ସିଲ୍ ହେଲା ଖଣ୍ଡଗିରି ଉଦୟଗିରି ରାସ୍ତା
ଭୁବନେଶ୍ୱର: ଐତିହ୍ୟ ସ୍ଥାନଗୁଡ଼ିକୁ ଯାନବାହନ ଚଳାଚଳ ଓ ପ୍ରଦୂଷଣରୁ ସୁରକ୍ଷା କରିବା ପାଇଁ ୨୦୧୫ରେ ଏଏସ୍ଆଇ ପକ୍ଷରୁ ରାଜଧାନୀ ଉପକଣ୍ଠରେ ଥିବା ଖଣ୍ଡଗିରି ଓ ଉଦୟଗିରି ରାସ୍ତା ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଥିଲା। ଏବେ କିନ୍ତୁ ଐତିହ୍ୟସ୍ଥଳରେ ସ୍ଥିତି ଆହୁରି ଖରାପ ହେବା ପରେ ପ୍ରଶାସନ ଖଣ୍ଡଗିରି ଓ ଉଦୟଗିରି ପାହାଡ଼ ମଧ୍ୟରେ ଥିବା ରାସ୍ତାକୁ ସିଲ୍ କରିଛି। ଏହି ରାସ୍ତା କେବଳ ପଥଚାରୀଙ୍କ ବ୍ୟବହାର ପାଇଁ ଖୋଲା ରହିବ।
ଖଣ୍ଡଗିରି ଛକରୁ ଗୁମ୍ଫା ଆଡ଼କୁ ଯାଉଥିବା ରାସ୍ତା ଓ ଜୟଦେବ ବାଟିକା ଆଡ଼କୁ ଯାଉଥିବା ରାସ୍ତାରେ ଏବେ ଯିବା ଆସିବା ନକରିବାକୁ ପ୍ରତିବନ୍ଧକ ଲଗାଯାଇଛି। ଏହି ନିଷ୍ପତ୍ତିକୁ ବିଭିନ୍ନ ମହଲରେ ସ୍ୱାଗତ କରାଯାଇଛି।
ଏହି ରାସ୍ତାକୁ ସିଲ୍ କରିବା ପାଇଁ ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥା (ଏଏସ୍ଆଇ)ର ନିର୍ଦ୍ଦେଶକୁ କାର୍ଯ୍ୟକାରୀ କରିବାରେ ପ୍ରାୟ ୭ ବର୍ଷ ବିଳମ୍ବ ହେବାରୁ ଓଡ଼ିଶା ସରକାରଙ୍କ ପ୍ରାଚୀନ ଐତିହ୍ୟସ୍ଥଳୀର ସୁରକ୍ଷା ଓ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
