ଦାଦରର ଶିବାଜୀ ପାର୍କ ଶ୍ମଶାନରେ ବରିଷ୍ଠ ଚଳଚ୍ଚିତ୍ର ନିର୍ମାତା ଶ୍ୟାମ ବେନେଗାଲଙ୍କ ଶେଷକୃତ୍ୟ ସମ୍ପନ୍ନ
ମଙ୍ଗଳବାର ଅପରାହ୍ନରେ ଦାଦରର ଶିବାଜୀ ପାର୍କ ଶ୍ମଶାନରେ ବରିଷ୍ଠ ଚଳଚ୍ଚିତ୍ର ନିର୍ମାତା ଶ୍ୟାମ ବେନେଗାଲଙ୍କ ଶେଷକୃତ୍ୟ ସମ୍ପନ୍ନ ହୋଇଛି। ୯୦ ବର୍ଷୀୟ ଫିଲ୍ମ ନିର୍ମାତା ଗତକାଲି ସନ୍ଧ୍ୟାରେ ମୁମ୍ବାଇର ଏକ ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଥିଲେ, ଯେଉଁଠାରେ ତାଙ୍କର କିଡନୀ ରୋଗ ପାଇଁ ଚିକିତ୍ସା କରାଯାଉଥିଲା।ଶ୍ୟାମ ବେନେଗାଲଙ୍କ ପତ୍ନୀ ନିରା ଏବଂ ଝିଅ ପିୟାଙ୍କ ସହ ତାଙ୍କର ଅନେକ ସମକାଳୀନ ଏବଂ କଳାକାର ତାଙ୍କ ଶେଷ ଦର୍ଶନ କରିଥିଲେ। ଅନ୍ତିମ ସଂସ୍କାରରେ ନସିରୁଦ୍ଦିନ ଶାହା, ଗୁଲଜାର, ଜାଭେଦ ଅଖତର, ଇଲା ଅରୁଣ, ଶିବେନ୍ଦ୍ର ସିଂ ଡୁଙ୍ଗରପୁର, ଦିବ୍ୟା ଦତ୍ତା, ଶ୍ରେୟସ ତଲପଡେ, ବୋମନ ଇରାନୀ, କୁନାଲ କପୁର ଏବଂ ଅନଙ୍ଗ ଦେଶାଇ ପ୍ରମୁଖ ଉପସ୍ଥିତ ଥିଲେ।
ଭାରତରେ ସମାନ୍ତରାଳ ସିନେମାର ଅଗ୍ରଣୀ ଶ୍ୟାମ ବେନେଗାଲ ଅଙ୍କୁର, ମଣ୍ଡି, ନିଶାନ୍ତ ଏବଂ ଜୁନୁନ ଭଳି କାଳଜୟୀ କ୍ଲାସିକ ଚଳଚ୍ଚିତ୍ର ପାଇଁ ଜଣାଶୁଣା ଥିଲେ। ଜାତୀୟ ତଥା ଅନ୍ତର୍ଜାତୀୟ ସ୍ତରରେ ତାଙ୍କର କାର୍ଯ୍ୟ ପାଇଁ ତାଙ୍କୁ ଅନେକ ପୁରସ୍କାର ଏବଂ ସ୍ୱୀକୃତି ମିଳିଥିଲା। ଅନେକ ଚଳଚ୍ଚିତ୍ର ପାଇଁ ଜାତୀୟ ଚଳଚ୍ଚିତ୍ର ପୁରସ୍କାର ଜିତିବା ସହିତ ଶ୍ରୀ ବେନେଗାଲଙ୍କୁ ୧୯୭୬ରେ ପଦ୍ମଶ୍ରୀ ଏବଂ ୧୯୯୧ରେ ପଦ୍ମଭୂଷଣ ସମ୍ମାନରେ ସମ୍ମାନିତ କରାଯାଇଥିଲା। ୨୦୦୫ ମସିହାରେ ଏହି ବରିଷ୍ଠ ଚଳଚ୍ଚିତ୍ର ନିର୍ମାତାଙ୍କୁ ସିନେମା କ୍ଷେତ୍ରରେ ଭାରତର ସର୍ବୋଚ୍ଚ ପୁରସ୍କାର ଦାଦାସାହେବ ଫାଲକେ ପୁରସ୍କାରରେ ସମ୍ମାନିତ କରାଯାଇଥିଲା।
