ପ୍ରଜ୍ଞାନ ରୋଭର କହିଲା- ‘ନମସ୍କାର ପୃଥିବୀ! ଆମେ ସୁସ୍ଥ ଅଛୁ..’
‘‘ନମସ୍କାର ପୃଥିବୀ! ଏହା ଚନ୍ଦ୍ରଯାନ-୩ର ପ୍ରଜ୍ଞାନ ରୋଭର। ମୁଁ ଆଶା କରୁଛି ତୁମେ ଭଲ କରୁଛ। ମୁଁ ସମସ୍ତଙ୍କୁ ଜଣାଇବାକୁ ଚାହୁଁଛି ଯେ ମୁଁ ଚନ୍ଦ୍ରର ରହସ୍ୟ ଉନ୍ମୋଚନ କରିବାକୁ ଯାଉଛି। ମୁଁ ମୋର ବନ୍ଧୁ ବିକ୍ରମ ଲାଣ୍ଡର ସହ ଯୋଗାଯୋଗରେ ଅଛି। ଆମେ ସୁସ୍ଥ ଅଛୁ। ଭଲ ଖବର ଖୁବ୍ ଶୀଘ୍ର ଆସିବ।’’
ଚନ୍ଦ୍ରଯାନ-୩ର ଅଫିସିଆଲ୍ ଏକ୍ସ (ଟୁଇଟର) ହ୍ୟାଣ୍ଡେଲ୍ ପ୍ରଜ୍ଞାନ ରୋଭରଠାରୁ ମିଳିଥିବା ଏହି ବାର୍ତ୍ତକୁ ପୋଷ୍ଟ କରିଛି। ସୋମବାର ପ୍ରଜ୍ଞାନ ରୋଭର ଚନ୍ଦ୍ର ପୃଷ୍ଠରେ ସ୍ଥିତି ଅନୁଧ୍ୟାନ ପାଇଁ ବାହାରିବାର ଠିକ୍ ପୂର୍ବରୁ ୪ ମିଟର ବ୍ୟାସ ବିଶିଷ୍ଟ ଏକ ଗର୍ତ୍ତ (କ୍ରେଟର)ର ସମ୍ମୁଖୀନ ହୋଇଥିଲା। ତା’ପରେ ଏହାକୁ ନୂତନ ମାର୍ଗ ଖୋଜିବା ପାଇଁ ନିର୍ଦ୍ଦେଶ ଦିଆଯାଇଥିଲା।
ଇସ୍ରୋ ଏକ୍ସରେ ପୋଷ୍ଟ କରି କହିଛି, ରୋଭରକୁ ପଥ ପୁନଃ ଟ୍ରାକ୍ କରିବାକୁ ନିର୍ଦ୍ଦେଶ ଦିଆଯାଇଥିଲା। ଭାରତୀୟ ମହାକାଶ ଏଜେନ୍ସି ‘ବିକ୍ରମ ଲ୍ୟାଣ୍ଡର’ରେ ଚନ୍ଦ୍ରର ସର୍ଫେସ୍ ଥର୍ମୋଫିଜିକାଲ୍ ଏକ୍ସପେରିମେଣ୍ଟ (ସିଏଏସ୍ଟିଇ)ର ପ୍ରଥମ ପର୍ଯ୍ୟବେକ୍ଷଣ ପ୍ରକାଶ କରିବାର ଗୋଟିଏ ଦିନ ପରେ ଏହା ଘଟିଛି।
ଚାଷ୍ଟେ (ଚନ୍ଦ୍ରର ଭୂପୃଷ୍ଠ ଥର୍ମୋଫିଜିକାଲ ଏକ୍ସପେରିମେଣ୍ଟ) ଚନ୍ଦ୍ରପୃଷ୍ଠର ଉତ୍ତାପ ଆଚରଣକୁ ବୁଝିବା ପାଇଁ ମେରୁ ଚାରିପଟେ ଚନ୍ଦ୍ରର ଶୀର୍ଷ ମାଟିର ତାପମାତ୍ରା ପ୍ରୋଫାଇଲ୍ ମାପିଥାଏ। ଭୂପୃଷ୍ଠ ତଳେ ୧୦ ସେଣ୍ଟିମିଟର ଗଭୀରତାରେ ପହଞ୍ଚିବାରେ ସକ୍ଷମ ଏକ ନିୟନ୍ତ୍ରିତ ଅନୁପ୍ରବେଶ ପ୍ରଣାଳୀ ସହିତ ଏହାର ଏକ ତାପମାତ୍ରା ‘ପ୍ରୋବ୍’ ରହିଛି। ଏହି ପ୍ରୋବରେ ୧୦ଟି ତାପମାତ୍ରା ସେନ୍ସର ଲଗାଯାଇଛି।
ଅଗଷ୍ଟ ୨୬ରେ ଇସ୍ରୋ କହିଥିଲା ଯେ ପ୍ରଜ୍ଞାନ ରୋଭର ଦକ୍ଷିଣ ମେରୁରେ ଚନ୍ଦ୍ରର ରହସ୍ୟ ଖୋଜିବା ପାଇଁ ‘ଶିବ ଶକ୍ତି ପଏଣ୍ଟ’ ଚାରିପଟେ ବୁଲୁଥିଲା। ଚନ୍ଦ୍ରଯାନ-୩ର ‘ବିକ୍ରମ’ ଲ୍ୟାଣ୍ଡରର ଟଚ୍ଡାଉନ୍ ପଏଣ୍ଟ (ଅବତରଣ ସ୍ଥାନ)କୁ ‘ଶିବ ଶକ୍ତି’ ବୋଲି କୁହାଯିବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଘୋଷଣା କରିଥିଲେ।
ବେଙ୍ଗାଲୁରୁସ୍ଥିତ ଇସ୍ରୋ ଟେଲିମେଟ୍ରି ଟ୍ରାକିଂ ଆଣ୍ଡ କମାଣ୍ଡ ନେଟୱାର୍କ ମିଶନ କଣ୍ଟ୍ରୋଲ କମ୍ପ୍ଲେକ୍ସରେ ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ଏହା ହେଉଛି ଭାରତ ଯାହା ଡାର୍କ ଜୋନ (ଅନ୍ଧକାର ଭିତର)କୁ ଯାଇ ଆଲୋକ ବିସ୍ତାର କରି ବିଶ୍ୱକୁ ଆଲୋକିତ କରିଥାଏ।
