍ତି । ଏପିରିକି ଏହି କାରଣରୁ ମଧ୍ୟ ଅନେକ ଲୋକଙ୍କ ଜୀବନ ମଧ୍ୟ ଚାଲିଯାଏ । ତେବେ ଏଭଳି ସମୟରେ ଡାକ୍ତରଙ୍କ ପରାମର୍ଶ ବିନା କୌଣସି ବି ମେଡିସିନ୍ ନ ଖାଇବାକୁ ପରାମର୍ଶ ଦେଇଛନ୍ତି ଡାକ୍ତର । କାରଣ ବଜାରରେ ଏପରି ଅନେକ ଔଷଧ ରହିଛି, ଯାହା ପ୍ଲେଟ୍ଲେଟ୍ ହ୍ରାସ କରିପାରେ ।
ନୂଆଦିଲ୍ଲୀର LNJP ହସ୍ପିଟାଲର ମେଡିକାଲ ନିର୍ଦ୍ଦେଶକ ଡ. ସୁରେଶ କୁମାର କହିଛନ୍ତି ଯେ, ଯଦି ଜଣେ ରୋଗୀ ଡେଙ୍ଗୁ, ମ୍ୟାଲେରିଆ ଏବଂ ଚିକେନଗୁନିଆ ଜ୍ୱରରେ ପୀଡିତ, ତେବେ ରୋଗୀର ପ୍ଲେଟଲେଟ୍ ହାର କମିଯାଏ ଏବଂ ଏପରି ପରିସ୍ଥିତିରେ ଯଦି ରୋଗୀ ବୃଫେନ୍ କିମ୍ବା ସ୍ପିରିନ୍ ଇତ୍ୟାଦି ଔଷଧ ସେବନ କରନ୍ତି, ତେବେ ପ୍ଲେଟଲେଟ୍ ହାର କମିଯାଏ । ଏହି କାରଣରୁ ରୋଗୀର ଅବସ୍ଥା ବିଗିଡି ଯିବା ସହ ଡାକ୍ତରଖାନାରେ ଭର୍ତ୍ତି ହେବାକୁ ପଡିଥାଏ ।
ଡ଼. ସୁରେଶ କୁମାର କହିଛନ୍ତି ଯେ, ସାଧାରଣ ଜ୍ୱରରେ ଆପଣ ପାରାସିଟାମଲ ନେଇପାରିବେ ଏବଂ ଯଦି ପ୍ଲେଟଲେଟ୍ କମିଯାଏ କିମ୍ବା ଆପଣଙ୍କର ଅନ୍ୟ କୌଣସି ସମସ୍ୟା ଥାଏ, ତେବେ ତୁରନ୍ତ ଡାକ୍ତରଙ୍କ ସହିତ ଯୋଗାଯୋଗ କରିବା ଉଚିତ୍ ।
ଡ. ସୁରେଶ କୁମାର ଆହୁରି ସୂଚନା ଦେଇଛନ୍ତି ଯେ, ବର୍ତ୍ତମାନ ଡେଙ୍ଗୁ, ମ୍ୟାଲେରିଆ ଏବଂ ଚିକେନଗୁନିଆ ରୋଗୀଙ୍କ ପାଇଁ LNJP ହସ୍ପିଟାଲରେ ଏକ ସ୍ୱତନ୍ତ୍ର ଜ୍ୱର ୱାର୍ଡ ପ୍ରତିଷ୍ଠା କରାଯାଇଛି । ଯେଉଁଥିରେ 40 ଶଯ୍ୟା ବିଶିଷ୍ଟ ବ୍ୟବସ୍ଥା ଅଛି ଏବଂ ଯଦି ରୋଗୀ ଅଧିକ ଗମ୍ଭୀର ଥାଆନ୍ତି, କାରଣ ଅନେକ ଥର ପ୍ଲେଟଲେଟ୍ ହ୍ରାସ କାରଣରୁ ରକ୍ତଚାପ ହ୍ରାସ ପାଇଥାଏ ଏବଂ ପରିସ୍ଥିତି ଗମ୍ଭୀର ହୋଇଯାଏ, ତେବେ ଏଭଳି ସ୍ଥିତି ପାଇଁ ଅଲଗା ଆଇସିୟୁର ମଧ୍ୟ ବ୍ୟବସ୍ଥା କରାଯାଇଛି ।
ଏହି ସମୟରେ ଡେଙ୍ଗୁ ମ୍ୟାଲେରିଆ କାରଣରୁ 11 ଜଣ ବୟସ୍କ ଏବଂ ଦୁଇ ପିଲାଙ୍କୁ ଦିଲ୍ଲୀର LNJP ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଥିମଧ୍ୟରୁ 9 ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ବର୍ତ୍ତମାନ ପର୍ଯ୍ୟନ୍ତ ଏହି କାରଣରୁ କୌଣସି ବ୍ୟକ୍ତିଙ୍କ ଜୀବନ ହାନୀ ଘଟିନାହିଁ ।
ଖାଦ୍ୟ ଏବଂ ପାନୀୟ ସମ୍ବନ୍ଧରେ ସୁରେଶ କୁମାର ମଧ୍ୟ ବିଶେଷ ନିର୍ଦ୍ଦେଶ ଦେଇଛନ୍ତି, ଏହି ଦିନରେ ଯେତେବେଳେ ଡେଙ୍ଗୁ ମ୍ୟାଲେରିଆ ଚିକେନଗୁନିଆ ଅତି ଶୀଘ୍ର ବ୍ୟାପିଥାଏ, ଲୋକମାନେ ମଧ୍ୟ ଖାଦ୍ୟର ଯତ୍ନ ନେବା ଉଚିତ୍ । ପ୍ରତ୍ୟେକ ବ୍ୟକ୍ତି ପ୍ରଚୁର ପାଣି ପିଇବା ଉଚିତ ଏବଂ ପରିଷ୍କାର ପରିଚ୍ଛନ୍ନତା ଉପରେ ମଧ୍ୟ ଧ୍ୟାନ ଦିଆଯିବା ଉଚିତ, ଯେପରି ଘରର କିମ୍ବା ଆଖପାଖରେ କୌଣସି ସ୍ଥାନରେ ଜଳ ଜମା ନ ହୁଏ ।
ଘରେ କୁଲରକୁ ସଫା ରଖନ୍ତୁ, ପାଣି ଜମା ହେବାକୁ ଦିଅନ୍ତୁ ନାହିଁ । ବାହାରେ ଖୋଲା ସ୍ଥାନରେ ଟାୟାର ପକାନ୍ତୁ ନାହିଁ । ଯଦି ଏପରି ଟାୟାର ଥାଏ, ତେବେ ସେଥିରେ ପାଣି ଜମା ରହିବାକୁ ଦିଅନ୍ତୁ ନାହିଁ । କାରଣ ଏଥିରେ ମଶାଙ୍କର ଲାର୍ଭା ସୃଷ୍ଟି ହୋଇଥାଏ ।
