ଖୁବ୍ ଶୀଘ୍ର ଆସିବ ‘ଆରଆରଆର’ର ସିକ୍ଵେଲ୍, ଏସ୍ଏସ୍ ରାଜାମୌଲିଙ୍କ ପିତା ଲେଖୁଛନ୍ତି କାହାଣୀ
ମୁମ୍ଵାଇ ୧୪।୧୧: ଏସ୍ ଏସ୍ ରାଜାମୌଲିଙ୍କ ନିର୍ଦ୍ଦେଶିତ ‘ଆରଆରଆର’ ଚଳିତ ବର୍ଷର ସୁପରହିଟ୍ ଚଳଚ୍ଚିତ୍ର ମଧ୍ୟରୁ ଅନ୍ୟତମ। ଏହି ଚଳଚ୍ଚିତ୍ରଟି ବିଶ୍ୱବ୍ୟାପୀ ଧମାଲ କରିଥିଲା। ‘RRR’ ମୁଖ୍ୟ ଭୂମିକାରେ ରାମ ଚରଣ ଏବଂ ଏନ୍ଟିଆର ଅଭିନୟ କରିଥିଲେ । ତାଙ୍କ ବ୍ୟତୀତ ଏହି ଚଳଚ୍ଚିତ୍ରରେ ଅଜୟ ଦେବଗନ୍, ଆଲିଆ ଭଟ୍ଟ ଏବଂ ଶ୍ରୀୟା ସାରନ୍ ଅଭିନୟ କରିଛନ୍ତି। ନିକଟରେ ଜାପାନରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ର ସେଠାରେ ତୃତୀୟ ସର୍ବାଧିକ ଆୟ କରିଥିବା ଭାରତୀୟ ଚଳଚ୍ଚିତ୍ର ହୋଇପାରିଛି।
‘RRR’ ର ସିକ୍ୱେଲ ବିଷୟରେ ଅନେକ ଖବର ଆସିଛି । କିନ୍ତୁ ବର୍ତ୍ତମାନ ରାଜାମୌଲି ଏହାକୁ ନିଶ୍ଚିତ କରିଛନ୍ତି। ଏବଂ ତାଙ୍କ ପିତା ଭି ବିଜୟେନ୍ଦ୍ର ପ୍ରସାଦ ଏହି କାହାଣୀ ଉପରେ କାମ କରୁଛନ୍ତି ବୋଲି କହିଛନ୍ତି। ‘ଆରଆରଆର’ର କାହାଣୀ ଦୁଇ ସ୍ୱାଧୀନତା ସଂଗ୍ରାମୀ ଆଲୁରି ସୀତାରାମ ରାଜୁ (ରାମ ଚରଣ) ଏବଂ କୋମାରାମ ଭୀମ (Jr NTR) କୁ ଘେରି ରହିଛି। ଏହି ଚଳଚ୍ଚିତ୍ର ସାରା ବିଶ୍ୱରେ ୧୧୦୦ କୋଟିରୁ ଅଧିକ ସଂଗ୍ରହ କରିଛି ।
ଇଣ୍ଡିଆ ଟୁଡେ ରିପୋର୍ଟ ଅନୁଯାୟୀ, ଚିକାଗୋରେ ଆୟୋଜିତ ଏକ କାର୍ଯ୍ୟକ୍ରମରେ ଏସ୍ ଏସ୍ ରାଜାମୌଲି କହିଛନ୍ତି ଯେ ମୋ ପିତା ମୋ ଚଳଚ୍ଚିତ୍ରର ପ୍ରତ୍ୟେକ କାହାଣୀର ଲେଖକ ଅଟନ୍ତି। ଆମେ RRR-୨ ବିଷୟରେ ଆଲୋଚନା କରୁଛୁ ଏବଂ ସେ ଏହାର କାହାଣୀ ଉପରେ କାମ କରୁଛନ୍ତି । ମାର୍ଚ୍ଚ ୨୫ ରେ ଭାରତର ସିନେମା ହଲରେ ‘RRR’ ମୁକ୍ତିଲାଭ କରିଥିଲା । ପରେ ଫିଲ୍ମଟି ନେଟଫ୍ଲିକ୍ସରେ ପ୍ରସାରିତ ହୋଇଥିଲା ।ଯେଉଁଠାରେ ଫିଲ୍ମଟି ଅନେକ ସପ୍ତାହ ଧରି ଟ୍ରେଣ୍ଡ ରହିଥିଲା ।
