ସିୟୁଇଟି ପରୀକ୍ଷା ଢାଞ୍ଚାରେ ପରିବର୍ତ୍ତନ କଲା ୟୁଜିସି

ଏନେଇ ୟୁଜିସି ଅଧ୍ୟକ୍ଷ ଏମ. ଜଗଦୀଶ କୁମାର ଏକ ସାକ୍ଷାତକାରରେ କହିଛନ୍ତି, ଗତ ବର୍ଷ ୟୁଜିସି ପକ୍ଷରୁ ସିୟୁଇଟି ଶୁଭାରମ୍ଭ କରାଯାଇଥିଲା । ଚଳିତ ବର୍ଷ ପରୀକ୍ଷାର ଦ୍ୱିତୀୟ ସଂସ୍କରଣ ହୋଇଥିବା ବେଳେ ଏନେଇ ୟୁଜିସି ପକ୍ଷରୁ କିଛି ନିଷ୍ପତ୍ତି ନିଆଯାଇଛି । ଚଳିତ ବର୍ଷ ପରୀକ୍ଷା ପ୍ୟାଟର୍ଣ୍ଣ ଗତବର୍ଷ ପରି ସମାନ ରହିବ ମାତ୍ର ଏଥର ପିଲାଙ୍କୁ କିଛି ଅଧିକ ସ୍ୱାଧୀନତା ଦିଆଯିବା ସହ ଅଧିକ ଚଏସ୍ ଦିଆଯିବ । ଗତବର୍ଷ ପିଲାମାନେ ୯ଟି ବିଷୟରେ ପରୀକ୍ଷା ଦେଇ ପାରୁଥିଲେ । ମାତ୍ର ଏଥର ସେମାନେ ୧୦ଟି ପେପର ବାଛିବାର ସୁବିଧା ପାଇ ପାରିବେ ।

ସୂଚନାଯୋଗ୍ୟ ଯେ, ସାରା ଦେଶରେ କେନ୍ଦ୍ରୀୟ ବିଶ୍ୱବିଦ୍ୟାଳୟଗୁଡ଼ିକରେ ଅଣ୍ଡର ଗ୍ରାଜୁଏଟ କୋର୍ସରେ ନାମଲେଖାଇବା ପାଇଁ ସିୟୁଇଟି ୨୦୨୩ ପରୀକ୍ଷା ପାଇଁ ଆବେଦନ ଜାରି ରହିଛି । ସିୟୁଇଟି ସ୍କୋର ଆଧାରରେ ହିଁ ପିଲାଙ୍କୁ ନିଜ ପସନ୍ଦର ୟୁନିଭରସିଟି ଓ କୋର୍ସରେ ପ୍ରବେଶ ଅନୁମତି ମିଳିବ । ଚଳିତ ବର୍ଷ ପରୀକ୍ଷାର ଦ୍ୱିତୀୟ ସଂସ୍କରଣ ହୋଇଥିବା ବେଳେ ଛାତ୍ରଛାତ୍ରୀଙ୍କ ସୁବିଧା ପାଇଁ ପ୍ୟାଟର୍ଣ୍ଣରେ ସାମାନ୍ୟ ପରିବର୍ତ୍ତନ କରାଯାଇଛି ।