ଖୋଜୁଥିଲେ ଗଞ୍ଜେଇ, ମିଳିଲା ଦେଢ଼ କ୍ୱିଣ୍ଟାଲରୁ ଅଧିକ ରୁପା
କାରର ସିକ୍ରେଟ ଚାମ୍ବରରୁ ଖୋଜୁଥିଲେ ଗଞ୍ଜେଇ, ମିଳିଲା ବିପୁଳ ପରିମାଣର ରୂପା। ସମ୍ବଲପୁର ରେଙ୍ଗାଲି ଅଞ୍ଚଳରେ ଦେଢ଼ କ୍ୱିଣ୍ଟାଲରୁ ଅଧିକ ରୁପା ଜବତ । ଜବତ ରୁପାର ମୂଲ୍ୟ ଦେଢ଼ କୋଟି ଟଙ୍କା ହେବା ଅନୁମାନ କରାଯାଉଛି ।ଏକ ଗାଡ଼ିରେ ଗଞ୍ଜେଇ ଚାଲାଣ ହେଉଥିବା ନେଇ ଖବର ପାଇଥିଲା ଅବକାରୀ ବିଭାଗ । ଗଞ୍ଜେଇ ଚାଲାଣ ସନ୍ଦେହରେ ଅବକାରୀ ବିଭାଗ କାର୍ ଅଟକାଇ ଥିଲା। ହେଲେ ସେହି କାର୍ର ସିକ୍ରେଟ୍ ଚ୍ୟାମ୍ୱରରୁ ମିଳିଲା କ୍ୱିଣ୍ଟାଲ୍ରୁ ଅଧିକ ରୁପା ଅଳଙ୍କାର। ଏପରି ଚିତ୍ର ସମ୍ବଲପୁର-ଝାରସୁଗୁଡା ବିଜୁ ଏକ୍ସପ୍ରେସ୍ ୱେ’ରେ ଦେଖିବାକୁ ମିଳିଛି। ଏହି ରୁପା ଅଳଙ୍କାର ମହାରାଷ୍ଟ୍ରରୁ ଝାରଖଣ୍ଡକୁ ଯାଉଥିବା ଜଣାପଡ଼ିଛି
ସୂଚନା ଅନୁସାରେ ରେଙ୍ଗାଲି ଝୁରିପଡା ନିକଟରେ ଚୋରା ଗଞ୍ଜେଇ ଧରିବା ପାଇଁ ଅବକାରୀ ବିଭାଗ ଜଗି ରହିଥିଲା । ଏହି ସମୟରେ MH14H1693 ନମ୍ବର ବିଶିଷ୍ଟ ଏକ କାର ଯାଉଥିବେଳେ ସନ୍ଦେହ ହେବାରୁ ଅବକାରୀ ବିଭାଗ ଗାଡି ଯାଂଚ କରିଥିଲା । ଫଳରେ ସିକ୍ରେଟ ଚାମ୍ବରରୁ ରୂପାର ପାଇଁଜି, ଝୁମକା, ରୂପାର ମୂର୍ତ୍ତି, ରୂପାର ଗ୍ଲାସ ବିପୁଳ ପରିମାଣର ଜବତ ହୋଇଛି । ଜବତ ରୂପାକୁ ଜିଏସଟି ବିଭାଗ ଜବତ କରି ନିଜ ଅଫିସକୁ ଆଣି ଓଜନ କରିବା ପରେ ତାହା ୧କ୍ବିଣ୍ଟାଲ ୬୫ କେଜି ବାହାରିଥିଲା । ଏହି ଘଟଣାରେ ଗୋଟିଏ କାର୍, ୩ଜଣ ଚାଲାଣକାରୀକୁ ଜିଏସଟି ବିଭାଗ ଅଟକ ରଖି ପଚରା ଉଚୁରା ଜାରି ରଖିଛି । ଏହି ଜବତ ରୂପା ସବୁ ମହାରାଷ୍ଟ୍ରରୁ ରାଂଚି ଚୋରାଚାଳାଣ ହେଉଥିଲା ବୋଲି ଜଣାପଡିଛି। ଓଜନ ପରେ ଏହାକୁ ସମ୍ବଲପୁର ଟ୍ରେଜେରୀରେ ଜମା ଦିଆଯିବ ବୋଲି କହିଛନ୍ତି ସିଟି ଜିଏସଟି ଡେପୁଟି କମିଶନର ଟେକଚାନ୍ଦ ମେହେର।
