ଭାରତୀୟ ରିଜର୍ଭ ବ୍ୟାଙ୍କର ମୁଦ୍ରାନୀତି ଘୋଷିତ । ପଞ୍ଚମ ଥର ଲାଗି ରେପୋରେଟ ଅପରିବର୍ତ୍ତିତ

ଭାରତୀୟ ରିଜର୍ଭ ବ୍ୟାଙ୍କର ମୁଦ୍ରାନୀତି ଘୋଷିତ । ପଞ୍ଚମ ଥର ଲାଗି ରେପୋରେଟ ଅପରିବର୍ତ୍ତିତ ରଖିଛନ୍ତି ରିଜର୍ଭ ବ୍ୟାଙ୍କ । ରେପୋରେଟ ୬.୫ ପ୍ରତିଶତ ଅପରିବର୍ତ୍ତିତ ରଖିବାକୁ ନିଷ୍ପତ୍ତି ନେଇଛନ୍ତି ରିଜର୍ଭ ବ୍ୟାଙ୍କ ଗଭର୍ଣ୍ଣର ଶକ୍ତିକାନ୍ତ ଦାସ । ଅନ୍ୟାନ୍ୟ ବ୍ୟାଙ୍କକୁ ଯେଉଁ ହାରରେ ରିଜର୍ଭ ବ୍ୟାଙ୍କ ଋଣ ଦେଇଥାଏ ତାହାକୁ କୁହାଯାଇଥାଏ ରେପୋରେଟ । ରିଜର୍ଭ ବ୍ୟାଙ୍କର ଏହି ନିଷ୍ପତ୍ତି ଫଳରେ ଋଣ ଉପରେ ସୁଧହାର ଅପରିବର୍ତ୍ତିତ ରହିବ । ଶକ୍ତିକାନ୍ତ କହିଛନ୍ତି- ବିଶ୍ବ ଅର୍ଥନୀତି ସ୍ବାଭାବିକ ରହିଛି ଏବଂ ଗତ ବର୍ଷ ତୁଳନାରେ ମୁଦ୍ରାସ୍ଫୀତି ହ୍ରାସ ପାଇଛି । ଭାରତୀୟ ଅର୍ଥନୀତି ମଧ୍ୟ ସକାରାତ୍ମକ ହାରରେ ଗତି କରୁଛି । ଅର୍ଥନୀତିର ଅନ୍ୟାନ୍ୟ ଦିଗ ପ୍ରତି ଆରବିଆଇ ଗୁରୁତ୍ବ ଦେଉଛି ବୋଲି ସେ କହିଛନ୍ତି ।

ଅନ୍ୟପଟେ ଦେଶରେ UPI କାରବାରକୁ ପ୍ରୋତ୍ସାହିତ କରିବା ପାଇଁ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ମୁଦ୍ରା ନୀତି ବୈଠକରେ ଏକ ବଡ଼ ନିଷ୍ପତ୍ତି ନେଇଛି । UPI ଲୋକଙ୍କ ଜୀବନ ଏବଂ ଦେୟ ପ୍ରକ୍ରିୟାକୁ ଅଧିକ ସହଜ କରିଛି | ଏହି କାରଣରୁ ପ୍ରତି ମାସରେ UPI କାରବାର ସଂଖ୍ୟା ବୃଦ୍ଧି ପାଉଛି | ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ଶୁକ୍ରବାର ଦିନ ଏମପିସି ଘୋଷଣାରେ କହିଛନ୍ତି ଯେ ରେପୋ ହାରରେ କୌଣସି ପରିବର୍ତ୍ତନ କରାଯାଉନାହିଁ। ଏହା ବ୍ୟତୀତ ସେ ଡାକ୍ତରଖାନା, ବିଦ୍ୟାଳୟ ଏବଂ ମହାବିଦ୍ୟାଳୟରେ ୟୁପିଇ କାରବାରର ସୀମାକୁ ୫ ଲକ୍ଷ ଟଙ୍କାକୁ ବୃଦ୍ଧି କରିଛନ୍ତି।