ସୋସିଆଲ ମିଡିଆରେ ମିଥ୍ୟା ଖବର ଚିହ୍ନଟ ପାଇଁ ଆଇଟି ନିୟମରେ ସଂଶୋଧନ ବାବଦରେ କେନ୍ଦ୍ର ସରକାରଙ୍କୁ ଉତ୍ତର ମାଗିଲେ ବମ୍ବେ ହାଇକୋର୍ଟ
ମୁମ୍ବାଇ: ସୋସିଆଲ ମିଡିଆରେ ମିଥ୍ୟା ଖବର ଚିହ୍ନଟ ପାଇଁ ଆଇଟି ନିୟମରେ କେନ୍ଦ୍ର ସରକାର କରିଥିବା ସଂଶୋଧନକୁ ବମ୍ବେ ହାଇକୋର୍ଟରେ ଚ୍ୟାଲେଞ୍ଜ କରାଯାଇଛି। ଷ୍ଟାମ୍ପ ଅପ୍ ହାସ୍ୟ ଅଭିନେତା କୁନାଲ କାମ୍ରାଙ୍କ ଦ୍ୱାରା ଦାଖଲ ହୋଇଥିବା ଏକ ଆବେଦନ ଶୁଣାଣି ବେଳେ ହାଇକୋର୍ଟ ଏହି ମାମଲାରେ ଏକ ଆଫିଡେଭିଟ୍ ଦାଖଲ କରିବାକୁ କେନ୍ଦ୍ରକୁ କହିଛନ୍ତି।
ଜଷ୍ଟିସ ଗୌତମ ପଟେଲ ଏବଂ ଜଷ୍ଟିସ ନୀଲା ଗୋଖଲେଙ୍କ ଏକ ବେଞ୍ଚ କହିଛନ୍ତି ଯେ, ଆଇଟି ନିୟମକୁ କାହିଁକି ସଂଶୋଧନ କରିବା ଆବଶ୍ୟକ ତାହା ସରକାର ଆଫିଡେଭିଟରେ ସ୍ପଷ୍ଟ କରିବା ଉଚିତ। ଏପ୍ରିଲ୍ ୧୯ ପର୍ଯ୍ୟନ୍ତ କେନ୍ଦ୍ରକୁ ଏକ ଆଫିଡେଭିଟ୍ ଦାଖଲ କରିବାକୁ ସମୟ ଦେଇ କୋର୍ଟ ଏହି ସଂଶୋଧନ ପଛରେ କୌଣସି ପ୍ରକୃତ ପୃଷ୍ଠଭୂମି କିମ୍ବା କାରଣ ଅଛି କି ନାହିଁ ବୋଲି ପ୍ରଶ୍ନ କରିଛନ୍ତି। ଏହି ସଂଶୋଧନ ହେତୁ ଆବେଦନକାରୀ ଏକ ପ୍ରକାର ପ୍ରଭାବ ଆଶା କରୁଛନ୍ତି। ଏପ୍ରିଲ ୨୧ ରେ ଏହାର ଶୁଣାଣି ହେବ ବୋଲି କୋର୍ଟ କହିଛନ୍ତି।
କିଛି ଦିନ ତଳେ ଏଡିଟର୍ସ ଗିଲ୍ଡ ଅଫ୍ ଇଣ୍ଡିଆ କହିଥିଲେ ଯେ, କେନ୍ଦ୍ର ଆଇଟି ମନ୍ତ୍ରଣାଳୟ ଦ୍ୱାରା ଜାରି ନୂଆ ଆଇଟି ସଂଶୋଧନ ନିୟମ ଗଣମାଧ୍ୟମ ପାଇଁ ବିପଦ । ତାଙ୍କ କହିବା ଅନୁସାରେ, ଏହି ସଂଶୋଧନ ଦେଶରେ ଗଣମାଧ୍ୟମର ସ୍ୱାଧୀନତା ଉପରେ ଗଭୀର ପ୍ରତିକୂଳ ପ୍ରଭାବ ପକାଇବ। ଏହି ବିବୃତ୍ତିରେ ସମ୍ପାଦକ ଗିଲ୍ଡ ଆହୁରି କହିଥିଲେ, “ପ୍ରକୃତରେ, କୌଣସି ଖବର ନକଲି କି ନୁହେଁ ତାହା ନିର୍ଣ୍ଣୟ କରିବା ଏବଂ ଏହାକୁ ହଟାଇବା ପାଇଁ ସରକାର ନିଜ କାର୍ଯ୍ୟ ସଂପର୍କରେ ନିଜକୁ ସମ୍ପୂର୍ଣ୍ଣ କ୍ଷମତା ଦେଇଛନ୍ତି । ତଥାକଥିତ ଫ୍ୟାକ୍ଟ ଚେକିଂ ୟୁନିଟ୍ ‘ ମନ୍ତ୍ରଣାଳୟ ଦ୍ୱାରା ଏକ ସରକାରୀ ‘ଗେଜେଟରେ ପ୍ରକାଶିତ ବିଜ୍ଞପ୍ତି’ ଦ୍ୱାରା ଗଠନ କରାଯାଇପାରିବ।
