ଗର୍ଭପାତ କରିବା କିମ୍ବା ନକରିବାର ସମ୍ପୂର୍ଣ୍ଣ ଅଧିକାର ମହିଳାଙ୍କର: ବମ୍ବେ ହାଇକୋର୍ଟ
ନୂଆଦିଲ୍ଲୀ: ମହିଳାଙ୍କ ଗର୍ଭଧାରଣକୁ ନେଇ ବମ୍ବେ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇଛନ୍ତି । ହାଇକୋର୍ଟ କହିଛନ୍ତି ଯେ, ଗର୍ଭଧାରଣ ଜାରି ରଖିବା କିମ୍ବା ନରଖିବା ଅଧିକାର ସମ୍ପୂର୍ଣ୍ଣ ମହିଳାଙ୍କ ଉପରେ ରହିଛି । କୋର୍ଟ କହିଛନ୍ତି ଯେ, ଏହି ଅଧିକାର କେବଳ ମହିଳାଙ୍କ ଏବଂ ସେ ଏହି ପ୍ରସଙ୍ଗରେ ନିଷ୍ପତ୍ତି ନେଇପାରିବେ ।
୩୨ ସପ୍ତାହ ଗର୍ଭବତୀ ମହିଳାଙ୍କ ଆବେଦନ ଉପରେ ହାଇକୋର୍ଟ ଏହି ମନ୍ତବ୍ୟ ଦେଇଛନ୍ତି । ଗର୍ଭରେ ବଢ଼ୁଥିବା ଗର୍ଭସ୍ଥ ଶିଶୁର ମେଡିକାଲ ସମସ୍ୟା ଜାଣିବା ପରେ ମହିଳା ଜଣକ ଗର୍ଭପାତର ମଞ୍ଜୁରୀ ପାଇଁ ହାଇକୋର୍ଟରେ ଆବେଦନ କରିଥିଲେ ।
କୋର୍ଟ କହିଛନ୍ତି ଯେ, ମହିଳାଙ୍କ ଅଧିକାରକୁ କୌଣସି ପ୍ରକାରରେ ବୁଝାମଣା କରାଯିବା ଉଚିତ ନୁହେଁ । ମହିଳାଙ୍କ ଗର୍ଭପାତକୁ ଅନୁମୋଦନ କରିବାବେଳେ ହାଇକୋର୍ଟ କହିଛନ୍ତି ଯେ, ଆମେ ବିଶ୍ୱାସ କରୁ ଯେ କୋର୍ଟ କେବଳ ତଥ୍ୟକୁ ବିଚାର କରିବା ଉଚିତ୍ ନୁହେଁ ବରଂ ଏହି ମାମଲା ସହ ଜଡିତ ପ୍ରଶ୍ନଗୁଡ଼ିକୁ ମଧ୍ୟ ବିଚାର କରିବା ଉଚିତ୍ ।
ଜଷ୍ଟିସ ଜିଏସ ପଟେଲ ଏବଂ ଜଷ୍ଟିସ ଏସ.ଜି ଡିଜିଙ୍କ ଏକ ବେଞ୍ଚ ମେଡିକାଲ ବୋର୍ଡର ମତ ଗ୍ରହଣ କରିବାକୁ ମନା କରିଦେଇଛି, ଯେଉଁଥିରେ କୁହାଯାଇଛି ଯେ ଗର୍ଭସ୍ଥ ଶିଶୁର ଗୁରୁତର ଅବସ୍ଥାରେ ଥିଲେ ମଧ୍ୟ ଗର୍ଭପାତ କରାଇବା ଉଚିତ ନୁହେଁ ।
ଗର୍ଭସ୍ଥ ଅବସ୍ଥାରେ ଥିବା ଗମ୍ଭୀର ଅସ୍ୱାଭାବିକତାକୁ ଦୃଷ୍ଟିରେ ରଖି ଗର୍ଭଧାରଣର ଅବଧି କିଛି ଗୁରୁତ୍ୱପୂର୍ଣ୍ଣ ନୁହେଁ ବୋଲି କୋର୍ଟ କହିଛନ୍ତି । ଆବେଦନକାରୀ ବୁଝି ବିଚାରି ନିଷ୍ପତ୍ତି ନେଇଛନ୍ତି । ଏହା ଏକ ସହଜ ନିଷ୍ପତ୍ତି ନୁହେଁ, କିନ୍ତୁ ଏହା କେବଳ ଆବେଦନକାରୀଙ୍କ ନିଷ୍ପତ୍ତି । ନିଜ ଗର୍ଭରେ ବଢ଼ୁଥିବା ଗର୍ଭସ୍ଥ୍ ଶିଶୁ ସମ୍ବନ୍ଧରେ କୌଣସି ନିଷ୍ପତ୍ତି ନେବାର ଅଧିକାର କେବଳ ମହିଳାଙ୍କର ରହିଛି । ଏହା ମେଡିକାଲ ବୋର୍ଡର କର୍ତ୍ତୃପକ୍ଷଙ୍କ ଅଧିକାର ନୁହେଁ ।
ତେବେ ସୋନୋଗ୍ରାଫି ପରେ ଜଣାପଡିଲା କି, ମହିଳାଙ୍କ ଗର୍ଭରେ ବଢ଼ୁଥିବା ଶିଶୁର ଗୁରୁତର ମେଡିକାଲ ସମସ୍ୟା ରହିଛି । ଏହା ପରେ ମହିଳା ଜଣକ ଗର୍ଭପାତ ପାଇଁ ହାଇକୋର୍ଟଙ୍କ ମଞ୍ଜୁରୀ ମାଗିଥିଲେ ।
