ବଲିଉଡର ସବୁଠୁ ଦାମିକିଆ ଫିଲ୍ମ ହେବ ୟଶରଜ ବ୍ୟାନରର ‘ଟାଇଗର ଭର୍ସେସ ପଠାନ’

ମୁମ୍ବାଇ: ପଠାନ ଫିଲ୍ମର ସଫଳତା ପରେ ୟଶରାଜ ଫିଲ୍ମସର ସ୍ପାଇ ୟୁନିଭର୍ସ ଫୁଲ ଫର୍ମକୁ ଆସି ଯାଇଛନ୍ତି । ପଠାନ ଫିଲ୍ମରେ ସଲମାନ ଖାଁଙ୍କ କାମିଓ ଲୋକଙ୍କୁ ବେଶ ପସନ୍ଦ ଆସିଥିଲା । ଏହା ପରେ ଦର୍ଶକ ମହଲରେ ଶାହାରୁଖ ଓ ସଲମାନଙ୍କୁ ନେଇ ଆକ୍ସନ ଫିଲ୍ମର ଚାହିଦା ବଢ଼ିଥିବା ଅନୁମାନ କରି ୟଶରାଜ ଫିଲ୍ମସ ପ୍ରସ୍ତୁତି ଆରମ୍ଭ କରି ଦେଇଛି । ରିପୋର୍ଟ ମୁତାବକ ଟାଇଗର ଭର୍ସେସ ପଠାନ ଫିଲ୍ମ ମାଧ୍ୟମରେ ଏହି ଦୁଇ ହୀରୋ ସାମ୍ନାସାମ୍ନି ହେବେ । ସିଦ୍ଧାର୍ଥ ଆନନ୍ଦ ଏହାର ନିର୍ଦ୍ଦେଶନା ଦେବେ । ଫିଲ୍ମର ବଜେଟ ବର୍ତମାନ ସୁଦ୍ଧା ୩୦୦ କୋଟି ପାର କରି ସାରିଛି । ଉଭୟ ସଲମାନ ଏବଂ ଶାହାରୁଖଙ୍କ ଷ୍ଟାର ଫିସ ଏଥିରେ ସାମିଲ ହୋଇନି । ସେମାନେ ପ୍ରଫିଟର ଅଂଶୀଦାର ହେବେ ବୋଲି ଚୟନ କରିଛନ୍ତି । ଆକ୍ସନ ଦୃଶ୍ୟକୁ ଉପରସ୍ତରକୁ ନେବା ପାଇଁ ଟେକ୍ନୋଲୋଜିର ବହୂ ମାତ୍ରାର ବ୍ୟବହାର ହେବ । ଏହା ବ୍ୟତୀତ ଫିଲ୍ମକୁ ଆନ୍ତର୍ଜାତୀୟ ମାର୍କେଟକୁ ଆଖି ଆଗରେ ରଖି ପ୍ରସ୍ତୁତ କରାଯିବ । ଭାରତ ବାହାରେ ଏହି ଦୁଇ ହୀରୋଙ୍କ ପ୍ରଶଂସକ ବହୁମାତ୍ରାରେ ଥିବାରୁ ମେକର୍ସ ସେମାନଙ୍କୁ ମଧ୍ୟ ଆଖି ଆଗରେ ରଖିଛନ୍ତି । ଯଦି ସବୁ କିଛି ଠିକଠାକ ହୁଏ ତାହାହେଲେ ଏହି ଫିଲ୍ମ ବକ୍ସ ଅଫିସରେ ପଠାନ ପରି କମାଲ କରିବ ।