୬୮ଟି ବିଧାନସଭା ଆସନ ପାଇଁ ହିମାଚଳ ପ୍ରଦେଶରେ ମତଦାନ ସରିଲା; ୬୬ ପ୍ରତିଶତ ଭୋଟିଂ
ନୂଆଦିଲ୍ଲୀ: ଶନିବାର ସକାଳ ୮ ଟାରୁ ଆରମ୍ଭ ହୋଇଥିବା ହିମାଚଳ ପ୍ରଦେଶର ୬୮ଟି ବିଧାନସଭା ଆସନ ପାଇଁ ନିର୍ଦ୍ଦାରିତ ସମୟ ଅନୁସାରେ ଶେଷ ହୋଇଛି। ଅପରାହ୍ନ ୫ ଟା ଯାଏ ୬୬ ପ୍ରତିଶତ ମତଦାନ ହୋଇଥିଲା। ଏବେ ଇଭିଏମରେ ପ୍ରାର୍ଥୀଙ୍କ ଭାଗ୍ୟ ସିଲ୍ ହୋଇଛି। ଡିସେମ୍ବର ୮ରେ ଖୋଲିବ ଇଭିଏମ୍। ତେବେ ଏହା ପୂର୍ବରୁ ୨୦୧୭ରେ ହୋଇଥିବା ବିଧାନସଭା ନିର୍ବାଚନରେ ୭୫.୫୭ ପ୍ରତିଶତ ମତଦାନ ହୋଇଥିଲା।
ରାଜ୍ୟରେ ୬୮ଟି ବିଧାନସଭା ଆସନ ପାଇଁ ୪୧୨ ଜଣ ପ୍ରାର୍ଥୀ ବିବାଦରେ ଅଛନ୍ତି। ୨୪ ମହିଳା ପ୍ରାର୍ଥୀ ମଧ୍ୟ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଛନ୍ତି। ରାଜ୍ୟରେ ୫୫ ଲକ୍ଷରୁ ଅଧିକ ପଞ୍ଜୀକୃତ ଭୋଟର ରହିଛନ୍ତି। ପୁରୁଷ ଭୋଟର ୨୮ ଲକ୍ଷ ୫୪ ହଜାର ୯୪୫ ଜଣ ରହିଥିବା ବେଳେ ୨୭ ଲକ୍ଷ ୩୭ ହଜାର ୮୪୫ ମହିଳା ଭୋଟର ରହିଛନ୍ତି।
ଚଳିତଥର ମଧ୍ୟ ବିଜେପି ଏବଂ କଂଗ୍ରେସ ମଧ୍ୟରେ କଡା ମୁକାବିଲା ହୋଇଛି। ଶାସକ ଦଳ ବିଜେପି ଦ୍ବିତୀୟ ଥର ବିଜୟୀ ହେବାକୁ ଲକ୍ଷ୍ୟ ରଖିଥିବା ବେଳେ କଂଗ୍ରେସ ୫ ବର୍ଷ ପରେ ପୁଣିଥରେ ସରକାରକୁ ଫେରିବାକୁ ଲକ୍ଷ୍ୟ ରଖିଛି। ତେଣୁ ଭୋଟ୍ ପୂର୍ବରୁ କଂଗ୍ରେସ ଅପିଲ କିରଥିଲା ଯେ ଯେ ରାଜ୍ୟବାସୀ ପୁରୁଣା ପରମ୍ପରାକୁ ବଜାୟ ରଖନ୍ତୁ ଏବଂ ପୁଣିଥରେ ତାଙ୍କୁ ସରକାର ଗଢିବାକୁ ସୁୁଯୋଗ ଦିଅନ୍ତୁ। ସେହିପରି ଆମ୍ ଆଦମୀ ପାର୍ଟି ମଧ୍ୟ ୬୮ଟି ସିଟ ମଧ୍ୟରୁ ୬୭ ଟି ଆସନରେ ପ୍ରାର୍ଥୀ ଦେଇଥିବା ବେଳେ ବିଏସପି ୫୩ ଟି ଆସନରେ ପ୍ରାର୍ଥୀ ଦେଇଛି।
ମାଣ୍ଡିରେ ମୁଖ୍ୟମନ୍ତ୍ରୀ ଜୟରାମ ଠାକୁର ତାଙ୍କ ପତ୍ନୀ ଏବଂ ଝିଅଙ୍କ ସହ ଭୋଟ୍ ଦେଇଥିଲେ। ଅନ୍ୟପକ୍ଷରେ ହିମାଚଳ ପ୍ରଦେଶ କଂଗ୍ରେସ ମୁଖ୍ୟ ପ୍ରତୀଭା ସିଂ ଏବଂ ତାଙ୍କ ପୁଅ ବିକ୍ରମଦିତ୍ୟ ସିଂ ରାମପୁରରେ ଭୋଟ୍ ଦେଇଛନ୍ତି। ଏହାପୂର୍ବରୁ ସେ ଶିମଲାର ଶାନି ମଣ୍ଡପରେ ପୂଜା କରିଥିଲେ। ପୂର୍ବତନ ମୁଖ୍ୟମନ୍ତ୍ରୀ ପ୍ରେମ କୁମାର ଧୁମଲ, ତାଙ୍କ ପୁଅ ତଥା କେନ୍ଦ୍ର ମନ୍ତ୍ରୀ ଅନୁରାଗ ଠାକୁର ଏବଂ ପରିବାରର ଅନ୍ୟ ସଦସ୍ୟମାନେ ହମିରପୁରରେ ଭୋଟ୍ ଦେଇଛନ୍ତି। ପୂର୍ବତନ କେନ୍ଦ୍ର ମନ୍ତ୍ରୀ ଆନନ୍ଦ ଶର୍ମା ଶିମଲାରେ ଭୋଟ୍ ଦେଇଥିବାବେଳେ ବିରୋଧୀ ଦଳର ନେତା ମୁକେଶ ଅଗ୍ନିହୋତ୍ରୀ ଏବଂ ତାଙ୍କ ପରିବାର ହରୋଲିରେ ଭୋଟ୍ ଦେଇଛନ୍ତି ଯେଉଁଠାରୁ ସେ ପ୍ରତିଦ୍ୱନ୍ଦ୍ୱିତା କରୁଛନ୍ତି।
ସେହିପରି ବିଜେପି ସଭାପତି ଜେପି ନଡ୍ଡା ବିଲାସପୁରରେ ପରିବାର ସଦସ୍ୟଙ୍କ ସହ ଭୋଟ୍ ଦେଇଥିବାବେଳେ ପୂର୍ବତନ ମୁଖ୍ୟମନ୍ତ୍ରୀ ଶାନ୍ତ କୁମାର ମଧ୍ୟ ଭୋଟ୍ ଦେଇଛନ୍ତି।
