ସମ୍ବଲପୁରରେ ମହାନଦୀ ଟ୍ରିବ୍ୟୁନାଲ ସଦସ୍ୟ, ହୀରାକୁଦ ବନ୍ଧ ବୁଲି ଦେଖିଲେ
ସମ୍ବଲପୁର: ମହାନଦୀ ଜଳବିବାଦ ଟ୍ରିବ୍ୟୁନାଲ ପକ୍ଷରୁ ସୁପ୍ରିମକୋର୍ଟର ବିଚାରପତି ଜଷ୍ଟିସ ଏ. ଏମ. ଖାନଓ୍ୱିଲକରଙ୍କ ନେତୃତ୍ୱରେ ଶନିବାର ସମ୍ବଲପୁର ଜିଲ୍ଲା ହୀରାକୁଦ ବନ୍ଧର କ୍ଷେତ୍ର ପରିଦର୍ଶନ କରିଛନ୍ତି। ମହାନଦୀ ଜଳ ବଣ୍ଟନକୁ ନେଇ ଓଡ଼ିଶା ଓ ଛତିଶଗଡ଼ ମଧ୍ୟରେ ଲାଗି ରହିଥିବା ବିବାଦ ମଧ୍ୟରେ ଏପରି ଏକ ଗସ୍ତ ହୋଇଛି। ଟ୍ରିବ୍ୟୁନାଲ ସଦସ୍ୟମାନେ ତୃଣମୂଳସ୍ତରରେ ସ୍ଥିତି ଅନୁଧ୍ୟାନ କରି ପ୍ରତ୍ୟକ୍ଷ ତଥ୍ୟ ସଂଗ୍ରହ କରିବା ଏହି ଗସ୍ତର ଉଦ୍ଦେଶ୍ୟ।
ଜଷ୍ଟିସ ଖାନଓ୍ୱିଲକରଙ୍କ ସହ ପାଟନା ଓ ଦିଲ୍ଲୀ ହାଇକୋର୍ଟର ବିଚାରପତି ଯଥାକ୍ରମେ ଡକ୍ଟର ରବି ରଞ୍ଜନ ଓ ଇନ୍ଦରମିତ କୌର କୋଚ୍ଚର ଉପସ୍ଥିତ ଅଛନ୍ତି। ଜଳ ବଣ୍ଟନ ବିବାଦର ସମାଧାନ ପାଇଁ କେନ୍ଦ୍ର ସରକାର ୨୦୧୮ରେ ଏହି ତିନି ଜଣିଆ ଟ୍ରିବ୍ୟୁନାଲ ଗଠନ କରିଥିଲେ। ଟ୍ରିବ୍ୟୁନାଲ ସଦସ୍ୟଙ୍କ ସହ ଜଳସମ୍ପଦ ବିଭାଗର ଅଧିକାରୀ, ବୈଷୟିକ ଟିମ୍, ଉଭୟ ଓଡ଼ିଶା ଓ ଛତିଶଗଡ଼ର ଆଇନ ବିଶେଷଜ୍ଞମାନେ ମଧ୍ୟ ଏହି ଗସ୍ତରେ ସାମିଲ ଥିଲେ। ସେମାନଙ୍କର ଉଦ୍ଦେଶ୍ୟ ଥିଲା ହୀରାକୁଦ ବନ୍ଧକୁ ଅତି ନିକଟରୁ ଅନୁଧ୍ୟାନ କରିବା ଏବଂ ଏହି ଅଞ୍ଚଳରେ ଜଳ ପ୍ରବାହର ବ୍ୟାପକ ଅନୁଧ୍ୟାନ କରିବା।
ଦଶ ଦିନିଆ କ୍ଷେତ୍ର ପରିଦର୍ଶନ ସମୟରେ ଏହି ଟିମ୍ ପ୍ରାୟ ୩୦ଟି ସ୍ଥାନ ପରିଦର୍ଶନ କରିବାର ସୂଚନା ରହିଛି। ସେମାନଙ୍କର ଆଗାମୀ କାର୍ଯ୍ୟକ୍ରମ ମଧ୍ୟରେ ଚିପିଲିମା ପାଓ୍ୱାର ହାଉସ, ଅତାବିରା ଶାଖା କେନାଲ, ଶାସନ କେନାଲ, ଇବ ଥର୍ମାଲ ପାଓ୍ୱାର ଷ୍ଟେସନ ଏବଂ ଝାରସୁଗୁଡା ଓ ସୁନ୍ଦରଗଡର ଡ୍ୟାମ ପ୍ରକଳ୍ପ ସ୍ଥାନ ପରିଦର୍ଶନ କରାଯିବ। ଏଥିସହ ନୂଆପଡା ଜିଲ୍ଲାର ଉପର ଜୋଙ୍କ ଡ୍ୟାମକୁ ମଧ୍ୟ ଟ୍ରିବ୍ୟୁନାଲ ପରିଦର୍ଶନ କରିବାକୁ ଯୋଜନା କରିଛନ୍ତି। ଓଡ଼ିଶା ଗସ୍ତ ପୂର୍ବରୁ ଟ୍ରିବ୍ୟୁନାଲ ଛତିଶଗଡ଼ର କଲମା ବ୍ୟାରେଜ ଓ କେଲୋ ପ୍ରକଳ୍ପର କ୍ଷେତ୍ର ପରିଦର୍ଶନ କରିଥିଲେ।
ଉଲ୍ଲେଖଯୋଗ୍ୟ, ଟ୍ରିବ୍ୟୁନାଲର କ୍ଷେତ୍ର ପରିଦର୍ଶନର ଠିକ୍ ପୂର୍ବରୁ ଛତିଶଗଡ଼ କଲମା ବ୍ୟାରେଜର ୧୭ଟି ଗେଟ୍ ଖୋଲି ସ୍ଥିତି ଅନୁଧ୍ୟାନ କରିଥିଲା। ମହାନଦୀ ନଦୀ ଜଳ ବିବାଦ ଟ୍ରିବ୍ୟୁନାଲ ଦ୍ୱାରା କରାଯାଇଥିବା କ୍ଷେତ୍ର ପରିଦର୍ଶନ ଓ ସର୍ଭେ ଜଳ ପ୍ରବାହ ଓ ଭିତ୍ତିଭୂମି ସମ୍ପର୍କରେ ବ୍ୟାପକ ତଥ୍ୟ ସଂଗ୍ରହ କ୍ଷେତ୍ରରେ ଗୁରୁତ୍ୱପୂର୍ଣ୍ଣ। ଏହି ତଥ୍ୟ ଓଡ଼ିଶା ଓ ଛତିଶଗଡ଼ ମଧ୍ୟରେ ଜଳ ବଣ୍ଟନ ବିବାଦକୁ ଭଲ ଭାବେ ବୁଝିବାରେ ସହାୟକ ହେବ, ଶେଷରେ ଟ୍ରିବ୍ୟୁନାଲକୁ ସୁଚିନ୍ତିତ ନିଷ୍ପତ୍ତି ନେବାରେ ଏବଂ ଦୀର୍ଘଦିନର ସମସ୍ୟାର ସମାଧାନ କରିବାରେ ସହାୟକ ହେବ।
