ବ୍ଲାକମେଲର ଅର୍ଚ୍ଚନାଙ୍କ ୫ଟି ଆକାଉଣ୍ଟରେ ଅଛି ପ୍ରାୟ ୧୫ କୋଟି ବାଲାନ୍ସ
ଭୁବନେଶ୍ବର: ଲେଡି ବ୍ଲାକମେଲର ଅର୍ଚ୍ଚନା ନାଗଙ୍କ କାରନାମା ସାରା ରାଜ୍ୟରେ ହଇଚଇ ସୃଷ୍ଟି କରିଛି । ବ୍ଲାକମେଲିଂ କରି ବଡ ବଡୁଆଙ୍କ ଠାରୁ ଟଙ୍କା ଲୁଟୁଥିବା ଅର୍ଚ୍ଚନାଙ୍କ ବ୍ୟାଙ୍କ ଆକାଉଣ୍ଟ ଏବେ ପୋଲିସ ହାତରେ ଲାଗିଛି। ଏହି ମାୟାବିନୀଙ୍କ ମୋଟ ୫ଟି ଆକାଉଣ୍ଟର ତଥ୍ୟ ପୋଲିସର ହସ୍ତଗତ ହୋଇଛି । ଯେଉଁଥିରେ ଦୁଇଟି ସେଭିଂ ଆକାଉଣ୍ଟ, ଗୋଟିଏ ଜଏଣ୍ଟ ଆକାଉଣ୍ଟ, ଦୁଇଟି କରେଣ୍ଟ ଆକାଉଣ୍ଟ ଥିବା ପୋଲିସ ସୂତ୍ରରୁ ସୂଚନା ମିଳିଛି ।
ଏହି ୫ଟି ଆକାଉଣ୍ଟରେ ପ୍ରାୟ ୧୫ କୋଟି ବାଲାନ୍ସ ଥିବା ପୋଲିସ ଜାଣିବାକୁ ପାଇଛି । ତେବେ ତାଙ୍କ ଆର୍ଥିକ ନେଣଦେଣର ତଦନ୍ତ ପାଇଁ ଏକ ଟିମ୍ ଗଠନ କରାଯାଇଛି । କିଛି ଫାଇନାନ୍ସିଆଲ୍ ଆଡଭାଇଜର ଓ ଚାଟାର୍ଡ ଆକାଉଣ୍ଟାଣ୍ଟଙ୍କ ସହାୟତା ଲୋଡିଛି ପୋଲିସ । ଅଧିକାଂଶ ଆକାଉଣ୍ଟରେ RTGSରେ ମନି ଟ୍ରାନ୍ସଫର ହୋଇଥିବା ଜଣାପଡିଥିବା ବେଳେ ଆଉ କିଛି ଆକାଉଣ୍ଟରେ ଚେକ୍ ଡିପୋଜିଟ ଓ ଅନଲାଇନ ଇଣ୍ଟରନେଟ ଟ୍ରାଞ୍ଜାକ୍ସନ ହୋଇଛି । ସେହିପରି କରେଣ୍ଟ ଆକାଉଣ୍ଟରେ ଅଧିକ ଟ୍ରାଞ୍ଜାକ୍ସନ ହୋଇଛି । ଅଧିକାଂଶ ପେମେଣ୍ଟ ଜଏଣ୍ଟ ଆକାଉଣ୍ଟକୁ ଆସୁଥିବା ଜଣାପଡିଛି ।
ପୋଲିସ ହାଇ ଟ୍ରାଞ୍ଜାକ୍ସନକୁ ନାଲି ଗାରରେ ହାଇଲାଇଟ ରଖିଛି । ଯେଉଁ ଆକାଉଣ୍ଟରୁ କାରବାର ହୋଇଛି ସେସବୁର ଆଇଏଫଏସସି କୋଡ(IFSC Code) ଆକାଉଣ୍ଟ ନମ୍ବର, ଶାଖା ନାମ ସହ ଆକାଉଣ୍ଟଧାରୀଙ୍କ ତାଲିକା କରିଛି ପୋଲିସ । ଏହାବ୍ୟତୀତ ସେଭିଂ ଆକାଉଣ୍ଟରୁ ସେ ସମ୍ପର୍କୀୟଙ୍କ ପାଖକୁ ଟଙ୍କା ପଠାଉଥିଲେ । କିଛି ଆକାଉଣ୍ଟରୁ ଇଏମଆଇ ସୁଝୁଥିବା ଜଣାପଡିଛି । ଅନ୍ୟ କିଛି ଆକାଉଣ୍ଟରେ ଫର୍ଜି ଡକ୍ୟୁମେଣ୍ଟରେ କେତେକ ଠକେଇ କରିଥିବାର ପୋଲିସ ସୂଚନା ପାଇଛି । ଏପରିକି କିଛି ବ୍ୟାଙ୍କ ଅଧିକାରୀ ରୀତିମତ ଆସି ତାଙ୍କର ଘର ସାମ୍ନାରେ ଆସି ଚକ୍କର କାଟି ଯାଉଛନ୍ତି ।
ଅନ୍ୟପଟେ ମାୟାବିନୀ ଅର୍ଚ୍ଚନା ସହ ହେଭିୱେଟ ରାଜନେତା, ଫିଲ୍ମ ପ୍ରଯୋଜକ, ଅଭିନେତା, ପ୍ରଶାସନିକ ଅଧିକାରୀଙ୍କ ଫଟୋ ଭାଇରାଲ ହେବା ପରେ ରାଜ୍ୟ ରାଜନୀତି ସରଗରମ୍ ରହିଛି । ବିଜେପି ଓ ବିଜେଡି ମଧ୍ୟରେ ଟଣାଓଟରା ଲାଗିଥିବା ବେଳେ କଂଗ୍ରେସ ମଧ୍ୟ ରାଜ୍ୟ ସରକାରଙ୍କୁ ଟାର୍ଗେଟ କରିଛି । ଅର୍ଚ୍ଚନା ନାଗଙ୍କ ସତ ପଦାକୁ ଆସିଲେ ସରକାର ଭାଙ୍ଗିଯିବ ବୋଲି ବୟାନ ଦେଇଛନ୍ତି କଂଗ୍ରେସ ବିଧାୟକ ।
