ପଦ୍ମପୁର ଉପନିର୍ବାଚନରେ ବାଜି ମାରିଲା ବିଜେଡି, ୪୨,୦୬୫ ଭୋଟରେ ଜିତିଲେ ବର୍ଷା ସିଂହ ବରିହା
ପଦ୍ମପୁର: ପଦ୍ମପୁର ଉପନିର୍ବାଚନରେ ବାଜି ମାରିଲା ବିଜେଡି । ୪୨,୦୬୫ ଭୋଟରେ ଜିତିଲେ ବିଜେଡି ପ୍ରାର୍ଥିନୀ ବର୍ଷା ସିଂହ ବରିହା । ସେ ତାଙ୍କ ନିକଟତମ ପ୍ରତିନ୍ଦ୍ୱନ୍ଦ୍ୱୀ ବିଜେପି ପ୍ରାର୍ଥୀ ପ୍ରଦୀପ ପୁରୋହିତଙ୍କୁ ହରାଇ ପିନ୍ଧିଛନ୍ତି ବିଜୟିନୀ ମୁକୁଟ ।
ଶେଷ ରାଉଣ୍ଡ ଗଣତି ପରେ ବିଜେଡି ପ୍ରାର୍ଥିନୀ ବର୍ଷା ସିଂହ ବରିହା ୧୨୦୬୭୨ ଭୋଟ ପାଇଥିବାବେଳେ ବିଜେପି ପ୍ରାର୍ଥୀ ପ୍ରଦୀପ ପୁରୋହିତ ୭୮,୦୩୪ ଏବଂ କଂଗ୍ରେସ ପ୍ରାର୍ଥୀ ସତ୍ୟଭୂଷଣ ସାହୁ ପାଇଛନ୍ତି ୩୫୮୧ ଭୋଟ ।
ଏପଟେ ପରାଜୟକୁ ସ୍ୱୀକାର କରି ନେଇଛନ୍ତି ବିଜେପି ପ୍ରାର୍ଥୀ ପ୍ରଦୀପ ପୁରୋହିତ । କହିଲେ ଭାବନଠାରୁ ଅଧିକ ହୋଇଗଲା । ମୁଖ୍ୟମନ୍ତ୍ରୀଙ୍କ ପ୍ରତିଶ୍ରୁତିରେ ଭୁଲିଗଲେ ଭୋଟର । ତେଣୁ ବଦଳିଗଲା ଜନାଦେଶ । ଯାହା ବି ହେଉ, ମୁଖ୍ୟମନ୍ତ୍ରୀ ଦେଇଥିବା ତାଙ୍କ ପ୍ରତିଶ୍ରୁତି ପୂରଣ କରିବାକୁ ସେ ଅନୁରୋଧ କରିଛନ୍ତି ।
ଅନ୍ୟପକ୍ଷେ ଜନଦେଶକୁ ଦେଖିବା ପରେ ଭାବବିହ୍ୱଳ ହୋଇପଡ଼ିଛନ୍ତି । ପଦ୍ମପୁରବାସୀ ଉଚିତ ଜବାବ ଦେଇଛନ୍ତି ବୋଲି ସେ କହିଛନ୍ତି । ବିରୋଧୀଙ୍କ ବିଦେଶିନୀ ଆକ୍ଷେପ ହେଉ, ଜାତିଗତ ଆକ୍ଷେପ ହେଉ ସବୁର ଜବାବ ପଦ୍ମପୁରବାସୀ ଦେଇଛନ୍ତି ବୋଲି ସେ କହିଛନ୍ତି । ଏପରିକି ବାପାଙ୍କ ସ୍ୱପ୍ନ ପୂରଣ ହେଲା ବୋଲି କହି ସେ କାନ୍ଦି ପକାଇଥିଲେ ।
