ହଷ୍ଟେଲରୁ ଲାପଟପ, ମୋବାଇଲ ଚୋରି ଅଭିଯୋଗରେ ଏମବିଏ ଛାତ୍ରୀ ଗିରଫ

ଇନଫୋସିଟି ଥାନା ପୁଲିସ ଏହି ମାମଲାର ୨ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏହି ମାମଲାର ଅଧିକ ତଦନ୍ତ ଜାରି ରଖିଥିବା କହିଛି। ପାଠ ପଢିବାକୁ ଆସିଥିବା ଛାତ୍ରୀ କାହିଁକି ଚୋରି କରିବାକୁ ଇଚ୍ଛା କଲେ ଏବଂ ଏହି ଚୋରି ପଛରେ କୌଣସି ରାକେଟ ରହିଛି କି ଆଦି ସନ୍ଦେହ ଉପୁଜିବା ପରେ ପୋଲିସ ତଦନ୍ତ କରୁଛି। ଗିରଫ ଅଭିଯୁକ୍ତ ଚୋରି କରିଥିବା ନେଇ ଥାନାରେ ପଚରା ଉଚରା କରିବା ବେଳେ ସତ ସ୍ବୀକାର କରିଥିବା ସୂଚନା ରହିଛି। ଏହାପରେ ପୁଲିସ ଦୁଇ ଅଭିଯୁକ୍ତଙ୍କୁ ଗିରଫ କରିବା ସହିତ ଦୁଇଟି ଲାପଟପ ଓ ମୋବାଇଲ ଜବତ କରିଛି।

ନିଜ ମୋବାଇଲ ଓ ଲାପଟପ ଚୋରି ହେବା ପରେ ଅଭିଯୋଗକାରିଣୀ ସହପାଠୀଙ୍କ ଉପରେ ସନ୍ଦେହ କରିଥିଲେ। ଏହାକୁ ନେଇ ଦୁଇ ଜଣଙ୍କ ମଧ୍ୟରେ ବଚସା ଓ ଠେଲାପେଲା ହୋଇଥିଲା ବୋଲି ସୂଚନା ରହିଛି। ସେହିପରି ଗିରଫ ଅଭିଯୁକ୍ତଙ୍କ ମୋବାଇଲରେ ଟଙ୍କା ନେଣଦେଣ ହୋଇଥିବା ଦେଖିବାକୁ ପାଇଥିଲେ। ପରେ ଥାନାରେ ଅଭିଯୋଗକାରିଣୀ ଏତଲା ଦେଇଥିଲେ। ନିଜ ରୁମରେ ନଥିବା ବେଳେ ତାଙ୍କ ମୋବାଇଲ ଓ ଲାପଟପ ଚୋରି ହୋଇଥିବା ଏତଲାରେ ଉଲ୍ଲେଖ କରିଥିଲେ ଅଭିଯୋଗକାରିଣୀ। ଅକ୍ଟୋବର ୧୬ ତାରିଖରେ ଏହି ଚୋରି ହୋଇଥିବା ଜଣାପଡିଛି।