ବିଭିନ୍ନ ଦେଶରେ ଭାରତକୁ ପ୍ରତିନିଧିତ୍ୱ କରୁଥିବା ବିଭିନ୍ନ ପ୍ରତିନିଧିମଣ୍ଡଳର ସଦସ୍ୟମାନଙ୍କୁ ଭେଟିଲେ ପ୍ରଧାନମନ୍ତ୍ରୀ

ମଙ୍ଗଳବାର ଆତଙ୍କବାଦ ପ୍ରସଙ୍ଗରେ ପାକିସ୍ତାନର ପର୍ଦ୍ଦାଫାସ କରି ଭାରତ ଫେରିଥିବା ସର୍ବଦଳୀୟ ପ୍ରତିନିଧିମଣ୍ଡଳୀକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭେଟିଛନ୍ତି। କିନ୍ତୁ, ଅଲ୍ ଇଣ୍ଡିଆ ମଜଲିସ୍-ଏ-ଇତେହାଦୁଲ୍ ମୁସଲିମିନ୍ (AIMIM) ମୁଖ୍ୟ ତଥା ହାଇଦ୍ରାବାଦ ସାଂସଦ ଅସଦୁଦ୍ଦିନ୍ ଓୱେସି ବୈଠକରେ ଯୋଗ ଦେଇ ନାହାନ୍ତି।

ଏହି ପ୍ରତିନିଧିମଣ୍ଡଳୀଗୁଡ଼ିକରେ ବିଭିନ୍ନ ଦଳର ସାଂସଦ, ପୂର୍ବତନ ସାଂସଦ ଏବଂ ପ୍ରଖ୍ୟାତ କୂଟନୀତିଜ୍ଞ ସାମିଲ ଥିଲେ। ପ୍ରତିନିଧିମଣ୍ଡଳ ବିଦେଶ ଗସ୍ତ ସମୟରେ ଆତଙ୍କବାଦ ବିରୋଧରେ ଭାରତର କଠୋର ମନୋଭାବ ଏବଂ ବିଶ୍ୱ ଶାନ୍ତି ପ୍ରତି ଭାରତର ପ୍ରତିବଦ୍ଧତାକୁ ସେମାନେ ଦୁନିଆ ସାମ୍ନାରେ ରଖିଥିଲେ। ପ୍ରଧାନମନ୍ତ୍ରୀ ମୋଦୀ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ କହିଛନ୍ତି, “ବିଭିନ୍ନ ଦେଶରେ ଭାରତକୁ ପ୍ରତିନିଧିତ୍ୱ କରୁଥିବା ବିଭିନ୍ନ ପ୍ରତିନିଧିମଣ୍ଡଳର ସଦସ୍ୟମାନଙ୍କୁ ଭେଟିଛି। ଶାନ୍ତି ପ୍ରତି ଭାରତର ପ୍ରତିବଦ୍ଧତା ଏବଂ ଆତଙ୍କବାଦର ବିପଦକୁ ଦୂର କରିବାର ଆବଶ୍ୟକତା ଉପରେ ସେମାନଙ୍କ ସହ ବିସ୍ତୃତ ଆଲୋଚନା କରିଛି। ପ୍ରତିନିଧିମଣ୍ଡଳର ସଦସ୍ୟ ଭାରତର ସ୍ଵର ଓ ଆଭିମୁଖ୍ୟକୁ ଦୁନିଆ ସାମ୍ନାରେ ଗର୍ବର ସହ ରଖିଛନ୍ତି।

ପ୍ରଧାନମନ୍ତ୍ରୀଙ୍କ ବୈଠକ ପୂର୍ବରୁ, ବୈଦେଶିକ ମନ୍ତ୍ରୀ ଏସ ଜୟଶଙ୍କର ଭାରତ ଫେରିବା ପରେ ସର୍ବଦଳୀୟ ପ୍ରତିନିଧି ଦଳକୁ ଭେଟିଥିଲେ। ପ୍ରତିନିଧି ଦଳରେ ୫୦ରୁ ଅଧିକ ଲୋକ ଥିଲେ। ଏହି ପ୍ରତିନିଧି ଦଳ ମଧ୍ୟରେ ଅଧିକାଂଶ ଥିଲେ ବର୍ତ୍ତମାନର ସାଂସଦ, ପୂର୍ବତନ ସାଂସଦ ଏବଂ ପୂର୍ବତନ କୂଟନୀତିଜ୍ଞ। ଆତଙ୍କବାଦ ଉପରେ ଭାରତର ମତ ଜଣାଇବା ପାଇଁ ସାତଟି ପ୍ରତିନିଧି ଦଳ ୩୩ଟି ଦେଶ ଏବଂ ୟୁରୋପୀୟ ସଂଘ ଗସ୍ତ କରିଥିଲେ।ପ୍ରତିନିଧି ଦଳଗୁଡ଼ିକ ସାଉଦି ଆରବ, କୁଏତ, ବାହାରିନ, ଆଲଜେରିଆ, ବ୍ରିଟେନ, ଫ୍ରାନ୍ସ, ଜର୍ମାନୀ, ଇଟାଲୀ, ଡେନମାର୍କ, ଇଣ୍ଡୋନେସିଆ, ମାଲେସିଆ, ଦକ୍ଷିଣ କୋରିଆ, ଜାପାନ, ସିଙ୍ଗାପୁର, ସଂଯୁକ୍ତ ଆରବ ଏମିରେଟ୍ସ, ଲାଇବେରିଆ, କଙ୍ଗୋ, ସିଏରା ଲିଓନ, ଯୁକ୍ତରାଷ୍ଟ୍ର, ପାନାମା, ଗୟାନା, ବ୍ରାଜିଲ, କଲମ୍ବିଆ, ସ୍ପେନ, ଗ୍ରୀସ, ସ୍ଲୋଭେନିଆ, ଲାଟଭିଆ, ରୁଷ, ଇଜିପ୍ଟ, କତାର, ଇଥିଓପିଆ, ଦକ୍ଷିଣ ଆଫ୍ରିକା ଏବଂ ୟୁରୋପୀୟ ସଂଘ ଗସ୍ତ କରିଥିଲେ।