ଗୋଟିଏ ପରିଚୟ ପତ୍ରରେ ମିଳିବ ୫ଟି ସିମ୍ କାର୍ଡ
ନୂଆଦିଲ୍ଲୀ: ମୋବାଇଲ ଫୋନ୍ ଯୋଗେ ଆର୍ଥତ୍କ ଜାଲିଆତି ଓ ଠକେଇ ବଢ଼ୁଥିବାରୁ ଏହାକୁ ବନ୍ଦ କରିବା ଲାଗି ଟେଲିକମ୍ୟୁନିକେଶନ ବିଭାଗ ସିମ୍ କାର୍ଡଗୁଡ଼ିକର ନୋ ୟୋର୍ କଷ୍ଟମର (କେୱାଇସି) ଯାଞ୍ଚ କରିବା ପାଇଁ ଯୋଜନା କରିଛି। ଏହାଦ୍ୱାରା ଜାଲ୍ ସିମ୍ କାର୍ଡଗୁଡ଼ିକୁ ଚିହ୍ନଟ କରାଯାଇପାରିବ ବୋଲି ଏକ ସୂତ୍ରରୁ ଜଣାପଡ଼ିଛି। ନୂଆ କେୱାଇସି ନିୟମାବଳୀରେ ସିମ୍ କାର୍ଡ ଇସ୍ୟୁ ସଂଖ୍ୟାକୁ କମାଇ ଦିଆଯିବ। ଏବେ ଗୋଟିଏ ପରିଚୟ ପତ୍ରରେ ୯ଟି ସିମ୍ କାର୍ଡ ଇସ୍ୟୁ କରାଯାଇ ପାରୁଥିବାବେଳେ ଏହାକୁ ୫କୁ ହ୍ରାସ କରାଯିବ। ସିମ୍ କାର୍ଡ ଇସ୍ୟୁ ପାଇଁ ଡିଜିଟାଲି ଯାଞ୍ଚ ହୋଇଥିବା ଦସ୍ତାବିଜ୍କୁ ବ୍ୟବହାର କରାଯିବ। ସିମ୍ କାର୍ଡର ଦୁରୁପଯୋଗ କରୁଥିଲେ କିମ୍ବା ଉକ୍ତ କାର୍ଡ ପାଇବା ପାଇଁ ଜାଲ୍ ଦସ୍ତାବିଜ ଦେଇଥିଲେ, ଜରିମାନା ସାଙ୍ଗକୁ ଜେଲଦଣ୍ଡ ବ୍ୟବସ୍ଥା ରହିବ।
ଭାରତର ରିଜର୍ଭ ବ୍ୟାଙ୍କ (ଆର୍ବିଆଇ), ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରଣାଳୟ ଏବଂ ଅନ୍ୟାନ୍ୟ ସରକାରୀ ପ୍ରତିନିଧିଙ୍କ ସହ ବିଚାରବିମର୍ଶ କରି ଟେଲିକମ୍ ବିଭାଗର ଆର୍ଟିଫିସିଆଲ ଇଣ୍ଟେଲିଜେନ୍ସ ଏବଂ ଡିଜିଟାଲ ଇଣ୍ଟେଲିଜେନ୍ସ ୟୁନିଟ୍ ୬ ମାସ ମଧ୍ୟରେ ନୂଆ କେୱାଇସି ନିୟମାବଳୀ ଉପରେ ବିଜ୍ଞପ୍ତି ପ୍ରକାଶ କରିବ। କଓ୍ବୋଇସି ନିୟମାବଳୀରେ ପରିବର୍ତ୍ତନ ସହ ଦୁଇ ମାସ ମଧ୍ୟରେ ଟେଲିକମ୍ ଆନାଲିଟିକ୍ସ ଫର୍ ଫ୍ରଡ୍ ମ୍ୟାନେଜମେଣ୍ଟ ଆଣ୍ଡ କଞ୍ଜୁମର ପ୍ରୋଟେକ୍ସନ (ଟିଏଏଫ୍-ସିଓପି) ପୋର୍ଟାଲ ବିଭାଗ ପକ୍ଷରୁ ସାରା ଦେଶରେ ଲଞ୍ଚ୍ କରାଯିବ। ଏବେ ଏହି ପୋର୍ଟାଲ ଆନ୍ଧ୍ରପ୍ରଦେଶ, କେରଳ, ରାଜସ୍ଥାନ, ତେଲଙ୍ଗାନା, ଜମ୍ମୁ-କଶ୍ମୀର ଆଦି ରାଜ୍ୟରେ ସକ୍ରିୟ ରହିଛି। ଜଣେ ଗ୍ରାହକଙ୍କ ନାମରେ କୋତୋଟି ମୋବାଇଲ ସଂଯୋଗ କାର୍ଯ୍ୟ କରୁଛି, ତାହା ଏହି ପୋର୍ଟାଲ ଜଣାଇଦେବ। ଗ୍ରାହକଙ୍କ ଜ୍ଞାତସାର ବିନା ଯଦି ତାଙ୍କ ନାମରେ ଅତିରିକ୍ତ ମୋବାଇଲ ସଂଯୋଗ ଥାଏ, ତେବେ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେହିପରି ସେଣ୍ଟ୍ରାଲ ଇକ୍ୱିପ୍ମେଣ୍ଟ ଆଇଡେଣ୍ଟିଟି ରେଜିଷ୍ଟର (ସିଇଆଇଆର୍) ପୋର୍ଟାଲ ଟେଲିକମ୍ ଅପରେଟରମାନଙ୍କ ପାଇଁ ଏକ କେନ୍ଦ୍ରୀୟ ସିଷ୍ଟମ ଭାବେ କାର୍ଯ୍ୟ କରିବ। ଏହା କଳାତାଲିକାଭୁକ୍ତ ମୋବାଇଲ ଡିଭାଇସ୍ଗୁଡ଼ିକୁ ସେମାନଙ୍କ ମଧ୍ୟରେ ଶେୟାର କରିବ। ଯାହା ଫଳରେ ଗୋଟିଏ ନେଟ୍ଓ୍ବର୍କରେ ବ୍ଲାକ୍ଲିଷ୍ଟ ହୋଇଥିବା ମୋବାଇଲ ଫୋନ୍ ଅନ୍ୟ ନେଟ୍ଓ୍ବର୍କରେ କାର୍ଯ୍ୟ କରିବ ନାହିଁ, ଏପରିକି ସିମ୍ କାର୍ଡ ବଦଳାଇଲେ ମଧ୍ୟ ହେବ ନାହିଁ। ଉକ୍ତ ପୋର୍ଟାଲ ବ୍ୟବହାର କରି ୟୁଜରମାନେ ସେମାନଙ୍କ ଡିଭାଇସ୍ର ପ୍ରାମାଣିକତା ଯାଞ୍ଚ କରିପାରିବେ ଏବଂ ଏହା ଚୋରି ମୋବାଇଲ ସେଟ୍ ହୋଇଥିଲେ ରିପୋର୍ଟ କରିପାରିବେ। ୨୦୧୯ରେ ଲଞ୍ଚ ହୋଇଥିବା ସିଇଆଇଆର୍ ପୋର୍ଟାଲ ଗତ ମାସରେ ସାରା ଦେଶର ସମସ୍ତ ଉପଭୋକ୍ତାଙ୍କ ପାଇଁ ଉପଲବ୍ଧ ହୋଇଛି। ଜାଲ୍ ସିମ୍ କାର୍ଡ ଚିହ୍ନଟ କରି ସେଗୁଡ଼ିକୁ ବ୍ଲକ୍ କରିବା ଲାଗି ସରକାର ସାରା ଦେଶରେ ସିମ୍କାର୍ଡ ଗ୍ରାହକଙ୍କ ମୁହଁକୁ ଚିହ୍ନି ପାରୁଥିବା ଆର୍ଟିଫିସିଆଲ ଇଣ୍ଟେଲିଜେନ୍ସ କ୍ଷମତାଯୁକ୍ତ ବ୍ୟବସ୍ଥା (ଏଏସ୍ଟିଆର୍) କାର୍ଯ୍ୟକାରୀ କରୁଛନ୍ତି। ହରିୟାଣାର ମଓ୍ବୋତ୍ରେ ଏହାକୁ ପାଇଲଟ୍ ପ୍ରୋଗ୍ରାମ ଭାବେ ଆରମ୍ଭ କରାଯାଇଥିଲା।
ଜାଲ୍ ଦସ୍ତାବିଜ୍ ଆଧାରରେ ତୃତୀୟ ପକ୍ଷ ନାମରେ ଅନେକ ସିମ୍ କାର୍ଡ ଇସ୍ୟୁ କରାଯାଉଛି। ଏହି ସିମ୍ କାର୍ଡଗୁଡ଼ିକ ସାଇବର କ୍ରାଇମ୍ରେ ବ୍ୟବହୃତ ହେଉଛି, ଯାହାକୁ ଚିହ୍ନଟ କରିବା କଷ୍ଟକର। ତେବେ ଜଣେ ଉପଭୋକ୍ତାଙ୍କ ସମାନ ଫଟୋକୁ ବିଭିନ୍ନ ନାମରେ ବ୍ୟବହାର କରାଯାଇଥିଲେ, ଏଏସ୍ଟିଆର୍ ବ୍ୟବହାର କରି ତାହାକୁ ଧରିହେବ। ଏହା ସମ୍ପୃକ୍ତ ବ୍ୟକ୍ତିଙ୍କ ଠିକଣା ଓ ଅନ୍ୟାନ୍ୟ କଓ୍ବୋଇସି ବିବରଣୀର ମଧ୍ୟ ଯାଞ୍ଚ କରିବ। ୨୦୨୧ ସେପ୍ଟେମ୍ବରରେ ଟେଲିକମ୍ରେ ସଂସ୍କାର ଅଣାଯାଇ ସିମ୍ କାର୍ଡ ଇସ୍ୟୁ ପାଇଁ ଆଧାରଭିତ୍ତିକ ଇ-କଓ୍ବୋଇସି ପ୍ରକ୍ରିୟାର ବ୍ୟବସ୍ଥା ଆରମ୍ଭ ହୋଇଥିଲା। ଆଗକୁ କଓ୍ବୋଇସି ନିୟମାବଳୀରେ ପରିବର୍ତ୍ତନ ତାହାର ପରିବର୍ଦ୍ଧିତ ରୂପ। ବର୍ତ୍ତମାନ ୯୭ ପ୍ରତିଶତ ସିମ୍ କାର୍ଡ ଡିଜିଟାଲି ଯାଞ୍ଚ ହୋଇଥିବା ଦସ୍ତାବିଜ୍ରେ ଦିଆଯାଉଛି। ସାଇବର ଜାଲିଆତି ବନ୍ଦ କରିବାକୁ ହେଲେ ଏହି ଟାର୍ଗେଟକୁ ୧୦୦ ପ୍ରତିଶତ କରିବାକୁ ହେବ ବୋଲି ଜଣେ ଅଧିକାରୀ କହିଛନ୍ତି।
