ଡିସେମ୍ୱର ୧୭ରେ ଜିଏସଟି କାଉନସିଲ ବୈଠକ

ନୂଆଦିଲ୍ଲୀ: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ସାମଗ୍ରୀ ଏବଂ ସେବା କର (ଜିଏସଟି) କାଉନସିଲର ୪୮ତମ ବୈଠକ ଡିସେମ୍ୱର ୧୭ରେ ଆୟୋଜିତ ହେବ । ଏହି ବୈଠକ ଭିଡିଓ କନଫରେନ୍ସିଂ ଜରିଆରେ ହେବ । ବୈଠକରେ କସିନୋ, ଅନଲାଇନ ଗେମିଂ ଏବଂ ଘୋଡାଦୌଡ ଉପରେ ଜିଏସଟି ଲାଗୁ କରିବା ଏବଂ ଜିଏସଟି ଅପିଲିକ୍ ନ୍ୟାୟାଧିକାରଣ ପ୍ରତିଷ୍ଠା ଉପରେ ରାଜ୍ୟର ଅର୍ଥ ମନ୍ତ୍ରୀମାନଙ୍କ ରିପୋର୍ଟ ଉପରେ ଚର୍ଚ୍ଚା କରିବେ ।

ଏହାସହ ଜିଏସଟି ଆଇନର କିଛି ପ୍ରାବଧାନକୁ ଅପରାଧ ଶ୍ରେଣୀରୁ ବାହାର କରିବା ନେଇ ଅଧିକାରୀଙ୍କ ଏକ ରିପୋର୍ଟ ଉପରେ ବିଚାର-ବିମର୍ଶ କରିପାରନ୍ତି । ଉଲ୍ଲେଖଯୋଗ୍ୟ ଯେ, ଦୁଇ ଦିନ ତଳେ କେନ୍ଦ୍ର ସରକାର ଜିଏସଟି କ୍ଷତିପୂରଣ ବାବଦରେ ରାଜ୍ୟ ସରକାରଙ୍କୁ ୧୭,୦୦୦ କୋଟି ଟଙ୍କା ଜାରି କରିଥିଲେ । ଏହାସହ ଚଳିତ ଆର୍ଥିକ ବର୍ଷରେ ବର୍ତ୍ତମାନ ସୁଦ୍ଧା ୧.୧୫ ଲକ୍ଷ କୋଟି ଟଙ୍କା ଜାରି କରାଯାଇ ସାରିଛି ।

ଜିଏସଟି ଲାଗୁ ହେବା ପରେ ରାଜ୍ୟ ଗୁଡିକୁ ଯେକୌଣସି ରାଜସ୍ୱ କ୍ଷତି ପାଇଁ ପାଞ୍ଚ ବର୍ଷର ଯାଏଁ କ୍ଷତିପୂରଣ ଦିଆଯିବା ବୋଲି ଘୋଷଣା କରାଯାଇଥିଲା।