ଅତୁଲ ସୁଭାଷଙ୍କ ଆତ୍ମହତ୍ୟା ମାମଲାରେ ୪ ଜଣଙ୍କ ବିରୋଧରେ ମାମଲା ରୁଜୁ କଲା ବେଙ୍ଗାଲୁରୁ ପୁଲିସ
ଏଆଇ ଇଞ୍ଜିନିୟର ଅତୁଲ ସୁଭାଷଙ୍କ ଆତ୍ମହତ୍ୟା ମାମଲାରେ ବେଙ୍ଗାଲୁରୁ ପୁଲିସ ୪ ଜଣଙ୍କ ବିରୋଧରେ ମାମଲା ରୁଜୁ କରିଛି। ଇଞ୍ଜିନିୟର ଅତୁଲ ସୁଭାଷଙ୍କ ସୁଇସାଇଡ୍ ନୋଟ୍ ଅନୁଯାୟୀ ପତ୍ନୀ ଓ ଶାଶୁଘର ଲୋକଙ୍କ ନିର୍ଯାତନାଯୋଗୁଁ ସେ ଆତ୍ମହତ୍ୟା କରିଛନ୍ତି। ଅଭିଯୋଗ ଅନୁଯାୟୀ, ମାମଲାର ସମାଧାନ ପାଇଁ ତାଙ୍କ ପତ୍ନୀ ଓ ଶ୍ୱଶୁର ଘର ଲୋକେ ଟଙ୍କା ମାଗୁଥିଲେ। ଅତୁଲଙ୍କୁ ମାନସିକ ନିର୍ଯାତନା ଦେଉଥିଲେ ତାଙ୍କ ପତ୍ନୀ ଓ ପତ୍ନୀଙ୍କ ପରିବାର ଲୋକେ। ତାଙ୍କ ଭାଇ ଆମକୁ ବିସ୍ତୃତ ବିବରଣୀ ଦେଇଛନ୍ତି।
ଅତୁଲ ସୁଭାଷଙ୍କ ଭାଇ ବିକାଶ କୁମାରଙ୍କ ଅଭିଯୋଗ ଆଧାରରେ ବେଙ୍ଗାଲୁରୁର ମରାଠାହଲ୍ଲୀ ପୋଲିସ ଷ୍ଟେସନରେ ଆତ୍ମହତ୍ୟା ପାଇଁ ପ୍ରୋତ୍ସାହନ ଧାରା ରେ ଏକ ଏଫଆଇଆର ରୁଜୁ କରାଯାଇଛି। ବେଙ୍ଗାଲୁରୁ ପୁଲିସର ଡିସିପି ଶିବକୁମାର କହିଛନ୍ତି, ‘ଅତୁଲ ସୁଭାଷ ଡିସେମ୍ବର ୯ ତାରିଖ ସକାଳେ ଆତ୍ମହତ୍ୟା କରିଥିଲେ। ଏନେଇ ଥାନାରେ ଅଭିଯୋଗ ହୋଇଛି। ତାଙ୍କ ପତ୍ନୀ ଓ ତାଙ୍କ ପରିବାର ଲୋକେ ତାଙ୍କୁ ନିର୍ଯାତନା ଦେଇଥିଲେ। ତଦନ୍ତ ଚାଲିଛି।ଅତୁଲଙ୍କ ଭାଇ ବିକାଶ କୁମାର ଗଣମାଧ୍ୟମକୁ କହିଛନ୍ତି, ମୋର ଏକମାତ୍ର ଦାବି ହେଉଛି ମୋ ଭାଇକୁ ନ୍ୟାୟ ଦିଆଯାଉ। ପୁରୁଷଙ୍କ ପାଇଁ ମଧ୍ୟ ଆଇନ ହେବା ଦରକାର ବୋଲି ମୁଁ ଦାବି କରୁଛି। ଏପରି ହେବା ଉଚିତ ନୁହେଁ ଯେ ପୁରୁଷମାନେ ବିବାହ କରିବାକୁ ଭୟ କରନ୍ତି। ଯଦି କୌଣସି ମହିଳା ଆତ୍ମହତ୍ୟା କରନ୍ତି ତେବେ ତାଙ୍କ ପ୍ରେମିକକୁ ତୁରନ୍ତ ଗିରଫ କରିବା ଆମ ବ୍ୟବସ୍ଥାର ଦୋଷ। ଜଣେ ବ୍ୟକ୍ତି ଭିଡିଓ ଓ ନୋଟ୍ ଲେଖି ଆତ୍ମହତ୍ୟା କରୁଥିବା ବେଳେ ପୁଲିସ ମଧ୍ୟ କାର୍ଯ୍ୟାନୁଷ୍ଠାନ ନେଉନାହିଁ।
