ବନ୍ୟା ଯୋଗୁ ସାତକୋଶିଆକୁ ପର୍ଯ୍ୟଟକ ମନା
ଅନୁଗୁଳ: ଅନୁଗୁଳ ଜିଲାର ଅନୁଗୁଳ ଓ ଆଠମଲ୍ଲିକ ବ୍ଲକରେ ବନ୍ୟାଜଳ ପ୍ରବେଶ ଯୋଗୁ ଅନେକ ଅଞ୍ଚଳ ଜଳବନ୍ଦୀ ହୋଇପଡ଼ିଛି। ଟିକରପଡାବାସୀ ଜଳବନ୍ଦୀ ହୋଇ ରହିଛନ୍ତି। ତେବେ ଧନଜୀବନ ଯେପରି ନଷ୍ଟ ହେବ ନାହିଁ ସେଥିପାଇଁ ଜିଲା ପ୍ରଶାସନ ତୀକ୍ଷ୍ନ ନଜର ରଖିଥିବା ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ସୂଚନା ଦେଇଛନ୍ତି। ବହୁ ଲୋକଙ୍କୁ ଅସ୍ଥାୟୀ ଆଶ୍ରୟସ୍ଥଳୀକୁ ଅଣାଯାଇଛି। ତେବେ ବନ୍ୟାଜଳ ବଢ଼ୁଥିବାରୁ ମଙ୍ଗଳବାରଠାରୁ ସାତକୋଶିଆକୁ ପର୍ଯ୍ୟଟକଙ୍କୁ ଛଡାଯିବ ନାହିଁ ବୋଲି ଜିଲାପାଳ ସୂଚନା ଦେଇଛନ୍ତି। ଅନୁଗୁଳ ବ୍ଲକର ୧୪ଟି ଗାଁ ପ୍ରଭାବିତ ହୋଇଥିବାବେଳେ ୫ଟି ଗାଁ ଲୋକଙ୍କୁ ସ୍ଥାନାନ୍ତର କରାଯାଇଛି। ଆହୁରୀ ୮ଶହ ଲୋକଙ୍କୁ ସ୍ଥାନାନ୍ତରିତ କରାଯିବ। ମଙ୍ଗଳବାର ଏନ୍ଡିଆର୍ଏଫ ଟିମ୍ ବନ୍ୟାଞ୍ଚଳରେ ପହଞ୍ଚିଛି। ଅଗ୍ନିଶମ ବିଭାଗ, ତହସିଲଦାରଙ୍କ ବୋଟ୍କୁ ସଜାଗ ରଖାଯାଇଛି। ଏଥିସହିତ ବନ ବିଭାଗ କର୍ମଚାରୀଙ୍କ ସହଯୋଗ ଆବଶ୍ୟକ ସ୍ଥଳେ ନିଆଯାଉଥିବା ସୂଚନା ପ୍ରଦାନ କରାଯାଇଛି।
