ବାଲିଯାତ୍ରା ଲାଗି ୮ ଦିନରେ ୮୬୮ ପ୍ଲଟ୍ ପଞ୍ଜୀକରଣ
କଟକ: ଓଡ଼ିଶାର ଐତିହ୍ୟ ସହ ଜଡ଼ିତ ବାଲିଯାତ୍ରା ଏବେ ବ୍ୟବସାୟ ତଥା ମନୋରଞ୍ଜନର ଭିତ୍ତିଭୂମି ପାଲଟିଛି। ଚଳିତବର୍ଷ ବାଲିଯାତ୍ରାରୁ ଜିଲା ପ୍ରଶାସନ ରେକର୍ଡ ପରିମାଣର ଆୟ ବୃଦ୍ଧି ନିମନ୍ତେ ଲକ୍ଷ୍ୟ ରଖିଛି। ଯାହାକି ଅନ୍ଲାଇନ୍ ମାଧ୍ୟମରେ ବାଲିଯାତ୍ରା ପଡ଼ିଆର ପ୍ଲଟ୍ଗୁଡ଼ିକୁ ପ୍ରଦର୍ଶିତ କରି ବ୍ୟବସାୟୀଙ୍କ ଇଚ୍ଛା ମୁତାବକ ଲିଜ୍ ନେବା ନିମନ୍ତେ ହୋଇଥିବା ନିଲାମ ପ୍ରକ୍ରିୟାରୁ ସ୍ପଷ୍ଟ ହୋଇଛି। ନିଲାମ ପ୍ରକ୍ରିୟାକୁ ବିରୋଧ କରି ବାଲିଯାତ୍ରା ବ୍ୟବସାୟୀ ମିଳିତ ମଞ୍ଚ ପ୍ରଶାସନକୁ ଲିଖିତ ଭାବେ ଅବଗତ କରାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ।
ଜିଲା ପ୍ରଶାସନ ଦ୍ୱାରା ବ୍ୟବସାୟୀଙ୍କୁ ପ୍ଲଟ୍ ଆବଣ୍ଟନ ନିମନ୍ତେ ପଞ୍ଜୀକରଣ ପ୍ରକ୍ରିୟା ଅକ୍ଟୋବର ୮ରୁ ୧୫ ତାରିଖ ପର୍ଯ୍ୟନ୍ତ ଧାର୍ଯ୍ୟ ହୋଇଥିଲା। ହେଲେ ଅସମ୍ଭବ ଭିଡ ଯୋଗୁ ଏହି ପ୍ରକ୍ରିୟାକୁ ଆସନ୍ତା ୧୮ ତାରିଖ ପର୍ଯ୍ୟନ୍ତ ଜିଲା ପ୍ରଶାସନ ପକ୍ଷରୁ ଘୁଞ୍ଚାଇ ଦିଆଯାଇଛି। ତେବେ ୧୯ ତାରିଖରୁ ପୂର୍ବ ନିର୍ଦ୍ଧାରିତ ସୂଚୀ ଅନୁସାରେ ପ୍ଲଟ୍ ଆବଣ୍ଟନ ନିମନ୍ତେ ନିଲାମ ପ୍ରକ୍ରିୟା ଅନୁଷ୍ଠିତ ହେବ। ଏଥିରେ ବର୍ଗଫୁଟ୍ ପ୍ରତି ସର୍ବନିମ୍ନ ୫୦ ଟଙ୍କା ଦର ରହିଥିବାବେଳେ ନିଲାମ ଡାକିବାବେଳେ ୫ଟଙ୍କା ହିସାବରେ ବଢ଼ାଇବାର ନିୟମ ରହିଛି। ଏହି କ୍ରମରେ ଶନିବାର ୯୦ଟି ଆବେଦନ ଗ୍ରହଣ କରାଯାଇଥିବାବେଳେ ମୋଟ ୧୪୦ଟି ପ୍ଲଟ୍ ପଞ୍ଜୀକୃତ ହୋଇଛି। ଗତ ୮ରୁ ୧୫ ତାରିଖ ଯାଏ ମୋଟ ୮୬୮ଟି ପ୍ଲଟ ନିଲାମ ପାଇଁ ପଞ୍ଜୀକରଣ ହୋଇଥିବା ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
ଏଥର କଟକ ବାଲିଯାତ୍ରାକୁ ସ୍ବଚ୍ଛ, ସବୁଜ ଓ ଭିଡ଼ମୁକ୍ତ କରିବା ଉଦ୍ଦେଶ୍ୟରେ ଜିଲା ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ତଦନୁସାରେ ଅକ୍ଟୋବର ୧୬ରୁ ୩୧ ତାରିଖ ପର୍ଯ୍ୟନ୍ତ ପ୍ରତିଦିନ ନିର୍ମଳ ଓ ସବୁଜ ବାଲିଯାତ୍ରା ଅଭିଯାନ ପାଇଁ ଜିଲା ପ୍ରଶାସନ ପକ୍ଷରୁ କାର୍ଯ୍ୟକ୍ରମ ପ୍ରସ୍ତୁତ ହୋଇଛି। ପ୍ରତିଦିନ ଅପରାହ୍ନ ସାଢେ ୪ଟାରେ ମହାନଦୀ କୂଳର ଡଙ୍ଗା ଘାଟଠାରୁ ଗଡ଼ଗଡ଼ିଆ ଘାଟ ପର୍ଯ୍ୟନ୍ତ ଏହି କାର୍ଯ୍ୟକ୍ରମ କରାଯିବ। ମହାନଦୀ ଆଳତିରେ କାର୍ଯ୍ୟକ୍ରମ ଶେଷ ହେବ। ଇତିମଧ୍ୟରେ ଦୀପାବଳି ଅମାବାସ୍ୟା ଦିନ ଉକ୍ତ କାର୍ଯ୍ୟକ୍ରମକୁ ବାଦ୍ ଦିଆଯାଇଛି। ଅନ୍ୟପକ୍ଷରେ ବାଲିଯାତ୍ରା ବ୍ୟବସାୟୀ ମିଳିତ ମଞ୍ଚରେ ସାମିଲ ହୋଇଥିବା ଅଲ୍ ଓଡ଼ିଶା ଟେଣ୍ଟ୍ ଆଣ୍ଡ୍ ସପ୍ଲାୟର ଓନର୍ସ ଆସୋସିଏଶନ, କଟକ କ୍ଲଥ ଆଣ୍ଡ୍ ଲାଇଟ୍ ସପ୍ଲାୟର୍ସ ଆସୋସିଏଶନ, ବାଲିଯାତ୍ରା ବ୍ୟବସାୟୀ ସଂଘ, ମୀନାବଜାର ମହାସଂଘ ପ୍ରଶାସନ ନିଲାମ ଦ୍ୱାରା କ୍ଷୁଦ୍ର ବ୍ୟବସାୟୀ ପ୍ରଭାବିତ ହେବା ଆଶଙ୍କା ଥିବାରୁ ବାଲିଯାତ୍ରା ବର୍ଜନ କରିବା ନିଷ୍ପତ୍ତି ସମ୍ପର୍କରେ ଆଗାମୀ ୧୮ ତାରିଖରେ ସ୍ପଷ୍ଟ କରିବେ ବୋଲି ଜଣାଯାଇଛି।
