ଅଭିନେତ୍ରୀ ଜିୟା ଖାନ ଆତ୍ମହତ୍ୟା ଘଟଣାରେ ଅଭିନେତା ସୂରଜ ପାଞ୍ଚୋଲି ନିର୍ଦ୍ଦୋଷରେ ଖଲାସ

ନୂଆଦିଲ୍ଲୀ: ବଲିଉଡ ଅଭିନେତ୍ରୀ ଜିୟା ଖାନ ଆତ୍ମହତ୍ୟା ଘଟଣାରେ ଅଭିନେତା ସୂରଜ ପାଞ୍ଚୋଲି ନିର୍ଦ୍ଦୋଷରେ ଖଲାସ ହୋଇଛନ୍ତି । ମୁମ୍ବାଇର ସ୍ପେଶାଲ ସିବିଆଇ କୋର୍ଟ ଦୀର୍ଘ ୧୦ ବର୍ଷ ପରେ ଆଜି ଅନ୍ତିମ ଶୁଣାଣି କରିଛନ୍ତି । ଜିଆ-ସୂରଜ ପରସ୍ପରକୁ ଡେଟ୍ କରୁଥିବା ବେଳେ ଆତ୍ମହତ୍ୟା ପୂର୍ବରୁ ଜିଆ ଏକ ନୋଟ୍ ଛାଡ଼ି ଯାଇଥିଲେ । ସେଥିରେ ସୂରଜ ଜିୟାଙ୍କ ସହିତ ପ୍ରତାରଣା କରିଥିବା ଲେଖାଥିଲା । ତେବେ ଜିଆଙ୍କ ମାଆ ରାବିୟାଙ୍କ ଅଭିଯୋଗ ଅନୁସାରେ ସୂରଜଙ୍କୁ ପ୍ରଥମେ ଗିରଫ କରାଯାଇଥିଲେ ହେଁ ପରେ ତାଙ୍କୁ ହାଇକୋର୍ଟରୁ ଜାମିନ ମିଳିଯାଇଥିଲା ।

ଗତ ୨୦୧୩ ମସିହା ଜୁନ ୩ ତାରିଖରେ ଅଭିନେତ୍ରୀ ଜିୟା ଆତ୍ମହତ୍ୟା କରିଥିଲେ । ତାଙ୍କୁ ଆତ୍ମହତ୍ୟା କରିବାକୁ ଉସୁକାଇଥିବା ନେଇ ସୂରଜଙ୍କ ବିରୋଧରେ ମାମଲା ଦାୟର ହୋଇଥିଲା । ତେବେ ଆଜିର କୋର୍ଟଙ୍କ ନିଷ୍ପତ୍ତିରେ ରାବିୟା ଅସନ୍ତୋଷ ପ୍ରକାଶ କରିଛନ୍ତି । ୧୦ ବର୍ଷ ଧରି ଝିଅକୁ ନ୍ୟାୟ ଦେବାକୁ ଲଢ଼େଇ କରିଆସିଥିବା ମାଆ ରାବିୟା ଶେଷରେ ହାରି ଯାଇଛନ୍ତି । ଉପଯୁକ୍ତ ପ୍ରମାଣ ଅଭାବରୁ ସୂରଜଙ୍କୁ ନିର୍ଦ୍ଦୋଷରେ ଖଲାସ କରାଯାଇଥିବା କୋର୍ଟ କହିଛନ୍ତି ।