ସିନ୍ଦେ ସରକାରଙ୍କ ମହାରାଷ୍ଟ୍ର ବଜେଟ: ଚାଷୀଙ୍କୁ ବାର୍ଷିକ ୬ହଜାର ଟଙ୍କା ମିଳିବ, ମହିଳାଙ୍କ ପାଇଁ ବସ ଭଡ଼ା ଅଧା ହେବ

ମୁମ୍ବାଇ: ଚାଷୀଙ୍କୁ ବାର୍ଷିକ ୬ହଜାର ଟଙ୍କା ମିଳିବା ସହ ମହିଳାଙ୍କ ପାଇଁ ଅଧା ହେବ ବସ ଭଡ଼ା। ବାର୍ଷିକ ବଜେଟରେ ଘୋଷଣା କଲେ ସିନ୍ଦେ ସରକାର। ମହାରାଷ୍ଟ୍ର ସରକାରରେ ଅର୍ଥମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଗୁରୁବାର ବିଧାନସଭାରେ ରାଜ୍ୟର ବାର୍ଷିକ ବଜେଟ୍ ୨୦୨୩-୨୪ ଉପସ୍ଥାପନ କରିଛନ୍ତି। ଉଦ୍ଧବ ଠାକରେଙ୍କ ନେତୃତ୍ୱାଧୀନ ଏମଭିଏ ସରକାରକୁ କ୍ଷମତାରୁ ହଟାଇ ସିନ୍ଦେ ସରକାର କ୍ଷମତାକୁ  ଆସିବାର ୮ମାସ ପରେ ଏହା ସିନ୍ଦେ-ବିଜେପି ସରକାରଙ୍କ ପ୍ରଥମ ବଜେଟ୍। ଏହି ବଜେଟରେ ସରକାର ଅନେକ ବଡ ଘୋଷଣା କରିଛନ୍ତି। ବଜେଟରେ କୃଷକ, ମହିଳା, ଆଦିବାସୀ ଏବଂ ଓବିସି, ଭିତ୍ତିଭୂମି ବିକାଶ, ରୋଜଗାର ସୃଷ୍ଟି ଏବଂ ପରିବେଶ ବିକାଶ ଉପରେ ବିଶେଷ ଧ୍ୟାନ ଦିଆଯାଇଛି।

ମହାରାଷ୍ଟ୍ରରେ ଗୋବଂଶ ଆୟୋଗ ଗଠନ କରାଯିବ, ଯାହାର ନାଁ ରହିବ ମହାରାଷ୍ଟ୍ର ଗୋସେବା ଆୟୋଗ। ସ୍ୱଦେଶୀ ଗାଈମାନଙ୍କର ସୁରକ୍ଷା, ରକ୍ଷଣାବେକ୍ଷଣ ଏବଂ ସୁରକ୍ଷା ପାଇଁ ରାଜ୍ୟରେ ଏହି ଆୟୋଗ ଗଠନ କରାଯିବ, ଏଥିପାଇଁ ଏକ ସ୍ୱତନ୍ତ୍ର ବ୍ୟବସ୍ଥା କରାଯାଇଛି। ଏହା ବ୍ୟତୀତ ମହିଳାମାନେ ସରକାରୀ ବସରେ ଟିକେଟ୍ ଉପରେ ୫୦% ରିହାତି ପାଇବେ। ପୁଣେରେ ୫୦ଲକ୍ଷ ଟଙ୍କାରେ ଶିବାଜୀ ମହାରାଜଙ୍କୁ ଉତ୍ସର୍ଗୀକୃତ ଏକ ସ୍ୱତନ୍ତ୍ର ଥିମ୍ ପାର୍କ ନିର୍ମାଣ କରାଯିବ। କେନ୍ଦ୍ର ସରକାରଙ୍କ ଯୋଜନାରେ କୃଷକମାନେ ପ୍ରତିବର୍ଷ ୬ହଜାର ଟଙ୍କା ପାଇବେ। ଦୁର୍ଘଟଣାର ଶିକାର ହୋଇଥିବା ଚାଷୀଙ୍କୁ ରାଜ୍ୟ ସରକାର ଦୁଇ ଲକ୍ଷ ଟଙ୍କା କ୍ଷତିପୂରଣ ଦେବେ। ଆଶା ସ୍ବେଚ୍ଛାସେବୀମାନଙ୍କ ଦରମା ୩୫୦୦ରୁ ୫୦୦୦ଟଙ୍କାକୁ ବୃଦ୍ଧି କରାଯିବା ସହ ଅଙ୍ଗନୱାଡି କର୍ମୀଙ୍କ ଦରମା ୮୩୨୫ରୁ ୧୦ ହଜାରକୁ ବୃଦ୍ଧି କରାଯାଇଛି।