ମଧ୍ୟାହ୍ନ ଭୋଜନରୁ ବାହାରିଲା ପୋକ: ସାର୍ କହିଲେ- ‘‘ପୋକରେ ଭିଟାମିନ୍ ଥାଏ, ଚୁପ୍ଚାପ୍ ଖାଅ’’
ବୈଶାଳି: ବିହାରର ବୈଶାଳି ଜିଲାରେ ଛାତ୍ରଛାତ୍ରୀଙ୍କ ମଧ୍ୟାହ୍ନ ଭୋଜନରୁ ବାହାରିଲା ପୋକ। ଯେତେବେଳେ ପିଲାମାନେ ଏନେଇ ପ୍ରଧାନଶିକ୍ଷକଙ୍କ ନିକଟରେ ଅଭିଯୋଗ କଲେ, ସେତେବେଳେ ସେ ଦେଇଥିଲେ ଆହୁରି ଅଦ୍ଭୁତ ଉତ୍ତର। ପ୍ରଧାନଶିକ୍ଷକ ପିଲାମାନଙ୍କୁ କହିଥିଲେ, ପୋକରେ ଭିଟାମିନ୍ ଥାଏ, ଚୁପ୍ଚାପ୍ ଖାଅ। କେବଳ ଏତିକି ନୁହେଁ, ଯେତେବେଳେ ଛାତ୍ରଛାତ୍ରୀମାନେ ଏପରି କରିବାକୁ ମନା କରିଦେଲେ, ଶିକ୍ଷକ ସେମାନଙ୍କ ମଧ୍ୟରୁ ଜଣଙ୍କର ହାତ ମଧ୍ୟ ଭାଙ୍ଗି ଦେଇଥିବା ଅଭିଯୋଗ ହୋଇଛି। ଏନେଇ ବିଦ୍ୟାଳୟରେ ପ୍ରବଳ ପାଟିତୁଣ୍ଡ ହେବା ପରେ ଶିକ୍ଷା ବିଭାଗ ପକ୍ଷରୁ ଘଟଣାର ଯାଞ୍ଚ କରାଯାଉଛି।
ବୈଶାଳି ଜିଲାର ଲାଲଗଞ୍ଜ ଅତତୁଲ୍ଲାହପୁର ସ୍ଥିତ ଏକ ମଧ୍ୟ ଇଂରାଜୀ ବିଦ୍ୟାଳୟରେ ଘଟିଛି ଏପରି ଘଟଣା। ଏଠାରେ ପିଲାଙ୍କୁ ମଧ୍ୟାହ୍ନ ଭୋଜନ ଦିଆ ଯାଇଥାଏ। ଶନିବାର ମଧ୍ୟ ଭୋଜନ ଦିଆ ଯାଇଥିଲା। କିନ୍ତୁ ଛାତ୍ରଛାତ୍ରୀମାନେ ଯେତେବେଳେ ଖାଦ୍ୟ ଖାଇବାକୁ ବସିଲେ, ସେତେବେଳେ ସେମାନେ ଭାତରେ ପୋକ ଦେଖିଥିଲେ। ଏନେଇ ସେମାନେ ପ୍ରଧାନଶିକ୍ଷକ ମୋ. ମିସୱାଉଦ୍ଦୀନଙ୍କ ନିକଟରେ ଅଭିଯୋଗ କରିଥିଲେ। ପିଲାଙ୍କୁ ଭଲ ଖାଦ୍ୟ ଦେବା ପରିବର୍ତ୍ତେ ପ୍ରଧାନଶିକ୍ଷକ ସେମାନଙ୍କୁ କିଛି ଅଲଗା ତଥା ଅଦ୍ଭୁତ ଉତ୍ତର ଦେଇଥିଲେ। ପ୍ରଧାନଶିକ୍ଷକ କହିଥିଲେ, ‘‘ପୋକରେ ଭିଟାମିନ୍ ଥାଏ, ଚୁପ୍ଚାପ୍ ଖାଅ’’। ଏହା ଶୁଣି ଛାତ୍ରଛାତ୍ରୀ ଆଶ୍ଚର୍ଯ୍ୟ ହୋଇଯାଇଥିଲେ।
ଛାତ୍ରଛାତ୍ରୀମାନେ ଖାଦ୍ୟ ଖାଇବାକୁ ମନା କରି ଦେଇଥିଲେ। ଏହାକୁ ନେଇ ପ୍ରଧାନଶିକ୍ଷକ ମୋ. ମିସୱାଉଦ୍ଦୀନ ସେମାନଙ୍କୁ ମାଡ଼ ମାରିଥିଲେ। ଏତେ ମାରିଥିଲେ ଯେ, ଜଣେ ଛାତ୍ରଙ୍କ ହାତ ଭାଙ୍ଗି ଯାଇଥିଲା। ଏହାକୁ ନେଇ ବିଦ୍ୟାଳୟରେ ଉତ୍ତେଜନା ଦେଖା ଦେଇଥିଲା। ଯେଉଁ ଛାତ୍ରର ହାତ ଭାଙ୍ଗିଥିଲା, ତାଙ୍କ ଅଭିଭାବକ ବିଦ୍ୟାଳୟକୁ ଆସି ହୋ ହାଲ୍ଲା କରିଥିଲେ।
ଶିକ୍ଷା ବିଭାଗ ଘଟଣା ସମ୍ପର୍କରେ ସୂଚନା ପାଇବା ପରେ ବରିଷ୍ଠ ଅଧିକାରୀମାନେ ଏକ ଟିମ୍ ଗଠନ କରି ବିଦ୍ୟାଳୟକୁ ତଦନ୍ତ ପାଇଁ ପଠାଇଥିଲେ। ଦଳରେ ସାମିଲ ଥିବା ଲାଲଗଞ୍ଜର ବ୍ଲକ ଶିକ୍ଷା ଅଧିକାରୀ ପର୍ଶୁରାମ ସିଂ ପିଲାମାନଙ୍କ ସହ କଥା ହୋଇଥିଲେ ଏବଂ ଯେଉଁ ଛାତ୍ରଙ୍କ ହାତ ଭାଙ୍ଗିଥିଲା ତାଙ୍କ ଡାକ୍ତରୀ ରିପୋର୍ଟ ମଧ୍ୟ ଦେଖିଥିଲେ। ତଦନ୍ତକାରୀ ଦଳ ଘଟଣାକୁ ଗୁରୁତର ସହ ନେଇଛନ୍ତି ଓ କହିଛନ୍ତି ଯେ ତଦନ୍ତ ଚାଲିଛି। ଯଦି ମାଡ଼ ମାରିବା ଅଭିଯୋଗ ସତ ପ୍ରମାଣିତ ହୁଏ, ତେବେ ପ୍ରଧାନଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଟିମ୍ କହିଛି।
