ଗିନିଜ୍ ବୁକ୍ ଅଫ୍ ୱାର୍ଲ୍ଡ ରେକର୍ଡରେ ସ୍ଥାନ ପାଇଲା ବିଶ୍ଵର ସବୁଠୁ ଲମ୍ବା କାକୁଡ଼ି
ବ୍ରିଟେନର ସାଉଥ୍ଆମ୍ପଟନ୍ ବାସିନ୍ଦା ସେବାଷ୍ଟିଆନ୍ ସୁସ୍କି ନିଜ ବଗିଚାରେ ବିଶ୍ୱର ସବୁଠୁ ଲମ୍ବା କାକୁଡ଼ି ଫଳାଇଛନ୍ତି। ଯାହା ୧୧୩.୪ ସେଣ୍ଟିମିଟର ଲମ୍ବା। ଏଥିପାଇଁ ସେ ଗିନିଜ୍ ବିଶ୍ୱ ରେକର୍ଡସରେ ସ୍ଥାନ ପାଇଛନ୍ତି । ପୂର୍ବର ସବୁଠୁ ଲମ୍ବା କାକୁଡ଼ି ଠାରୁ ଏହା ୬.୪ ସେଣ୍ଟିମିଟର ବଡ଼ । ସେବାଷ୍ଟିଆନ୍ ୟୁରୋପିଆନ୍ ଜ୍ୟାଣ୍ଟ ଭେଜିଟେବଲ୍ ଗ୍ରୋଅର୍ସ ଆସୋସିଏସନ୍ (ଇଜିଭିଜିଏ) ର ଜଣେ ସ୍ୱେଚ୍ଛାସେବୀ । ତାଙ୍କ ନାମରେ ଅନେକ ଜାତୀୟ ରେକର୍ଡ ରହିଛି । ଗ୍ରେଟ୍ ପମ୍ପ୍କିନ୍ କମନ୍ୱେଲ୍ଥ (ଜିପିସି) ପାଇଁ ସେ ଏବେ ଇଣ୍ଟର୍ ନ୍ୟାସନାଲ୍ ଅଫିସର୍ ପଦରେ କାର୍ଯ୍ୟ କରୁଛନ୍ତି ।
ସବୁଠୁ ଲମ୍ବା କାକୁଡ଼ି ଫଳାଇବାର ଯାତ୍ରା ଆରମ୍ଭ କରିବା ପୂର୍ବରୁ ସେ ସବୁଠୁ ଭଲ କିସମ ଖୋଜିବା ଆରମ୍ଭ କଲେ। ଏଥିପାଇଁ ବ୍ରିଟେନ, ଜର୍ମାନୀ, ପୋଲାଣ୍ଡ ଆଦି ସ୍ଥାନ ବୁଲିଲେ। ଶେଷରେ ପୋଲାଣ୍ଡର ପିଓଟ୍ର ହୋଲେୱାରୁ ସେ କାକୁଡ଼ି ମଞ୍ଜି ଆଣିଲେ । ଏଠାକାର କାକୁଡ଼ି ୯୯ ସେଣ୍ଟିମିଟର ପର୍ଯ୍ୟନ୍ତ ଲମ୍ବା ହୋଇପାରେ। ତେବେ ତାଙ୍କ କାକୁଡ଼ି ବିଶ୍ୱ ରେକର୍ଡରେ ସ୍ଥାନ ପାଇବା ପରେ ସେବାଷ୍ଟିଆନ୍ ଖୁବ୍ ଗର୍ବିତ ବୋଲି କହିଛନ୍ତି।
ସଦ୍ୟ ବିଶ୍ୱ ରେକର୍ଡ ବିଷୟରେ ସେ କହିଛନ୍ତି ‘ପୂର୍ବରୁ ମୁଁ ବଡ଼ କାକୁଡ଼ି ଫଳାଇଛି, କିନ୍ତୁ ବର୍ତ୍ତମାନର ଗିନିଜ୍ ରେକର୍ଡଧାରୀ କାକୁଡ଼ି ଠାରୁ ଲମ୍ବା କେବେ ଫଳାଇନଥିଲି । ସବୁଠୁ ଲମ୍ବା କାକୁଡ଼ି ଫଳାଇବା ଏକ ବିପଦପୂର୍ଣ୍ଣ କାମ ।’ କାକୁଡ଼ିର ଠିକ୍ ବଢ଼ିବା ସମୟରେ ସେବାଷ୍ଟିଆନ୍ ହସ୍ପିଟାଲରେ ଭର୍ତ୍ତି ହୋଇଥିଲେ । ଏଥିପାଇଁ ଗିନିଜ୍ ରେକର୍ଡ ଭାଙ୍ଗିବାରେ ସେ ବିଫଳ ହେବେ ବୋଲି ଭାବି ନେଇଥିଲେ । କିନ୍ତୁ ତାଙ୍କ ପତ୍ନୀ ରେନାଟା କାକୁଡ଼ିର ଯତ୍ନ ନେଲେ। ତାଙ୍କ ବ୍ୟତୀତ ଲମ୍ବା କାକୁଡ଼ିର ରେକର୍ଡ କରିବା ସମ୍ଭବ ନ ଥିଲା ବୋଲି ସେବାଷ୍ଟିଆନ୍ କହିଛନ୍ତି ।
