ରାଜ୍ୟସଭାରୁ ନିଲମ୍ବିତ ହେଲେ ସାଂସଦ ରଜନୀ ପାଟିଲ
ନୂଆଦିଲ୍ଲୀ: ସଂସଦରେ ଫଟୋଗ୍ରାଫି କରିବା ମାମଲାରେ କଂଗ୍ରେସ ସାଂସଦ ରଜନୀ ପାଟିଲଙ୍କ ବିରୋଧରେ ପ୍ରମୁଖ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡ ବାକି ବଜେଟ୍ ଅଧିବେଶନ ପାଇଁ ରଜନୀ ପାଟିଲଙ୍କୁ ନିଲମ୍ବିତ କରିଛନ୍ତି । ତେବେ ଏହି ପ୍ରସଙ୍ଗରେ ରାଜ୍ୟସଭାରେ କଂଗ୍ରେସ ସାଂସଦଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସରକାରଙ୍କ ପକ୍ଷରୁ ଦାବି କରାଯାଇଥିଲା । ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡ଼ କହିଛନ୍ତି ଯେ, ରଜନୀ ପାଟିଲଙ୍କୁ ଏହି ଅଧିବେଶନର ଅବଶିଷ୍ଟ ଦିନ ପାଇଁ ନିଲମ୍ବିତ କରାଯାଇଛି ଏବଂ କମିଟିର ରିପୋର୍ଟ ଆସିବା ପର୍ଯ୍ୟନ୍ତ ସେ ଗୃହ ପ୍ରକ୍ରିୟାରେ ସାମିଲ ହେବେ ନାହିଁ ।
ଧାରା ୧୦୫ କୁ ଦର୍ଶାଇ ସେ କହିଛନ୍ତି ଯେ, ଯଦି କେହି କଣ୍ଟୁମ୍ ଅଫ୍ ହାଉସ୍, ହାଉସ୍ ଅଫ୍ ପ୍ରିଭିଲିଜ୍ କରନ୍ତି, ତେବେ ଏହାକୁ କିପରି ବରଦାସ୍ତ କରାଯିବ । ସୂଚନା ଅନୁଯାୟୀ, ଅଧିକାର କମିଟି ଏହି ଘଟଣାର ତଦନ୍ତ କରିବ । ଏଥି ସହିତ ଏହି କାର୍ଯ୍ୟ ପରେ ରଜନୀ ପାଟିଲଙ୍କ ବିବୃତ୍ତି ମଧ୍ୟ ସାମ୍ନାକୁ ଆସିଛି । ସ୍ପଷ୍ଟୀକରଣ ଦେଇ ରଜନୀ ପାଟିଲ କହିଛନ୍ତି ଯେ, ଆମେ ଏପରି ଏକ ଘରୁ ଆସିଛୁ ଯେଉଁଠାରେ ଏପରି ସଂସ୍କାର ଦିଆଯାଇ ନାହିଁ । କିନ୍ତୁ ଜଣେ ମହିଳାଙ୍କ ନାମ ନେଇ ବିଜେପି ଯେପରି ମୋତେ ଅପମାନିତ କରିବାକୁ ଚେଷ୍ଟା କରିଛି, ଏହା କଷ୍ଟଦାୟକ ।
ଏହି ପ୍ରସଙ୍ଗରେ ବିତର୍କ ବେଳେ କେନ୍ଦ୍ର ସରକାରଙ୍କ ଅନେକ ମନ୍ତ୍ରୀ ରଜନୀ ପାଟିଲଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ । କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲ ରଜନୀ ପାଟିଲଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ । ଆଜି ଏକ ଦୁର୍ଭାଗ୍ୟଜନକ ଘଟଣା ଘଟିଛି ବୋଲି ସେ କହିଛନ୍ତି । ସୋସିଆଲ ମିଡିଆରେ ଆମେ ଏହି ସମ୍ମାନଜନକ ଗୃହରେ ରେକର୍ଡ ହୋଇଥିବା ଭିଡିଓଗୁଡିକୁ ଦେଖିଲୁ ଯେଉଁଥିରେ ସଂସଦର ବରିଷ୍ଠ ସଦସ୍ୟମାନେ ଅନଧିକୃତ ଭାବରେ ରେକର୍ଡ ହେଉଛନ୍ତି । ଏହା ପରେ ଏହାକୁ ସୋସିଆଲ ମିଡିଆରେ ସେୟାର କରାଯାଇଥିଲା ।
