କଟକର ମିଠା ଦୋକାନ ଉପରେ ସିଏମସି ପକ୍ଷରୁ ଚଢାଉ

କଟକ: ଆଶ୍ୱିନରେ ମା’ଙ୍କ ଆଗମନକୁ ନେଇ ପୁଣି ଚଳଚଞ୍ଚଳ ହୋଇ ଉଠିଛି କଟକ ସହର । ତେବେ ପାର୍ବଣ ପୂର୍ବରୁ ସଜାଗ ହୋଇ ଉଠିଛି ସିଏମସି । ଗୁରୁବାର ସିଏମସି ସ୍ବାସ୍ଥ୍ୟ ବିଭାଗ ଓ ଖାଦ୍ୟ ସୁରକ୍ଷା ବିଭାଗ ପକ୍ଷରୁ ଯାଞ୍ଚ ଆରମ୍ଭ ହୋଇ ବିଭିନ୍ନ ମିଠା ଦୋକାନ ଉପରେ ଚଢାଉ କରାଯାଇଛି ।

କଟକର କଲ୍ୟାଣ ନଗର, ଲିଙ୍କ ରୋଡ, ବାଦାମବାଡି ଓ ଦୋଳମୁଣ୍ଡାଇ ଅଞ୍ଚଳରେ ଏହି ଚଢାଉ ଜାରି ରହିଛି । ମିଠା ଦୋକାନରେ ଅଧିକାରୀମାନେ ପଶି ମିଠା ପ୍ରସ୍ତୁତ ସ୍ଥାନ ପରିଦର୍ଶନ କରିଥିଲେ । ମିଠା ପ୍ରସ୍ତୁତିରେ ଆବଶ୍ୟକ ସାମଗ୍ରୀର ମାନ ପରୀକ୍ଷା ମଧ୍ୟ କରିଥିଲେ । ତେବେ ଆଗକୁ ଦଶହରା ଥିବାରୁ , ଖାଦ୍ୟର ମାନ ଯାଞ୍ଚ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ମଧ୍ୟ ଚେତାବନୀ ଦିଆଯାଇଛି ।
ସେପଟେ ଅନେକ ଦୋକାନରେ ନିମ୍ନ ଧରଣର ମିଠା ବିକ୍ରି କରାଯାଉଥିବାବେଳେ ସ୍କାର୍ଡ ହାତରେ ଧରାପଡ଼ିଥିଲେ । ମାନ ପରୀକ୍ଷା ବେଳେ ସତ୍ୟତା ସାମ୍ନାକୁ ଆସିଥିଲା। ଜିଲାପି ବାସୀ ଦୁର୍ଗନ୍ଧ ହେଉଥିବାବେଳେ, ପୁରୁଣା ଶିରାରେ ମିଠା ପ୍ରସ୍ତୁତ କରଯାଉଛି। ସାମ୍ନାରେ ଏ ସମସ୍ତ ଚିତ୍ର ଦେଖିବା ପରେ ସେହି ସମସ୍ତ ଦୋକାନକୁ ସିଲ କରାଯାଇଛି।