ଲୋକ ପ୍ରତିନିଧୀ ଆଇନର ବ୍ୟବସ୍ଥାକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଦାୟର ହେଲା ପିଟିସନ
ନୂଆଦିଲ୍ଲୀ: ମାନହାନୀ ମାମଲାରେ ସୁରଟ କୋର୍ଟ ରାହୁଲ ଗାନ୍ଧୀଙ୍କୁ ଦୋଷୀ ସାବ୍ୟସ୍ତ କରି ଦୁଇ ବର୍ଷ ଦଣ୍ଡାଦେଶ ଜାରି କରିଛି । ଏହା ପରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ସଂସଦ ସଦସ୍ୟତା ମଧ୍ୟ ବାତିଲ କରାଯାଇଛି । ଏବେ ସଦସ୍ୟତା ରଦ୍ଦ କରିବାର ବ୍ୟବସ୍ଥା ବିରୋଧରେ ସୁପ୍ରିମକୋର୍ଟରେ ଏକ ପିଟିସନ ଦାଖଲ କରିଛନ୍ତି । ରାହୁଲ ଗାନ୍ଧୀଙ୍କ ମାମଲା ଦର୍ଶାଇ କେରଳର ବାସିନ୍ଦା ଆଭା ମୁରଲିଧରନ୍ ସର୍ବୋଚ୍ଚ ନ୍ୟାୟାଳୟରେ ଏକ ପିଟିସନ ଦାଖଲ କରିଛନ୍ତି। ଏହି ପିଟିସନରେ ମହିଳା ଦାବି କରିଛନ୍ତି ଯେ ଲୋକ ପ୍ରତିନିଧୀ ଅଧିନିୟମର ଧାରା ୮(୩) କୁ ଅସାମ୍ବିଧାନିକ ଘୋଷିତ କରାଯାଉ।
ସୂଚନାମୁତାବକ କେରଳର ୱାୟାନାଡ ସଂସଦୀୟ ଆସନରୁ ପ୍ରତିନିଧିତ୍ୱ କରୁଥିବା ରାହୁଲ ଗାନ୍ଧୀ ଶୁକ୍ରବାର ଲୋକସଭା ସଦସ୍ୟତା ପାଇଁ ଅଯୋଗ୍ୟ ହୋଇଥିଲେ। ଲୋକସଭା ସଚିବାଳୟ ଦ୍ୱାରା ଜାରି ବିଜ୍ଞପ୍ତିରେ କୁହାଯାଇଛି ଯେ ମାର୍ଚ୍ଚ ୨୩ ରୁ ତାଙ୍କର ଅଯୋଗ୍ୟତା ଆଦେଶ କାର୍ଯ୍ୟକାରୀ ହେବ। ବିଜ୍ଞପ୍ତିରେ ଦର୍ଶାଯାଇଛି ଯେ ସେ (ରାହୁଲ ଗାନ୍ଧୀ) ସମ୍ବିଧାନର ଧାରା ୧୦୨ (୧) ଏବଂ ଲୋକ ପ୍ରତିନିଧୀ ଅଧିନିୟମ, ୧୯୫୧ ର ଧାରା ୮ ଅନୁଯାୟୀ ଅଯୋଗ୍ୟ ହୋଇଛନ୍ତି।
ଲୋକ ପ୍ରତିନିଧୀ ଅଧିନିୟମ, ୧୯୫୧ଅନୁଯାୟୀ, ଦୁଇ ବର୍ଷ କିମ୍ବା ତା’ଠାରୁ ଅଧିକ କାରାଦଣ୍ଡରେ ଦଣ୍ଡିତ ହୋଇଥିବା ବ୍ୟକ୍ତିଙ୍କୁ ‘ଦୋଷୀ ସାବ୍ୟସ୍ତ ତାରିଖରୁ’ ଅଯୋଗ୍ୟ କରାଯାଇଛି। ଏହା ସହିତ, ସେହି ବ୍ୟକ୍ତି ଦଣ୍ଡ ସମାପ୍ତ ହେବା ପରେ ୬ବର୍ଷ ପର୍ଯ୍ୟନ୍ତ ଜନ ପ୍ରତିନିଧୀ ହେବାକୁ ଅଯୋଗ୍ୟ ରହିବେ।ଏଥିରୁ ସ୍ପଷ୍ଟ ଯେ ଯଦି ଏହି ଦଣ୍ଡାଦେଶକୁ ସମର୍ଥନ କରାଯାଏ ତେବେ ବ୍ୟକ୍ତି କୌଣସି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରିବେ ନାହିଁ।
ସୂଚନାଯୋଗ୍ୟ ଯେ ମାର୍ଚ୍ଚ ୨୩ ରେ ସୁରଟର ଏକ କୋର୍ଟ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ତାଙ୍କ ‘ମୋଦୀ ଉପନାମ’ ମନ୍ତବ୍ୟ ପାଇଁ ୨୦୧୯ ରେ ଦାଖଲ ହୋଇଥିବା ଅପରାଧିକ ମାନହାନୀ ମାମଲାରେ ଦୁଇ ବର୍ଷ କାରାଦଣ୍ଡରେ ଦଣ୍ଡିତ କରିଛନ୍ତି। ତେବେ ଶୁଣାଣି ସମୟରେ କୋର୍ଟ ରାହୁଲ ଗାନ୍ଧୀଙ୍କୁ ଜାମିନ ପ୍ରଦାନ କରିଛନ୍ତି।
