ବଡବିଲରେ ଦୁର୍ବୃତ୍ତଙ୍କ ଗୁଳିମାଡରେ ବ୍ୟବସାୟୀଙ୍କର ମୃତ୍ୟୁ
ବଡବିଲ: ସକାଳୁ ସକାଳୁ ବିଚ୍ ରାସ୍ତାରେ ଫୁଟିଲା ଗୁଳି । କେନ୍ଦୁଝର ଜିଲ୍ଲା ବଡବିଲ ଅଞ୍ଚଳରେ ଦୁର୍ବୃତ୍ତଙ୍କ ଗୁଳିମାଡରେ ବ୍ୟବସାୟୀ ସୁନୀଲ ସିହ୍ନାଙ୍କର ମୃତ୍ୟୁ ଘଟିଛି । ସେହିଭଳି ଘଟଣା ସ୍ଥଳରେ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି । ତଦନ୍ତ ବେଳେ ସେଠାରୁ ଏକ ଖୋକା ଜବତ ହୋଇଛି । ତେବେସ୍ପଷ୍ଟ ଦିବାଲୋକରେ ଜଣେ ବ୍ୟବସାୟୀଙ୍କୁ ଗୁଳି କରି ହତ୍ୟା କରିବା ଘଟଣା ବଡ଼ବିଲରେ ଚାଞ୍ଚଲ୍ୟ ସୃଷ୍ଟି କରଛି ।
ଆଜି ସକାଳ ପ୍ରାୟ ୯ଟା ବେଳେ ସୁନୀଲ ତାଙ୍କ ସ୍କୁଟିରେ ୬ ନମ୍ବର ୱାର୍ଡର ପୁରୁଣା ଏଲ୍ଆଇସି କଲୋନୀ ନିକଟସ୍ଥ ଘରକୁ ଫେରୁଥିଲେ । ମନି ଟାୱାର ନିକଟରେ ତାଙ୍କ ଉପରକୁ ଗୁଳି ମାଡ଼ ହୋଇଥିଲା। ଫଳରେ ସେଠାରେ ଟଳି ପଡିଥିଲେ ସୁନୀଲ । ସ୍ଥାନୀୟ ଲୋକେ ଦେଖି ପୋଲିସକୁ ଖବର ଦେଇଥିଲେ । ପୁଲିସ ଆସି ତାଙ୍କୁ ଡାକ୍ତରଖାନା ନେଇଥିଲା। କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ପୋଲିସ ପହଞ୍ଚି ଘଟଣାର ଛାନଭିନ କରୁଛି । ଆଖପାଖରେ ଥିବା ସିସିଟିଭି ଫୁଟେଜକୁ ଯାଞ୍ଚ କରୁଛି ପୋଲିସ । ଘଟଣାସ୍ଥଳରେ କିଏ ଉପସ୍ଥିତ ଥିଲେ କେଉଁଠୁ ଗୁଳି ଆସିଥିଲ ସେ ବିଷୟରେ ଯାଞ୍ଚ କରୁଛି । ତେବେ କିଏ ଏବଂ କାହିଁକି ସୁନୀଲଙ୍କୁ ହତ୍ୟା କଲା ତାହା ଜଣାପଡୁ ନାହିଁ ।
ମିଳିଥିବା ସୂଚନା ଅନୁଯାୟୀ, ସୁନୀଲ ସହରର ଜଣେ ଜଣାଶୁଣା ବ୍ୟବସାୟୀ । ସ୍ଥାନୀୟ ନଗରପାଳଙ୍କର ମଧ୍ୟ ସେ ଘନିଷ୍ଠ ଥିଲେ। ହତ୍ୟାର କାରଣ ଜଣା ପଡି ନ ଥିଲେ ହେଁ ବ୍ୟବସାୟିକ ଶତ୍ରୁତାରୁ କାହି ତାଙ୍କୁ ହତ୍ୟା କରିଥାଇପାରେ ବୋଲି ସନ୍ଦେହ କରାରଯାଇଛି ।
