ଗାଙ୍ଗୁଲି : ବର୍ତ୍ତମାନ ଟାଟା ଏବଂ ମିତ୍ତଲଙ୍କ ସହ ହେବ ପ୍ରତିଯୋଗିତା

ଭାରତୀୟ କ୍ରିକେଟର ସବୁଠାରୁ ସଫଳ ଅଧିନାୟକଙ୍କ ମଧ୍ୟରେ ସୌରଭ ଗାଙ୍ଗୁଲିଙ୍କୁ ଗଣନା କରାଯାଏ । ସେ ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡର ସଭାପତି ମଧ୍ୟ ରହିଛନ୍ତି । ଭାରତୀୟ କ୍ରିକେଟର ପୂର୍ବତନ ଅଧିନାୟକ ତଥା ପ୍ରଶାସକ ସୌରଭ ଗାଙ୍ଗୁଲି ବର୍ତ୍ତମାନ ଏକ ନୂଆ କାର୍ଯ୍ୟ ଆରମ୍ଭ କରିବାକୁ ଯାଉଛନ୍ତି । ତାଙ୍କର ଏହି ଇନିଂସ କ୍ରିକେଟ୍ ପଡ଼ିଆରେ ନୁହେଁ ବରଂ ବ୍ୟବସାୟ ପଡ଼ିଆରେ ହେବ ।

ସୂଚନା ଅନୁସାରେ : ସ୍ପେନର ମାଡ୍ରିଡରେ ଅନୁଷ୍ଠିତ ହୋଇଥିବା ବେଙ୍ଗଲ ଗ୍ଲୋବାଲ ବିଜନେସ ସମିଳନୀରେ ଗାଙ୍ଗୁଲି ଏହି ସପ୍ତାହରେ ତାଙ୍କର ନୂତନ କାର୍ଯ୍ୟ ଆରମ୍ଭ କରିବେ ବୋଲି ଘୋଷଣା କରିଛନ୍ତି। ସେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ଆସିଥିବା ପ୍ରତିନିଧୀ ମଣ୍ଡଳର ଏକ ଅଂଶ ଅଟନ୍ତି । ମୁଖ୍ୟମନ୍ତ୍ରୀ ମମତା ବାନାର୍ଜୀ ବର୍ତ୍ତମାନ ତାଙ୍କ ରାଜ୍ୟରେ ପୁଞ୍ଜି ବିନିଯୋଗକୁ ଆକର୍ଷିତ କରିବା ପାଇଁ 12 ଦିନିଆ ବିଦେଶ ଗସ୍ତରେ ଯିବେ । ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସ୍ପେନ ଏବଂ ଦୁବାଇ ଗସ୍ତରେ ସୌରଭ ଗାଙ୍ଗୁଲି ମଧ୍ୟ ତାଙ୍କ ସହ ଅଛନ୍ତି । ସେପଟେ ଗାଙ୍ଗୁଲି କହିଛନ୍ତି ଯେ, ସେ ରାଜ୍ୟର ପଶ୍ଚିମ ମେଦିନୀପୁର ଜିଲ୍ଲାର ସାଲବୋନୀରେ ଏକ ଇସ୍ପାତ କାରଖାନା ସ୍ଥାପନ କରିବାକୁ ଯାଉଛନ୍ତି। ଏହି ଇସ୍ପାତ ଶିଳ୍ପ ଏବେ ଟାଟା ଏବଂ ମିତ୍ତଲଙ୍କ ସହ ପ୍ରତିଦ୍ୱନ୍ଦ୍ୱିତା କରିବେ । କୁହାଯାଉଛି ଯେ, ପଶ୍ଚିମବଙ୍ଗରେ ଏହା ତାଙ୍କର ତୃତୀୟ ଇସ୍ପାତ କାରଖାନା ହେବ। ସେ 2007 ରେ ପ୍ରଥମ ଶିଳ୍ପ କାର୍ଯ୍ୟ ଆରମ୍ଭ କରିଥିଲେ । ନୂତନ କାରଖାନା ଆସନ୍ତା 6-7 ମାସ ମଧ୍ୟରେ କାର୍ଯ୍ୟ ଆରମ୍ଭ ହେବ ଏବଂ ଏହାର ଏକ ବର୍ଷ ପରେ ପ୍ରସ୍ତୁତ ହେବ ।

ସୂଚନାଯୋଗ୍ୟ ଯେ, ପୂର୍ବତନ କ୍ରିକେଟର ସୌରଭ ଗାଙ୍ଗୁଲି ଏକ ବ୍ୟବସାୟ ପରିବାରରୁ ଆସିଛନ୍ତି । ତାଙ୍କ ଜେଜେବାପା 50-55 ବର୍ଷ ପୂର୍ବେ ପଶ୍ଚିମବଙ୍ଗରେ ପାରିବାରିକ ବ୍ୟବସାୟ ଆରମ୍ଭ କରିଥିଲେ । ଭାରତୀୟ କ୍ରିକେଟର ବଡ ଖେଳାଳିଙ୍କ ମଧ୍ୟରେ ସୌରଭ ଗାଙ୍ଗୁଲିଙ୍କୁ ଗଣନା କରାଯାଉଛି । ଭାରତୀୟ କ୍ରିକେଟ ଦଳର ସଫଳତାରେ ତାଙ୍କର ପ୍ରମୁଖ ଅବଦାନ ରହିଛି ବୋଲି ବିବେଚନା କରାଯାଏ। ସେ ତାଙ୍କ ସମୟରେ ଜଣେ ବଡ ତାରକା ଥିଲେ ଏବଂ କ୍ରିକେଟ ବ୍ୟତୀତ ସେ ବ୍ରାଣ୍ଡ ଏଣ୍ଡୋର୍ସମେଣ୍ଟ ଇତ୍ୟାଦିରୁ ବହୁତ ରୋଜଗାର କରିଥିଲେ । ଏକ ଆକଳନରେ ଜଣାପଡିଛି ଯେ, ଗାଙ୍ଗୁଲିଙ୍କ ପାଖରେ ବର୍ତ୍ତମାନ ପ୍ରାୟ 85 ନିୟୁତ ଡଲାରର ସମ୍ପତ୍ତି ରହିଛି, ଯାହା ଭାରତୀୟ ମୁଦ୍ରାରେ ପ୍ରାୟ 700 କୋଟି ଟଙ୍କା ଅଟେ।