ପଞ୍ଜାବରେ ଉଡ଼ିଲା ପାକିସ୍ତାନୀ ଡ୍ରୋନ୍: ଗୁଳି କରି ହଟାଇଲେ ବିଏସ୍ଏଫ୍ ଯବାନ, ସର୍ଚ୍ଚ ଅପରେସନ ଜାରି
ଚଣ୍ଡିଗଡ଼ : ପାକିସ୍ତାନ ଡ୍ରୋନକୁ ନେଇ ଆସିଲା ନୂଆ ତଥ୍ୟ । ପୁଣି ଭାରତ ଆକାଶରେ ଉଡ଼ିଲା ପାକିସ୍ତାନୀ ଡ୍ରୋନ । ପଞ୍ଜାବର ଗୁରୁଦାସପୁର ସେକ୍ଟରରେ ୨ ଟି ପାକିସ୍ତାନୀ ଡ୍ରୋନ ଉଡ଼ୁଥିବାର ଦେଖିବାକୁ ମିଳିଥିଲା ଯାହାକୁ ଗୁଳି କରି ହଟାଇଛନ୍ତି ସୁରକ୍ଷା ବଳ(BSF) । ଏନେଇ ସୂଚନା ଦେଇଛନ୍ତି ବିଏସ୍ଫ ଡିଆଇଜି ପ୍ରଭାକର ଯୋଶୀ ।
ବିଏସ୍ଫ ଡିଆଇଜି ପ୍ରଭାକର ଯୋଶୀ କହିଛନ୍ତି ଯେ, ରବିବାର ରାତି ପ୍ରାୟ ୧୦ଟା ୩୦ ମିନିଟ୍ ସମୟରେ ପାକିସ୍ତାନ ପଟୁ ଗୋଟିଏ ଡ୍ରୋନ ଉଡ଼ି ଆସି ଗୁରୁଦାସପୁରର କୋସ୍ଓ୍ୱାଲ ପୋଷ୍ଟରେ ଉଡ଼ୁଥିବାର ଦେଖିବାକୁ ମିଳିଥିଲା । ସଙ୍ଗେ ସଙ୍ଗେ ଡ୍ରୋନଟି ଉଡ଼ୁଥିବାର ଦେଖି ସୁରକ୍ଷାବଳ ଗୁଳି ଚାଳନା କରିଥିଲେ ଆଉ ଡ୍ରୋନଟି ପଳାଇଯାଇଥିଲା । ଏହାପରେ ରାତି ୧୨ଟା ସମୟରେ ଚନ୍ଦୁଓ୍ୱାଡଲାଠାରେ ଆାଉ ଗୋଟିଏ ଡ୍ରୋନ ଉଡ଼ୁଥିବାର ଦେଖିବାକୁ ମିଳିଥିଲା । ପରେ ବିଏସ୍ଏଫ୍ ଙ୍କ ଦ୍ୱାରା ଡେରା ବାବା ନାନକରେ ସର୍ଚ୍ଚ ଅପରେସନ ଆରମ୍ଭ ହୋଇଥିବା ବେଳେ ତାହା ଏବେ ମଧ୍ୟ ଜାରି ରହିଛି । ଏନେଇ ଅଧିକ ସୂଚନାକୁ ଅପେକ୍ଷା କରାଯାଇଛି ।
ତେବେ ଗତ ସେପ୍ଟେମ୍ବର ୧୨ ତାରିଖରେ ଗୁରୁଦାସପୁର ସେକ୍ଟର ଅନ୍ତର୍ଜାତୀୟ ସୀମାରେ ଉଡ଼ୁଥିବାର ଦେଖିବାକୁ ପାଇଥିଲେ ସୁରକ୍ଷାବଳ (ବିଏସଏଫ୍) ଗୁଳି କରି ହଟାଇ ଦେଇଥିଲେ ଫଳରେ ଡ୍ରୋନଟି ପାକିସ୍ତାନକୁ ଫେରି ଯାଇଥିଲା । ସେହିପରି ଗୁରୁଦାସପୁରର ଚକ୍ରି ପୋଷ୍ଟରେ ପାଖାପାଖି ପ୍ରାୟ ୨୫ ମିନିଟ ଧରି ଡ୍ରୋନଟି ଉଡ଼ିବା ପରେ ସୁରକ୍ଷା ବଳ ଗୁଳି ଚାଳନା କରି ହଟାଇଥିଲେ ।
