ମହାକାଶରେ ଲୋହିତ ଚନ୍ଦ୍ର, ରାଜ୍ୟର ସମସ୍ତ ସ୍ଥାନରେ ମହାଜାଗତିକ ଦୃଶ୍ୟ
ଭୁବନେଶ୍ୱର : ମହାକାଶରେ ଲୋହିତ ଚନ୍ଦ୍ର । ଦେଖୁ ଦେଖୁ ଲାଲ୍ ରଙ୍ଗ ଧାରଣ କରିଥିଲା ସୁନ୍ଦର ଶୀତଳ ଚନ୍ଦ୍ର । ପୁରୀ ସମେତ ରାଜ୍ୟର ସମସ୍ତ ସ୍ଥାନକୁ ମହାକାଶରେ ଏହି ମହାଜାଗତିକ ଦୃଶ୍ୟ ଦେଖିବାକୁ ମିଳିଛି । ଭୁବନେଶ୍ୱରରେ ଆଂଶିକ ଗ୍ରହଣ ଦୃଶ୍ୟମାନ ହୋଇଛି । ଛାଇ ଆଲୁଆର ଖେଳକୁ କେତେକ ଦେଶର ଲୋକେ ପୂର୍ଣ୍ଣ ଭାବେ ଉପଭୋଗ କରିଛନ୍ତି । ଭାରତର କେତେକ ସ୍ଥାନରେ ଗ୍ରହଣର ସ୍ପର୍ଶ ଓ ଶେଷ ସମୟରେ ଦୃଶ୍ୟ ଦେଖାଯାଇନଥିଲେ ବି ପୂର୍ଣ୍ଣ ଗ୍ରାସର ଦୃଶ୍ୟକୁ ଉପଭୋଗ କରିହୋଇଛି । ଭାରତୀୟ ଆର୍ଥ ସାଇନ୍ସ ମନ୍ତ୍ରଣାଳୟ ଅନୁସାରେ, ଅପରାହ୍ନ ୨ଟା୩୯ରେ ଗ୍ରହଣ ଆରମ୍ଭ ହୋଇଥିଲା । ୩ଟା ୪୬ରୁ ୫ଟା ୧୨ ପର୍ଯ୍ୟନ୍ତ ପୂର୍ଣ୍ଣ ଚନ୍ଦ୍ରଗ୍ରହଣ ଅନୁଷ୍ଠିତ ହୋଇଥିଲା । ୬ଟା ୧୮ରେ ଗ୍ରହଣ ଶେଷ ହୋଇଥିଲା । ସୂର୍ଯ୍ୟ, ଚନ୍ଦ୍ର ଓ ପୃଥିବୀ ଏକ ସରଳରେଖାରେ ରହିବାରୁ ଚନ୍ଦ୍ରଗ୍ରହଣ ହୋଇଥାଏ । ଚଳିତବର୍ଷର ଏହା ଶେଷ ଚନ୍ଦ୍ରଗ୍ରହଣ ଥିଲା । ତିନି ବର୍ଷ ପରେ ପରବର୍ତ୍ତୀ ଚନ୍ଦ୍ରଗ୍ରହଣ ହେବ ।
