ସୁପ୍ରିମକୋର୍ଟରେ ବୁଧବାର ଓ ଗୁରୁବାର ନିୟମିତ ଶୁଣାଣି ହେଉ ଥିବା ମାମଲାର ସୂଚୀବଦ୍ଧ କରାଯିବ ନାହିଁ
ଭାରତର ପ୍ରଧାନ ବିଚାରପତି ଦାୟିତ୍ୱ ଗ୍ରହଣ କରିବା ପରେ ଜଷ୍ଟିସ ସଞ୍ଜୀବ ଖନ୍ନା ଲଗାତାର ନିୟମରେ ପରିବର୍ତ୍ତନ କରିବାରେ ଲାଗିଛନ୍ତି । ସଦ୍ୟତମ ପରିବର୍ତ୍ତନ ଶୁଣାଣିକୁ ନେଇ କରିଛନ୍ତି । ଏବେ ସୁପ୍ରିମକୋର୍ଟରେ ବୁଧବାର ଓ ଗୁରୁବାର ନିୟମିତ ଶୁଣାଣି ହେଉ ଥିବା ମାମଲାର ସୂଚୀବଦ୍ଧ କରାଯିବ ନାହିଁ । ଉଚ୍ଚତମ ନ୍ୟାୟାଳୟରେ ମାମଲାର ଶୁଣାଣି ସମ୍ବନ୍ଧରେ ଶନିବାର ଏକ ନୂଆ ପରିପତ୍ର ଜାରି କରାଯାଇଛି । ପରିପତ୍ର ଅନୁଯାୟୀ, ବୁଧବାର ଓ ଗୁରୁବାର ନିୟମିତ ଶୁଣାଣି ହେଉଥିବା ମାମଲାର ସୂଚୀବଦ୍ଧ କରାଯିବ ନାହିଁ । ଏବେ ମଙ୍ଗଳବାର, ବୁଧବାର ଓ ଗୁରୁବାର ସ୍ଥାନାନ୍ତର ହେଉଥିବା ଯାଚିକା, ଜାମିନ ସଂପର୍କିତ କେସ ସହିତ ବିବିଧ ମାମଲାର ସୂଚୀବଦ୍ଧ କରାଯିବ । ପରବର୍ତ୍ତୀ ଆଦେଶ ପର୍ଯ୍ୟନ୍ତ ବୁଧବାର ଓ ଗୁରୁବାର କୌଣସି ନିୟମିତ ମାମଲାର ସୂଚୀବଦ୍ଧ କରାଯିବ ନାହିଁ । ବର୍ତ୍ତମାନର ପରମ୍ପରା ଅନୁସାରେ, ନୂଆ ମାମଲାକୁ ସୋମବାର ଓ ଶୁକ୍ରବାର ସୂଚୀବଦ୍ଧ କରାଯାଉଛି । ମଙ୍ଗଳବାର ଓ ଗୁୁରୁବାର ନିୟମିତ ଶୁଣାଣିର ସେହି ମାମଲା ସୂଚୀବଦ୍ଧ କରାଯାଏ, ଯାହାର ଚୂଡାନ୍ତ ଶୁଣାଣି କରାଯାଏ । ଏବେ ନୂଆ ପ୍ରଧାନ ବିଚାରପତି ସଞ୍ଜୀବ ଖନ୍ନା ଏଥିରେ ପରିବର୍ତ୍ତନ କରିଛନ୍ତି । ନିକଟରେ ସିଜେଆଇ ୧୬ ପୀଠକୁ ନୂଆ ମାମଲା ଆବଣ୍ଟନ ପାଇଁ ଏକ ନୂଆ ରୋଷ୍ଟର ଜାରି କରିଥିଲେ । ଏଥିସହିତ ନିର୍ଣ୍ଣୟ ନିଆଯାଇଛି ଯେ, ସିଜେଆଇ ଓ ଦୁଇ ବରିଷ୍ଠ ବିଚାରପତିଙ୍କ ଅଧ୍ୟକ୍ଷତାରେ ପ୍ରଥମ ତିନି ଅଦାଲତ ପତ୍ର ଯାଚିକା ଓ ଜନସ୍ୱାର୍ଥ ମାମଲାର ଶୁଣାଣି କରିବେ ।
