ସ୍ୱାମୀ ସାଜିଲା ସୈତାନ
ମଦ ନିଶାରେ ଉଜୁଡ଼ିଗଲା ପରିବାର । ସ୍ୱାମୀ ସାଜିଲା ସୈତାନ । ଭଦ୍ରକରେ ଡବଲ ମର୍ଡର ହୋଇଥିବା ସୂଚନା ମିଳିଛି । ପାରିବାରିକ କଳହରୁ ସ୍ତ୍ରୀ ଓ ପୁଅକୁ ହତ୍ୟା କରିଲା ବାପା । ଭଣ୍ଡାରୀପୋଖରୀ ଥାନା କୁଶଗଡ଼ିଆ ଗାଁରେ ଘଟିଛି ଏପରି ଏକ ବର୍ବର ହତ୍ୟାକାଣ୍ଡ । ମୃତକମାନେ ହେଲେ ସ୍ତ୍ରୀ କାଞ୍ଚନ ନାୟକ ଓ 5ବର୍ଷର ପୁଅ ଉତ୍ପଳ ନାୟକ ।ନିଶାଶକ୍ତ ଅବସ୍ଥାରେ ଏହିପରି ଜଘନ୍ୟ କାଣ୍ଡ ଘଟାଇଛି ଅଭିଯୁକ୍ତ | ଅତି ନିର୍ଦୟ ଭାବରେ ସ୍ତ୍ରୀ ଓ ପୁଅର ତଣ୍ଟି ଚିପି ହତ୍ୟା କରିଛି ଯୁବକ ଜଣକ ।
ସୂଚନା ଅନୁଯାୟୀ, ଭଣ୍ଡାରୀପୋଖରୀ ଥାନା ବନ୍ତ ଅଞ୍ଚଳର ଉମେଶ ତା ସ୍ତ୍ରୀ ଓ ପୁଅକୁ ଧରି କୁଶଗଡ଼ିଆ ଗାଁରେ ରହୁଥିଲା । ଉମେଶ ପ୍ରତିଦିନ ମଦ୍ୟପାନ କରୁଥିବାରୁ ବିଭିନ୍ନ ସମୟରେ ସ୍ୱାମୀ-ସ୍ତ୍ରୀଙ୍କ ଭିତରେ ଝଗଡ଼ା ଲାଗି ରହୁଥିଲା । ଗତକାଲି ବିଳମ୍ବିତ ରାତିରେ ମଧ୍ୟ ଅତ୍ୟାଧିକ ମଦ୍ୟପାନ କରି ଘରକୁ ଫେରିଥିଲା ଉମେଶ ଏବଂ ସ୍ତ୍ରୀ କାଞ୍ଚନ ଓ ପୁଅ ଉତ୍ପଳକୁ ଶୋଇଥିବା ବେଳେ ତଣ୍ଟି ଚିପି ହତ୍ୟା କରିବା ପରେ ଫେରାର ହୋଇ ଯାଇଥିଲା ଉମେଶ । ପରେ ଅଭିଯୁକ୍ତକୁ କାବୁ କରି ସ୍ଥାନୀୟ ଲୋକ ପୋଲିସ ଜିମା ଦେଇଥିଲେ । ଘଟଣାର ତଦନ୍ତ ପାଇଁ ଅଭିଯୁକ୍ତ ସ୍ୱାମୀ ଉମେଶ ନାୟକକୁ ଅଟକ ରଖି ପଚରାଉଚରା କରୁଛି ପୋଲିସ । କେଉଁ କାରଣରୁ ସେ ଏହି ପରି ଜଘନ୍ୟ କାଣ୍ଡ ଭିଏଇଲା । ସେ ବିଷୟରେ ତଦାରଖ କରୁଛି ପୋଲିସ |
