ରାଜସ୍ଥାନ, ମଧ୍ୟପ୍ରଦେଶ ଏବଂ ଛତିଶଗଡ଼ରେ ବିଜେପି ପର୍ଯ୍ୟବେକ୍ଷକଙ୍କ ନାମ ଘୋଷଣା କରିଛି
ରାଜସ୍ଥାନ, ମଧ୍ୟପ୍ରଦେଶ ଏବଂ ଛତିଶଗଡ଼ରେ ବିଜେପି ପର୍ଯ୍ୟବେକ୍ଷକଙ୍କ ନାମ ଘୋଷଣା କରିଛି। ୩ ରାଜ୍ୟର ପର୍ଯ୍ୟବେକ୍ଷକମାନେ ସକାଳୁ ନିଜ ନିଜ ରାଜ୍ୟରେ ପହଞ୍ଚିଯିବେ। ସେଠାରେ ଆସନ୍ତାକାଲି ଅର୍ଥାତ୍ ଶନିବାର ବିଧାୟକ ଦଳର ବୈଠକ ବସିବ ଏବଂ ସନ୍ଧ୍ୟା ସୁଦ୍ଧା ୩ ରାଜ୍ୟର ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରାଯାଇପାରେ ବୋଲି ଅନୁମାନ କରାଯାଉଛି।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ବିନୋଦ ତାୱଡେ ଓ ସରୋଜ ପାଣ୍ଡେଙ୍କୁ ରାଜସ୍ଥାନର ପର୍ଯ୍ୟବେକ୍ଷକ କରାଯାଇଛି। ହରିୟାଣା ସିଏମ୍ ମନୋହର ଲାଲ ଖଟର, କେ. ଲକ୍ଷ୍ମଣ ଓ ଆଶା ଲକଡ଼ାଙ୍କୁ ମଧ୍ୟପ୍ରଦେଶର ଦାୟିତ୍ୱ ଦିଆଯାଇଛି। ସେହିପରି ଛତିଶଗଡ଼ ପାଇଁ ଅର୍ଜୁନ ମୁଣ୍ଡା, ସର୍ବାନନ୍ଦ ସୋନୋୱାଲ ଓ ଦୁଷ୍ୟନ୍ତ ଗୌତମଙ୍କୁ ଚୟନ କରାଯାଇଛି।
ଏହି ପର୍ଯ୍ୟବେକ୍ଷକମାନେ ବିଧାୟକ ଦଳର ବୈଠକରେ ବିଧାୟକମାନଙ୍କ ମତାମତ ନେବେ। ଅନୁମୋଦନ ପରେ ୩ ରାଜ୍ୟର ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରାଯିବ। ନିକଟରେ ଶେଷ ହୋଇଥିବା ବିଧାନସଭା ନିର୍ବାଚନରେ ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡ଼ରେ ବିଜେପି ବିପୁଳ ବିଜୟ ହାସଲ କରିଛି। ଏହି ରାଜ୍ୟଗୁଡିକରେ କଂଗ୍ରେସ ପରାଜୟର ସମ୍ମୁଖୀନ ହୋଇଛି।
