ଆଗାମୀ ଦିନରେ ଟ୍ରେନ ଭଡା ବୃଦ୍ଧି ପାଇବ
ନୂଆଦିଲ୍ଲୀ: ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ବୁଧବାର ଲୋକସଭାରେ ବୟାନ ଦେଇ ଆଗାମୀ ସମୟରେ ରେଳ ଭଡା ବୃଦ୍ଧି କରିବାକୁ ସୂଚାଇ ଦେଇଛନ୍ତି । ଅଶ୍ୱିନୀ ବୈଷ୍ଣବଙ୍କ ଏହି ବିବୃତ୍ତି ପରେ ଆଗାମୀ ଦିନରେ ଟ୍ରେନ ଭଡା ବୃଦ୍ଧି ପାଇବ ବୋଲି ଆଶା କରାଯାଉଛି । ଲୋକସଭାରେ ରେଳମନ୍ତ୍ରୀଙ୍କୁ କୋଭିଡ-୧୯ ପୂର୍ବରୁ ବରିଷ୍ଠ ନାଗରିକଙ୍କ ପାଇଁ ଟ୍ରେନ ଭଡା ଉପରେ ରିହାତି ପ୍ରଦାନ କରିବାକୁ କୁହାଯାଇଥିଲା । ଏହି ପ୍ରଶ୍ନର ଉତ୍ତରରେ ରେଳ ମନ୍ତ୍ରୀ କହିଛନ୍ତି ଯେ ବର୍ତ୍ତମାନ ଟ୍ରେନରେ ଯାତ୍ରା କରୁଥିବା ପ୍ରତ୍ୟେକ ଯାତ୍ରୀଙ୍କୁ ୫୫ ପ୍ରତିଶତ ରିହାତି ଦିଆଯାଉଛି ।
ସେ କହିଛନ୍ତି ଯେ ବର୍ତ୍ତମାନ ସମୟରେ ଜଣେ ରେଲୱେ ଯାତ୍ରୀଙ୍କ ଭଡା ପ୍ରତି କିଲୋମିଟରର ମୂଲ୍ୟ ପ୍ରାୟ ୧.୧୬ ଟଙ୍କା । ରେଲୱେ ଏଥିପାଇଁ କିଲୋମିଟର ପ୍ରତି ୪୫ ରୁ ୪୮ ପଇସା ଚାର୍ଜ କରିଥାଏ । ଗତ ବର୍ଷର ଆକଳନ ଅନୁଯାୟୀ ସେ କହିଛନ୍ତି ଯେ ରେଲୱେ ଦ୍ୱାରା ଯାତ୍ରୀ ଭଡା ଉପରେ ୫୯,୦୦୦ କୋଟି ଟଙ୍କା ସବସିଡି ଦିଆଯାଇଛି । ସେ କହିଛନ୍ତି ଯେ ରେଲୱେ ଯାତ୍ରୀମାନଙ୍କ ସୁବିଧା ପାଇଁ କ୍ରମାଗତ ଭାବରେ କାର୍ଯ୍ୟ କରୁଛି । ନୂତନ ରେଳ ଚଳାଚଳ ସହିତ ରେଳ ଲାଇନକୁ ବିସ୍ତାର କରାଯାଉଛି ।
ସେ ଆହୁରି ମଧ୍ୟ କହିଛନ୍ତି ଯେ ଆଗାମୀ ସମୟରେ ଯାତ୍ରୀମାନଙ୍କ ପାଇଁ ଅନେକ ନୂଆ ସୁବିଧା ଆସିବ । ଟ୍ରେନ ଭଡା ବୃଦ୍ଧିକୁ ଦର୍ଶାଇ ଆଗାମୀ ଦିନରେ ଆହୁରି ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି । ରେଳ ମନ୍ତ୍ରୀ କହିଛନ୍ତି ଯେ ବଡ଼ ବଡ଼ ଷ୍ଟେସନ ସହିତ ଅନ୍ୟ ଷ୍ଟେସନରେ ବର୍ତ୍ତମାନ କାମ ଚାଲିଛି ।
