ଆସାମରେ ଭୟଙ୍କର ବନ୍ୟା, ୨୦ ଜିଲ୍ଲା ପ୍ରଭାବିତ
ଆସାମ: ଆସାମରେ ପ୍ରଳୟଙ୍କରୀ ବନ୍ୟା। ୨୦ ଜିଲ୍ଲାର ପ୍ରାୟ ୧ଲକ୍ଷ ୨୦ ହଜାର ଲୋକ ପ୍ରଭାବିତ । ଚାରିଆଡେ ପାଣି ଆଉ ପାଣି । ଲକ୍ଷାଧିକ ଲୋକ ବନ୍ୟାପାଣି ଘେରରେ ରହିଥିବା ବେଳେ NDRF, SDRF ଓ ଆସାମ ଷ୍ଟେଟ ଡିଜାଷ୍ଟର ମ୍ୟାନେଜମେଣ୍ଟ ପକ୍ଷରୁ ରେସ୍କ୍ୟୁ ଅପରେସନ ଜାରି ରହିଛି । କିଛିସ୍ଥାନରେ ବ୍ରହ୍ମପୁତ୍ର ନଦୀରେ ବନ୍ୟାଜଳ ବିପଦ ସଙ୍କେତ ଉପରେ ବହୁଥିବା ବେଳେ ପୁଥିମାରୀ ନଦୀରେ ଜଳସ୍ତର ବୃଦ୍ଧି ଯୋଗୁ ବକ୍ସା ଜିଲ୍ଲାରେ ବନ୍ୟା ସ୍ଥିତି ଅତି ଗମ୍ଭୀର ହୋଇଛି ।
ସେହିପରି ନଲବାରୀ, ଧୁବ୍ରି, ବରପେଟା ଆଦି ଜିଲ୍ଲାର ଅଧିକାଂଶ ଅଞ୍ଚଳ ବନ୍ୟାଜଳରେ ବୁଡ଼ି ରହିଛି । ପ୍ରଭାବିତ ଅଞ୍ଚଳରେ ଲୋକମାନଙ୍କୁ ଡଙ୍ଗା ସାହାଯ୍ୟରେ ସୁରକ୍ଷିତସ୍ଥାନକୁ ନିଆଯାଉଥିବା ବେଳେ ଗୃହପାଳିତ ପଶୁମାନଙ୍କୁ ମଧ୍ୟ ରେସ୍କ୍ୟୁ କରାଯାଇଛି। ଏବେସୁଦ୍ଧା ୭୮୦ ଗାଁରେ ବନ୍ୟାଜଳ ଭରିରହିଛି । ବନ୍ୟା ଯୋଗୁ ଲକ୍ଷାଧିକ ଟଙ୍କାର ଭିତ୍ତିଭୂମି କ୍ଷିତିଗ୍ରସ୍ତ ହୋଇଛି । ଆଗାମୀ ଦୁଇ ଦିନ ଯାଏଁ ଆସାମର ଅଧିକାଂଶ ଜିଲ୍ଲାରେ ପ୍ରବଳରୁ ଅତିପ୍ରବଳ ବର୍ଷା ସମ୍ଭାବନା ରହିଥିବା ପୂର୍ବାନୁମାନ କରିଛି ପାଣିପାଗ ବିଭାଗ।
