୧୦୦ କୋଟି କ୍ଲବରେ ସାମିଲ ହେଲା ସାଉଥ ସୁପରଷ୍ଟାର ଧନୁଷଙ୍କ ଫିଲ୍ମ ‘ସାର’
ଚେନ୍ନାଇ: ସାଉଥ ସୁପରଷ୍ଟାର ଧନୁଷଙ୍କ ଫିଲ୍ମ ‘ସାର’ ବକ୍ସଅଫିସରେ କମାଲ କରିଛି । ଖୁବ କମ ପ୍ରମୋସନ ସତ୍ତ୍ୱେ ଫିଲ୍ମଟି ବକ୍ସଅଫିସରେ ୧୦୦ କୋଟି କ୍ଲବରେ ସାମିଲ ହୋଇପାରିଛି । ଏହି ଫିଲ୍ମଟି ୧୭ ଫେବୃୟାରୀରେ ରିଲିଜ ହୋଇଥିବାବେଳେ କେବଳ ଭାରତ ନୁହେଁ ବରଂ ବିଦେଶରେ ମଧ୍ୟ ଭଲ ରେସପନ୍ସ ମିଳିଛି । ଫିଲ୍ମର କାହାଣୀ ୧୯୯୦ ମସିହାର ଶିକ୍ଷା ବ୍ୟବସ୍ଥା ବିରୋଧରେ ସ୍ୱର ଉତ୍ତୋଳନ କରିଥିବା ଜଣେ ବ୍ୟକ୍ତିଙ୍କ ବାବଦରେ ରହିଛି । ଏହି ଫିଲ୍ମରେ ଧନୁଷ ଜଣେ ପ୍ରଫେସର ଭୂମିକାରେ ଅଭିନୟ କରିଥିବାବେଳେ ଯିଏ ପାଠ ପଢ଼ିବାର ଢଙ୍ଗକୁ ବଦଳାଇବାକୁ ଚାହୁଁଛନ୍ତି । ତେବେ ଏହାପରେ ତାଙ୍କୁ କେଉଁ ସବୁ ସମସ୍ୟାର ସମ୍ମୁଖୀନ ହେବାକୁ ପଡୁଛି ତାହା ଫିଲ୍ମରେ ଦେଖିବାକୁ ମିଳିଛି ।
ଆଉ ଏହି ଫିଲ୍ମ ୧୦୦ କୋଟି କ୍ଲବରେ ସାମିଲ ହେବା ପରେ ଧନୁଷ ତାଙ୍କ ପ୍ରଶଂସକମାନଙ୍କୁ ଧନ୍ୟବାଦ ଜଣାଇଛନ୍ତି । ତାମିଲ-ତେଲୁଗୁ ଭାଷାରେ ନିର୍ମାଣ ହୋଇଥିବା ଏହି ଫିଲ୍ମର ନିର୍ଦ୍ଦେଶନା ଭାର ଭେଙ୍କି ଅଟଲୁରୀ ସମ୍ଭାଳିଥିବାବେଳେ ତାମିଲ ଭର୍ସନରେ ‘ଭାଥି’ ନାମରେ ଏହା ରିଲିଜ ହୋଇଛି । ତେଲୁଗୁ ଭର୍ସନରେ ଏହା ‘ସାର’ ନାମରେ ରିଲିଜ ହୋଇଛି । ଗତବର୍ଷ ମଧ୍ୟ ଧନୁଷଙ୍କ ଅଭିନୀତ ଫିଲ୍ମ ‘ଥିରୁଚିତ୍ରାମବଲମ୍ୱ’ ମଧ୍ୟ ୧୦୦ କୋଟି କ୍ଲବରେ ସାମିଲ ହୋଇଥିଲା । ଏହା ଛଡା ଫିଲ୍ମ ‘ଅସୁରନ’ ମଧ୍ୟ ୧୦୦ କୋଟି କ୍ଲବରେ ସାମିଲ ହୋଇଥିଲା ।
