ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ଭୂପିନ୍ଦର ସିଂହ ହୁଦାଙ୍କ କାର ଦୁର୍ଘଟଣାଗ୍ରସ୍ତ
ନୂଆଦିଲ୍ଲୀ: ବରିଷ୍ଠ କଂଗ୍ରେସ ନେତା ତଥା ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ଭୂପିନ୍ଦର ସିଂହ ହୁଦାଙ୍କ କାର ଦୁର୍ଘଟଣାଗ୍ରସ୍ତ ହୋଇଛି । ହୁଦାଙ୍କ ଗାଡ଼ି ଆଜି ସକାଳୁ ଦୁର୍ଘଟଣାଗ୍ରସ୍ତ ହୋଇଥିଲା । ଏହି ଦୁର୍ଘଟଣାରେ ତାଙ୍କର କାର ସମ୍ପୂର୍ଣ୍ଣ ଭାବେ କ୍ଷତିଗ୍ରସ୍ତ ହୋଇଥିଲା । ଏକ ନୀଳ ଗାଈ ଅଚାନକ ତାଙ୍କ ଗାଡ଼ି ସାମ୍ନାକୁ ଚାଲିଆସିବା କାରଣରୁ ଏହି ଅଘଟଣ ଘଟିଥିଲା । ଭାଗ୍ୟବଶତଃ ହୁଦା ଏତେବଡ଼ ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଥିଲେ ।
आज हिसार जाते समय मेरा वाहन दुर्घटनाग्रस्त हो गया लेकिन ईश्वर की कृपा व आप लोगों की शुभकामनाओं से मैं और मेरा स्टाफ पूर्ण रूप से सुरक्षित है।
मैं आगे के सभी तयशुदा कार्यक्रमों में शामिल होऊँगा।
— Bhupinder S Hooda (@BhupinderShooda) April 9, 2023
କାର ଦୁର୍ଘଟଣାର ସମ୍ମୁଖୀନ ହେବା ସମୟରେ ଭୂପିନ୍ଦର ଆଗ ସିଟରେ ବସିଥିଲେ । ଭୂପିନ୍ଦରଙ୍କ ବ୍ୟତୀତ କାରରେ ପୂର୍ବତନ ମନ୍ତ୍ରୀ ଜୟପ୍ରକାଶ, ବୀରେନ୍ଦ୍ର ସିଂହ, ଧର୍ମବୀର ଗୋୟତ, ନରେଶ ସେଲବାଲ ମଧ୍ୟ ବସିଥିଲେ । ତେବେ ଦୁର୍ଘଟଣାରେ କାହାର କିଛି କ୍ଷତି ହୋଇନଥିଲା । ଏହି ଦୁର୍ଘଟଣା ପରେ ହୁଦା ଏକ ଟ୍ୱିଟ କରି ଏ ବାବଦରେ ସୂଚନା ଦେଇଛନ୍ତି । ଈଶ୍ୱରଙ୍କ କୃପା ଓ ଜନସାଧାରଣଙ୍କ ଭଲପାଇବା କାରଣରୁ ସେ ଓ ତାଙ୍କ ଷ୍ଟାଫ ସମ୍ପୂର୍ଣ୍ଣ ସୁରକ୍ଷିତ ଥିବା ସେ କହିଛନ୍ତି ।
