ଯୁଦ୍ଧବିରତି ଚୁକ୍ତି ସ୍ଵାକ୍ଷରିତ ହେବାର ଦିନକ ପରେ ଏ ଦିଗରେ ଆଗ୍ରହ ପ୍ରକାଶ କରିଛି ହମାସ
ଇସ୍ରାଏଲ ଏବଂ ଲେବାନନ ମଧ୍ୟରେ ଯୁଦ୍ଧବିରତି ଚୁକ୍ତି ସ୍ଵାକ୍ଷରିତ ହେବାର ଦିନକ ପରେ ହମାସ ଆତଙ୍କବାଦୀ ସଂଗଠନ ଏ ଦିଗରେ ଆଗ୍ରହ ପ୍ରକାଶ କରିଛି। ଗାଜା ପଟିରେ ଯୁଦ୍ଧବିରତି ଲାଗି ଇସ୍ରାଏଲ ସହିତ ଚୁକ୍ତି କରିବାକୁ ହମାସ ପ୍ରସ୍ତୁତ ଥିବା କହିଛି। ଅନ୍ତର୍ଜାତୀୟ ସ୍ତରର ଖବର ସରବରାହ ସଂସ୍ଥା ଏଏଫପିକୁ ହମାସର ଜଣେ ଅଧିକାରୀ କହିଛନ୍ତି, ଇଜିପ୍ଟ,, କାତାର ଏବଂ ତୁର୍କୀରେ ଥିବା ମଧ୍ୟସ୍ଥମାନଙ୍କୁ ଆମ ପକ୍ଷରୁ ସୂଚନା ଦିଆଯାଇ ହମାସ ଯୁଦ୍ଧବିରତି ଚୁକ୍ତି ପାଇଁ ପ୍ରସ୍ତୁତ ଥିବା କୁହାଯାଇଛି। ବନ୍ଦୀମାନଙ୍କୁ ମଧ୍ୟ ମୁକ୍ତ କରିବା ଲାଗି ପ୍ରସ୍ତାବ ଦିଆଯାଇଛି। ଇସ୍ରାଏଲ ଏହି ଚୁକ୍ତିପାଇଁ ବିଳମ୍ବ କରୁଥିବା ଅଧିକାରୀ ଜଣକ ଅଭିଯୋଗ କରିଛନ୍ତି।
ଅନ୍ୟପଟେ ଇସ୍ରାଏଲ ଏବଂ ଲେବାନନ ମଧ୍ୟରେ ଯୁଦ୍ଧବିରତି ଚୁକ୍ତି ହେଜବୋଲ୍ଲାକୁ ଦୁର୍ବଳ କରିବ। ଫଳରେ ଲେବାନନରେ ଆଡ୍ଡା ଜମାଇଥିବା ଏହି ଆତଙ୍କୀ ସଂଗଠନ ଭବିଷ୍ୟତରେ ହମାସକୁ ସମର୍ଥନ କରିବ ନାହିଁ ବୋଲି ଆମେରିକା ଏବଂ ଇସ୍ରାଏଲ ଆଶାପୋଷଣ କରିଛନ୍ତି। ଏହି ଚୁକ୍ତି ପରେ ପାଲେଷ୍ଟାଇନରେ ଥିବା ହମାସ ସଂଗଠନ ମଧ୍ୟ ଯୁଦ୍ଧବିରତି ପାଇଁ ଆଗକୁ ଆସିବ ବୋଲି ପୂର୍ବରୁ ଅନୁମାନ କରାଯାଉଥିଲା।ଅନ୍ୟପଟେ ଦୀର୍ଘଦିନର ଯୁଦ୍ଧ ଯୋଗୁ ଗାଜାପଟିରେ ଖାଦ୍ୟ ସଙ୍କଟ ଦେଖିବାକୁ ମିଳିଛି। ବହୁ ଲୋକ ଖାଦ୍ୟାଭାବର ସମ୍ମୁଖୀନ ହେଉଛନ୍ତି। ଏପରି ସ୍ଥିତିରେ ଜୋର୍ଡାନ ପକ୍ଷରୁ ଗାଜାପଟିରେ ଖାଦ୍ୟ ଯୋଗାଣ କରାଯାଇଛି। ଜୋର୍ଡାନ ସରକାର ବାୟୁସେନା ବିମାନ ଜରିଆରେ ଆକାଶମାର୍ଗରୁ ଖାଦ୍ୟ ପକାଇଛନ୍ତି। ୨ଟି ବିମାନ ଜରିଆରେ ୭ ଟନ ଖାଦ୍ୟ ଏବଂ ଅତ୍ୟାବଶ୍ୟକ ସାମଗ୍ରୀ ଯୋଗାଣ କରାଯାଇଛି। ଜାତିସଂଘ ଚିହ୍ନଟ କରିଥିବା ଅଞ୍ଚଳଗୁଡ଼ିକରେ ଏହି ଖାଦ୍ୟ ସାମଗ୍ରୀ ପକାଯାଇଛି।
