ଆଭା ଯୋଜନାରେ ନୂଆ ହିତାଧିକାରୀ ସୃଷ୍ଟି କରିବାରେ ଓଡ଼ିଶାକୁ ମିଳିଲା ପ୍ରଥମ ପୁରସ୍କାର

ଭୁବନେଶ୍ୱର: ରୋଗୀଙ୍କୁ ସ୍ୱାସ୍ଥ୍ୟ ସେବା ଯୋଜନାରେ ସାମିଲ ନେଇ ଓଡ଼ିଶାକୁ ମିଳିଛି ଏକ ବଡ଼ ସଫଳତା । ଆୟୁଷ୍ମାନ ଭାରତ ସ୍ୱାସ୍ଥ୍ୟ ଆକାଉଣ୍ଟ (ଆଭା) ଯୋଜନାରେ ନୂଆ ହିତାଧିକାରୀ (ଆଇଡି) ସୃଷ୍ଟି କରିବାରେ ଓଡ଼ିଶା ସର୍ବଭାରତୀୟ ସ୍ତରରେ ପ୍ରଥମ ସ୍ଥାନ ହାସଲ କରିଛି । ରାଜ୍ୟମାନଙ୍କୁ କେନ୍ଦ୍ର ସରକାରଙ୍କ ତରଫରୁ ଦିଆଯାଇଥିବା ଧାର୍ଯ୍ୟ ଲକ୍ଷ୍ୟର ଦୁଇଗୁଣ ହାସଲ କରି ଓଡ଼ିଶା ଏହି ପୁରସ୍କାର ଲାଭ କରିଛି ।

ଓଡ଼ିଶାରେ ୨୧.୯୦ ଲକ୍ଷ ଆଭା ଆଇଡି ସୃଷ୍ଟି ପାଇଁ କେନ୍ଦ୍ର ସରକାର ଲକ୍ଷ୍ୟ ଧାର୍ଯ୍ୟ କରିଥିବା ବେଳେ ଓଡ଼ିଶା ୪୩,୬୧,୮୯୫ ଆଇଡି ସୃଷ୍ଟି କରି ରେକର୍ଡ କରିଛି । ଏନସିଡି ପୋର୍ଟାଲ, ଆରସିଏଚ ପୋର୍ଟାଲ, ଇ-ସଞ୍ଜିବନୀ, ପିଏମଏନଡିପି, ନିକ୍ଷା ପୋର୍ଟାଲରେ ଏହି ଆଇଡି ସୃଷ୍ଟି କରାଯାଉଛି । ତେବେ ଏହି ଆଇଡି ସୃଷ୍ଟି କରିବାରେ ଗୁଜରାଟ ଦ୍ୱିତୀୟ, ମଧ୍ୟପ୍ରଦେଶ ତୃତୀୟ ସ୍ଥାନ ଅଧିକାର କରିଛନ୍ତି । ଏହି କାର୍ଯ୍ୟକ୍ରମକୁ ସଫଳ କରିବା ପାଇଁ ରାଜ୍ୟ ସରକାରଙ୍କ ତରଫରୁ ମିଶନ୍ ମୋଡ଼ରେ କାର୍ଯ୍ୟ ଆରମ୍ଭ କରାଯାଇଥିଲା ।