ଇସ୍କନର ବାହୁଡ଼ା ଯାତ୍ରା ବେଳେ ଅଘଟଣ । ୬ ଜୀବନ୍ତ ଦଗ୍ଧ
ଉମରକୋଟି: ଇସ୍କନର ବାହୁଡ଼ା ଯାତ୍ରା ବେଳେ ତ୍ରିପୁରା ଉମରକୋଟି ଜିଲ୍ଲା ଚୌମୁନୀ ଅଞ୍ଚଳରେ ଅଘଟଣ । ରଥ ଟାଣୁ ଟାଣୁ ବିଦ୍ୟୁତ ତାର ସଂସ୍ପର୍ଶରେ ଆସି ଜୀବନ୍ତ ଜଳିଗଲେ ୬ ଶ୍ରଦ୍ଦାଳୁ । ମୃତକଙ୍କ ମଧ୍ୟରେ ଦୁଇଜଣ ନାବାଳକ ଅଛନ୍ତି । ଦୁର୍ଘଟଣାରେ ୧୮ ଜଣ ଶ୍ରଦ୍ଧାଳୁ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ୬ ଜଣଙ୍କ ସ୍ବାସ୍ଥ୍ୟାବସ୍ଥା ଗୁରୁତର ରହିଛି । ଗୁରୁତରମାନଙ୍କୁ ଅଗରତାଲା ସରକାରୀ ହସ୍ପିଟାଲରୁ ସ୍ଥାନାନ୍ତର କରାଯାଇଛି ।
ରଥ ଟଣା ଯାଉଥିବା ବେଳେ ଏହାର ଚୂଡ଼ାବିଦ୍ୟୁତ୍ ତାର ସଂସ୍ପର୍ଶରେ ଆସିଥିଲା । ଫଳରେ କରେଣ୍ଟ ଲାଗି ଘଟଣାସ୍ଥଳରେ ୬ ଜଣ ପୋଡି ହୋଇ ମୃତ୍ୟୁବରଣ କରିଛନ୍ତି । ମୃତ୍ୟୁ ସଂଖ୍ୟା ଆହୁରି ବଢ଼ିପାରେ ବୋଲି ଆଶଙ୍କା କରାଯାଉଛି । ଘଟଣା ସ୍ଥଳରେ ପୋଲିସ ପହଁଚି ମୃତଦେହ ଉଦ୍ଧାର କରିବା ସହ ଆହତଙ୍କୁ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି ।
ଘଟଣା ପ୍ରାୟ ଅପରାହ୍ନ ସାଢ଼େ ୪ଟାରେ ଘଟିଥିଲା । ଶ୍ରଦ୍ଧାଳୁ ରଥ ଟାଣୁଥିବା ବେଳେ ରଥର ଚୂଡ଼ା ୧୩୩ କେଭି ବିଦ୍ୟୁତ ତାର ସଂସ୍ପର୍ଶରେ ଆସି ଯାଇଥିଲା ।
