ୟୁକ୍ରେନ ସହ ଆମେରିକା ଦୃଢ଼ତାର ସହ ଛିଡ଼ା ହୋଇଛି ବୋଲି କହିଛନ୍ତି : ଜୋ ବାଇଡେନ
ଖ୍ରୀଷ୍ଟମାସ ସକାଳେ ୟୁକ୍ରେନ୍ ଉପରେ ରୁଷର ଆକ୍ରମଣକୁ ନେଇ ଆମେରିକା କ୍ଷୁବ୍ଧ ହୋଇଛି। ଆମେରିକା ରାଷ୍ଟ୍ରପତି ଜୋ ବାଇଡେନ ଏହି ଆକ୍ରମଣକୁ ନିନ୍ଦା କରିବା ସହ ୟୁକ୍ରେନ ସହ ଆମେରିକା ଦୃଢ଼ତାର ସହ ଛିଡ଼ା ହୋଇଛି ବୋଲି କହିଛନ୍ତି। ଆମେରିକାର ପ୍ରତିରକ୍ଷା ବିଭାଗ ୟୁକ୍ରେନକୁ ଅସ୍ତ୍ରଶସ୍ତ୍ର ଯୋଗାଣକୁ ଆହୁରି ବଢ଼ାଇବ ବୋଲି ବାଇଡେନ୍ କହିଛନ୍ତି। ଖ୍ରୀଷ୍ଟମାସର ପ୍ରଥମ କିଛି ଘଣ୍ଟା ମଧ୍ୟରେ ରୁଷିଆ ୟୁକ୍ରେନର ସହର ଏବଂ ବିଦ୍ୟୁତ୍ କେନ୍ଦ୍ର ଉପରେ ଡ୍ରୋନ୍ ଓ କ୍ଷେପଣାସ୍ତ୍ର ରେ ଆକ୍ରମଣ କରିଥିଲା। ‘ଶୀତଦିନେ ୟୁକ୍ରେନକୁ ଗରମ ଓ ବିଜୁଳି ସମସ୍ୟାର ମୁକାବିଲା କରିବାକୁ ପଡ଼ୁଥିବା ବେଳେ ଏହି ଆକ୍ରମଣ କରାଯାଇଥିଲା। ୟୁକ୍ରେନର ଗ୍ରିଡର ସୁରକ୍ଷା ବିପଦରେ ପଡ଼ିଥିଲା। ମୁଁ ସ୍ପଷ୍ଟ କରିବାକୁ ଚାହୁଁଛି ଯେ ୟୁକ୍ରେନର ଲୋକମାନଙ୍କର ମଧ୍ୟ ଶାନ୍ତି ଏବଂ ନିରାପତ୍ତା ମଧ୍ୟରେ ବଞ୍ଚିବାର ଅଧିକାର ଅଛି। ୟୁକ୍ରେନ ସହ ଠିଆ ହେବାକୁ ବାଇଡେନ୍ ଅନ୍ତର୍ଜାତୀୟ ସମୁଦାୟକୁ ଅନୁରୋଧ କରିଛନ୍ତି। ନିଜ ବୟାନରେ ବାଇଡେନ ୟୁକ୍ରେନକୁ ଅସ୍ତ୍ରଶସ୍ତ୍ର ଯୋଗାଣ ଉପରେ ଗୁରୁତ୍ୱାରୋପ କରିଛନ୍ତି ।ବାଇଡେନ୍ କହିଛନ୍ତି, ଗତ କିଛି ମାସ ମଧ୍ୟରେ ଆମେରିକା ୟୁକ୍ରେନକୁ ଶହ ଶହ ଏୟାର ଡିଫେନ୍ସ କ୍ଷେପଣାସ୍ତ୍ର ପହଞ୍ଚାଇଛି ଏବଂ ଆହୁରି ଅନେକ କ୍ଷେପଣାସ୍ତ୍ର ଏପର୍ଯ୍ୟନ୍ତ ପ୍ରଦାନ କରାଯାଇନାହିଁ। ୟୁକ୍ରେନକୁ ଅସ୍ତ୍ରଶସ୍ତ୍ର ହସ୍ତାନ୍ତର ଜାରି ରଖିବାକୁ ମୁଁ ପ୍ରତିରକ୍ଷା ବିଭାଗକୁ ନିର୍ଦ୍ଦେଶ ଦେଇଛି। ୟୁକ୍ରେନର ସ୍ଥିତିସୁଦୃଢ଼ କରିବା ପାଇଁ ଆମେରିକା କାର୍ଯ୍ୟ ଜାରି ରଖିବ।
ଖ୍ରୀଷ୍ଟମାସ ସକାଳେ ରୁଷ୍ ୟୁକ୍ରେନ ଉପରେ ୭୦ରୁ ଅଧିକ କ୍ଷେପଣାସ୍ତ୍ର ଏବଂ ୧୦୦ରୁ ଅଧିକ ଡ୍ରୋନ୍ ଉତ୍କ୍ଷେପଣ କରିଥିଲା। ଏହି ଆକ୍ରମଣରେ ୟୁକ୍ରେନର ଏକ ଥର୍ମାଲ ପାୱାର ପ୍ଲାଣ୍ଟ କ୍ଷତିଗ୍ରସ୍ତ ହୋଇଛି। ଏହି ଆକ୍ରମଣରେ ୟୁକ୍ରେନର ଅନେକ ସହରରେ ବ୍ଲାକ୍ ଆଉଟ୍ ହୋଇଥିଲା।ଏହି ଆକ୍ରମଣରେ ୬ ଜଣ ଆହତ ହୋଇଛନ୍ତି। ୟୁକ୍ରେନ ବାୟୁସେନା ନିଶ୍ଚିତ କରିଛି ଯେ ଖାରକିବରେ ନିକ୍ଷେପ କରାଯାଇଥିବା କ୍ଷେପଣାସ୍ତ୍ର ବ୍ୟାଲିଷ୍ଟିକ୍ ଥିଲା। ୟୁକ୍ରେନର ରାଷ୍ଟ୍ରପତି ଭୋଲୋଦିମିର ଜେଲେନସ୍କି ଏହି ଘଟଣାକୁ ନିନ୍ଦା କରି କହିଛନ୍ତି ଯେ ଏହା ପରେ ୫,୦୦,୦୦୦ ଲୋକ ବିନା ଗରମ ସୁବିଧାରେ ରହିବାକୁ ବାଧ୍ୟ ହୋଇଥିଲେ।
