ଜୟପୁର ରେଳଷ୍ଟେସନର ୧ ନମ୍ବର ପ୍ଲାଟଫର୍ମରେ ରହିବ ହୀରାଖଣ୍ଡ ଏକ୍ସପ୍ରେସ
ଜୟପୁର: ପୂର୍ବତଟ ରେଳବାଇର ଓ୍ବାଲଟିୟର ଡିଭିଜନ ଡିଆର୍ଏମ ଅନୁପ ଶତପଥୀ ଜଗଦଲପୁରରୁ ବିଶାଖାପାଟଣା ଗସ୍ତ ସମୟରେ ଜୟପୁର ରେଳ ଷ୍ଟେସନରେ ସମୀକ୍ଷା କରିଛନ୍ତି। ଡିଆରଏମଙ୍କ ଗସ୍ତ ସୂଚନା ପାଇ ଜୟପୁରର ବିଭିନ୍ନ ଅନୁଷ୍ଠାନ ତାଙ୍କୁ ଦାବିପତ୍ର ଦେଇଛନ୍ତି। ଆଗାମୀ ଦିନରେ ଜୟପୁର ରେଳଷ୍ଟେସନର ଅପଗ୍ରେଡେସନ ହେବ। ୧ ନମ୍ବର ପ୍ଲାଟଫର୍ମରେ ହୀରାଖଣ୍ଡ ଲାଗିବ ବୋଲି ଏହି ଅବସରରେ ଶତପଥୀ ସୂଚନା ଦେଇଥିଲେ। ସିପିଆଇ ପକ୍ଷରୁ ମଧ୍ୟ ଏନେଇ ଦାବି କରାଯାଇଥିଲା। ୨ନଂ. ପ୍ଲାଟଫର୍ମରେ ହୀରାଖଣ୍ଡ ଲାଗୁଥିବାରୁ ଲୋକେ ହଇରାଣ ହେଉଛନ୍ତି ବୋଲି ସିପିଆଇ ପକ୍ଷରୁ ପୂର୍ବରୁ କୁହାଯାଇଥିଲା। ଜନ କଲ୍ୟାଣ ମଞ୍ଚ ତରଫରୁ ପ୍ରତ୍ୟହ ଭୁବନେଶ୍ୱରରୁ ବିଶାଖାପାଟଣା ଆସୁଥିବା ଟ୍ରେନ କୋରାପୁଟ ଯାଏ ଭାୟା ଆରକୁ ଦେଇ ସଂପ୍ରସାରଣ କଲେ ଅବିଭକ୍ତ କୋରାପୁଟ ବାସିନ୍ଦା ଉପକୃତ ହେବେ ବୋଲି ମଞ୍ଚର ରାଜେନ୍ଦ୍ର ଗୌଡ, ବାଲା ରାୟ ପ୍ରକାଶ କରିଥିଲେ। ସେହିପରି ସିପିଆଇ କୋରାପୁଟ ଜିଲା ପରିଷଦ ଏକ ଦାବିପତ୍ର ଡିଆରଏମ୍ଙ୍କୁ ଦେଇଛି।
ଏଥିରେ ଜୟପୁର ରେଳ ଷ୍ଟେସନରେ ଥିବା ଫୁଟ ଓଭର ବ୍ରିଜର ଉଭୟ ପାର୍ଶରେ ଖସଡ଼ା ପଥ ଗ୍ଳାଇଡିଂ ସ୍ଳୋପ ନିର୍ମାଣ କରିବାକୁ ପ୍ରସ୍ତାବ ଦିଆଯାଇଛି। ଏହାଦ୍ୱାରା ଯାତ୍ରୀମାନେ ଟ୍ରଲି ବ୍ୟାଗ କିମ୍ବା ସୁଟକେସ ଧରି ଗୋଟିଏ ପାର୍ଶ୍ୱରୁ ଅନ୍ୟ ପାର୍ଶ୍ୱକୁ ସହଜରେ ଯାଇପାରିବେ। ହୁଇଲ ଚେୟାରରେ ବୟସ୍କ ଓ ରୋଗୀମାନଙ୍କୁ ମଧ୍ୟ ନେବା ସହଜ ହେବ ବୋଲି ସିପିଆଇ ପକ୍ଷରୁ କୁହାଯାଇଛି। ଦ୍ୱିତୀୟ ପ୍ଲାଟଫର୍ମର ରେଷ୍ଟସେଡ ପରିବର୍ଦ୍ଧିତ କରି ସେଠାରେ ଶୌଚାଳୟ ଓ ପିଇବା ପାଣି ବ୍ୟବସ୍ଥା କରିବା, ମାଲକାନଗିରି-ଜୟପୁର-ଜୁନାଗଡ଼ ରେଳପଥ ନିର୍ମାଣ କାର୍ଯ୍ୟ ତ୍ୱରାନ୍ବିିତ କରିବା, ଜଗଦଲପୁରରୁ ଦିଲ୍ଲୀ ଓ ମୁମ୍ବାଇ ମେଟ୍ରୋ ସିଟି ସହ ଟ୍ରେନ ସଂଯୋଗୀକରଣ ବ୍ୟବସ୍ଥା ସମ୍ପର୍କରେ ଆଲୋଚନା କରାଯାଇଥିଲା। ଡିଆରଏମ୍ ଶତପଥୀ ସମସ୍ତଙ୍କ ଦାବି ଶୁଣି ରେଳବାଇ ପକ୍ଷରୁ ଯେଉଁ ପଦକ୍ଷେପ ଗ୍ରହଣ କରାଯାଉଛି ତାହା ଅବଗତ କରାଇଥିଲେ। ଷ୍ଟେସନର ଉଭୟ ପାର୍ଶରେ ଲିଫ୍ଟ ବ୍ୟବସ୍ଥା କାର୍ଯ୍ୟକାରୀ କରିବା, ଏଲିଭେଟର୍ ସିଷ୍ଟମ କରିବା, ଲଗେଜ ବୁକିଙ୍ଗ ବ୍ୟବସ୍ଥା କରିବା ପାଇଁ ସେ ସ୍ଥାନୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ଦାବିପତ୍ର ପ୍ରଦାନ ବେଳେ ଜିଲା ସମ୍ପାଦକ ଯୁଧିଷ୍ଠିର ରାଉଳ, ସିପିଆଇ ରାଜ୍ୟ କାର୍ଯ୍ୟକାରୀ କମିଟି ସଭ୍ୟ ପ୍ରମୋଦ ମହାନ୍ତି, ରାମକୃଷ୍ଣ ଦାସଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ।
