ପ୍ରବଳ ବର୍ଷା ଯୋଗୁଁ ଜଳବନ୍ଦୀ ମାୟା ନଗରୀ ମୁମ୍ବାଇ
ବର୍ଷା କାରଣରୁ ମୁମ୍ବାଇ ହୋଇଛି ଜଳାର୍ଣ୍ଣବ । ରାଜପଥ ଠାରୁ ରେଳଧାରଣା, ଦୋକାନବଜାର, ବସ୍ତିରେ ପଶିଛି ପାଣି । ଯାହାଫଳରେ ଅସ୍ତବ୍ୟସ୍ତ ହୋଇଛି ଜନଜୀବନ । ରାଜରାସ୍ତା ତଥା ରେଳଧାରଣାରେ ପାଣି ଭର୍ତ୍ତି ହୋଇଯାଇଥିବାରୁ ଯାନବାହନ ସହ ରେଳ ଚଳାଚଳ ହୋଇଛି ବାଧାପ୍ରାପ୍ତ । ରାସ୍ତାରେ ଗାଡ଼ି ମୋଟର ଅଟକି ରହିବା ସହ ଲୋକମାନେ ଅଣ୍ଟାଏ ପାଣିରେ ରାସ୍ତା ପାରି ହେଉଥିବା ଦେଖିବାକୁ ମିଳିଛି। ସମସ୍ତ ସରକାରୀ, ବେସରକାରୀ ଏବଂ ମ୍ୟୁନିସିପାଲ ସ୍କୁଲ ଏବଂ କଲେଜଗୁଡ଼ିକ କରାଯାଇଛି ଛୁଟି ଘୋଷଣା । ଯଦି ଦୁଇ ଘଣ୍ଟାରୁ ଅଧିକ ବର୍ଷା ବନ୍ଦ ହୋଇଯାଏ, ତେବେ ଜଳସ୍ତର କମିଯିବ ବୋଲି କହିଛନ୍ତି ଅଧିକାରୀମାନେ । କିନ୍ତୁ ପାଣିପାଗ ବିଭାଗ ସୂଚନା ଅନୁସାରେ ଆଜି ମୁମ୍ବାଇରେ ପ୍ରବଳରୁ ଅତି ପ୍ରବଳ ବର୍ଷା ହେବାର ରହିଛି ସମ୍ଭାବନା । ଭାରତ ପାଣିପାଗ ବିଭାଗ ମୁମ୍ବାଇ, ଥାନେ, ପାଲଘର ଏବଂ କୋଙ୍କଣ ବେଲ୍ଟକୁ କମଳା ସତର୍କତା ଜାରି କରିଛି।
