ବିଧାୟକଙ୍କ ଦରମା ବୃଦ୍ଧି ନେଇ ବିଧାନସଭାରେ ତେଜିଲା ତର୍କ

ଭୁବନେଶ୍ୱର: ଓଡିଶାର ବିଧାୟକଙ୍କ ଦରମା ୧ ଲକ୍ଷରୁ ଅଢେଇ ଲକ୍ଷ ଟଙ୍କାକୁ ବୃଦ୍ଧି ହେବ । ଏଭଳି ସୂଚନା ମିଳିବା ପରେ ଏହାକୁ ନେଇ ବିଭିନ୍ନ ତର୍କ ସାମ୍ନାକୁ ଆସିଛି। ଓଡ଼ିଶା ବିଧାନସଭାର ବାଚସ୍ପତିଙ୍କ ଦ୍ୱାରା ଗଠିତ କମିଟି ଦରମା ବୃଦ୍ଧି ନେଇ ପ୍ରସ୍ତାବ ପଠାଇଛି। ବାଚସ୍ପତିଙ୍କୁ ଚିଠି ଲେଖି ବିଧାୟକମାନଙ୍କୁ ୨.୫ ଲକ୍ଷ ଟଙ୍କା ଦରମା ଓ ପୂର୍ବତନ ବିଧାୟକମାନଙ୍କୁ ୧ ଲକ୍ଷ ଟଙ୍କା ପେନସନ ପ୍ରଦାନ କରିବାକୁ କମିଟି ସଦସ୍ୟମାନେ ପ୍ରସ୍ତାବ ଦେଇଥିଲେ। ତେବେ ଓଡ଼ିଶା ସରକାର ଏ ନେଇ କୌଣସି ସ୍ପଷ୍ଟ ସୂଚନା ଦେଇନାହାନ୍ତି। ହେଲେ ବିଧାନସଭା ଅଧିବେଶନ ଅଧାରୁ ବନ୍ଦ ହେଉଥିବା ବେଳେ ବିଧାୟକଙ୍କ ଦରମା ବୃଦ୍ଧିକୁ ନେଇ ଭିନ୍ନ ମତ ପ୍ରକାଶ ପାଇଛି।

ଅନ୍ୟ ରାଜ୍ୟର ବିଧାୟକଙ୍କ ଦରମା ପ୍ରାୟ ୨ରୁ ୨.୫ ଲକ୍ଷ ଟଙ୍କା ବୋଲି ବିଧାୟକମାନେ ଦଳମତ ନିର୍ବିଶେଷରେ କହିଛନ୍ତି। କିନ୍ତୁ ଓଡ଼ିଶାର ବିଧାୟକଙ୍କ ଦରମାରେ କୌଣସି ଉଲ୍ଲେଖନୀୟ ବୃଦ୍ଧି ହୋଇନାହିଁ। ଦରମା, ପେନସନ, ଗସ୍ତ ଖର୍ଚ୍ଚ, ମେଡିକାଲ ଓ ଅନ୍ୟାନ୍ୟ ଭତ୍ତା ବୃଦ୍ଧି କରାଯିବ ବୋଲି ସୂଚନା ରହିଛି।  ବିଧାୟକମାନେ ମଧ୍ୟ ସାଧାରଣ ଲୋକଙ୍କ ଭଳି କୋଭିଡ୍-୧୯ ଦ୍ୱାରା ସମାନ ଭାବେ ପ୍ରଭାବିତ ହୋଇଥିଲେ। ନିର୍ବାଚନ ମଣ୍ଡଳୀକୁ ଯିବା ଆସିବା ସମୟରେ ମଧ୍ୟ ବହୁତ ଖର୍ଚ୍ଚାନ୍ତ ହେବାକୁ ପଡ଼ିଥାଏ। ତେଣୁ ଅନ୍ୟ ରାଜ୍ୟର ବିଧାୟକଙ୍କ ତୁଳନାରେ ଓଡ଼ିଶାର ବିଧାୟକଙ୍କ ଦରମା ମଧ୍ୟ ବୃଦ୍ଧି କରାଯାଉ ବୋଲି ବିଜେଡି ବିଧାୟକ ଦେବୀପ୍ରସାଦ ମିଶ୍ର କହିଛନ୍ତି।